O le taofia o faafitauli e tulai mai totonu o Matagaluega a le Malo, ona e afua i le leai o se va fealoaloai, o le auga lea o se fonotaga na faatautaia i le Potu Fono a le Faletupe o Atinae.
O lea fonotaga na vaavaalua ai le Ofia a le PSC (Public Service Commission ma le ILO (International Labour Organization).
Na auai sui sinia ma sui o nisi o i latou na fai ma sui o a latou Matagaluega e auai i lea fonotaga tāua. O le fefaasoai i totonu o lea fonotaga, lea ua manatu ofisa e lua, atonu e maua ai se fofo o ia faafitauli.
“E iai faafitauli e tutupu i totonu o Matagaluega, i le taumafai lea o le isi e fai le galuega o loo fai e le isi.”
O le saunoaga tuusa‘o lea a le Afioga i le Palemia, Susuga Tuilaepa Lupesoliai Dr. Sailele Malielegaoi, i lana saunoaga autu e tatala aloaia ai lea fonotaga. E afua ia faafitauli e pei ona saunoa Tuilaepa, ona e leai se fealofaniga i le va o le isi tamaitai i le isi, aemaise o le alii i le isi alii i totonu o Matagaluega taitasi a le Malo.
“O le femisaai, fetuia‘i aemaise o nisi o sauaga e tulai mai totonu o Matagaluega.”
O le auga atoa e pei ona saunoa le Afioga i le Palemia, e faapea, “O se faiva e tapatautalia e lē taunuu i se manuia.”
Ua uma ona faataoto alafua e agai ai soo se tagata faigaluega e faatino a latou galuega, o le faaopoopo lea a le Afioga i le Palemia.
Ua mae‘a foi ona faataoto taiala o le amataga ma le gataaga, peitai o loo iai lava nisi o faafitauli e pei ona saunoa Tuilaepa o loo aliali mai pea i totonu o Matagaluega a le Malo.
Ua iai le tulaga e mafai ona faapea ua sopo tuaoi, ma o le sopo tuaoi, o se tasi lea o vaega e ala ai ona tutupu faafitauli i le va o tagata faigaluega.
O le ala foi lea o le faataoto o taiala i le vaega e amata ai ma le vaega e gata ai lau galue, ina ia mafai ona ausia tulafono o le faamaoni ma le tutusa lelei o auaunaga i soo se faaiuga e fai. O se faataitaiga e pei ona saunoa le Afioga i le Palemia, o le faitio lea o se isi tagata faigaluega i tulaga o malaga i atunuu i fafo.
“E iai faitioga e faapea, ua alu soo i fafo le pule o se matagaluega, ae lē tuu avanoa mo se isi tagata e alu.”
“O mea ia ua tutupu ai faafitauli, o le maitau e le isi o faaletonu a isi.”
Na faamatalaina foi e le Afioga i le Palemia, ua tele tusitusiga ua oo atu ia te ia, ona o ituaiga mataupu faapea. O fautuaga ma timaiga a le Afioga i le Palemia, o se naunautaiga ina ia faaleleia atili ai soo se Matagaluega a le Malo.
E iai le talitonuga a le Afioga i le Palemia e faapea, afai e tutupu ia faafitauli, ae ia aua ne‘i faaletonu ai le faiga o galuega. O ai o le a afaina? E afaina le atunuu o loo faatalitali i le auaunaga o loo fia maua.
O le fautuaga a Tuilaepa, ia manatu faatasi ma le Atua, auā e leai se isi e atoatoa. “A aunoa le tagata ma le Atua e faivavale ona faiva.”
