E toatele nisi e masani ona talosaga mai ia te au pe iai se auala e taofi ai malaga sue tupe mai Samoa. Fai mai latou ua pologa tele le toatele o aiga i Niu Sila, faapea foi Ausetalia ona ua taufai sosoo mai malaga sue tupe mai Samoa.
E fai o le sue tupe mai mo aulakapi ma isi taaloga, a o maota foi o ekalesia, e lē gata i lea o faleaoga i nuu i tua, ae ua oo foi i vaega faaupufai ua fai ma masani ona saili tupe mai i Niu Sila ma Ausetalia.
Ou te manatu e tāua tele lea lagona ua laga mai e ia tamalii ia te au. Muamua, ua faigata tele le soifuaga i Niu Sila. Ua sii le tau o oloa ma auaunaga masani a faleoloa ma matagaluega a le Malo talu mai le siitaga o le GST i le 15%.
E toatele nisi ua vaea mai galuega, ma ua fiu foi e toe sue ni galuega auā le tausiga o aiga i aso taitasi.
E 150,000 le aofai o tagata Niu Sila ua lē faigaluega ma e pito i sili ona toatele ai tagata Pasefika. O nisi o le aufaigaluega o loo taumafai e tausi latou aiga i le faigaluega lea i galuega e lua pe tolu.
E moni o loo maua pea galuega, peitai ane e tatau lava ona iai sou faailoga maualuga, poo se tomai faapitoa mo ia galuega.
Ua iai foi suiga i totonu o galuega ua faigofie ona faatea oe mai galuega seia vaganā ua avea oe ma sui o iuni a le aufaigaluega.
Ua lē toe faigofie ona maua se fesoasoani mai matagaluega a le Malo e pei ona masani ai i lalo o le faigamalo a le Leipa.
Ua suia faiga faavae a le National ma ua utiuti seleni ua faaaogā e matagaluega e fesoasoani ai mo tagata lautele. Ua iai fesuiaiga i penefiti, ua lē toe faigofie le agavaa o soo se isi i faiga fou ua iai nei. Ua faaletonu foi fale ma ua maualuga tau.
O loo faaletonu foi tupe maua mai galuega. O nisi lava o tina ma tamā matutua o faigaluega lava i galuega e maualalo totogi ona pau lava lea o galuega o loo agavaa ai.
O le totogi maualalo ua iai nei o le $13.50 i le itula. Afai e 5 aso o le vaiaso e te faigaluega ai faato‘ā maua lea o le $540 i le vaiaso. Afai e aveese mai le lafoga a le Malo mai lea totogi, ma totogi ma le fale i le $350 i le vaiaso, ua lē lava le faasoasoa mo mea taumafa o le vaiaso.
Afai o iai ma tamaiti aoga ua telē le faaletonu o le a faaopoopo atu i lenei aiga. Afai e toe faaopoopo atu ma saogamea o faalavelave poo saogamea foi i ekalesia, ua maua ai loa ma aiga ua nofo aitalafu i fale, ua lē mafai ona totogi pili o moli ma pili o tamaiti aoga.
Ona o ia la mafuaaga o lea ou te talitonu ai e tāua tele le finagalo ua faailoa mai ia te au e le tatou Atunuu i le tele o faafitauli o aumalaga mai Samoa lea o loo taufai sulu mai i Niu Sila mo se fesoasoani tupe.
O le tali puupuu i se finagalo ua a‘e. E leai se tulafono a Niu Sila e mafai ai ona taofi faigamalaga mai Samoa i le o mai i Niu Sila e saili tupe ai mo a latou fuafuaga.
O le upu moni lava, o nei faigamalaga e fuafua lava ia te oe ma lau faasoasoa. O oe lava o loo iai le tofa mamao ma le faautautaga oo e fai ai lau faatatau i nei faigamalaga.
Fai mai le isi toeaina ia te au, na sau se tasi malaga ona fai atu lea i lana fanau seia saili mai se tupe e fai meaalofa i le malaga e faigata le susuga i le faafeagaiga o faimalaga mai ai, faatasi ma alii tāua o le latou alaalafaga.
E telē le tupe na maua mai e lana fanau ma foai i le tusigaigoa na fai. Na uma le tusigaigoa, e toeitiiti lava maua le $100,000 o lea sailigatupe ma toe foi loa le faigamalaga i Samoa ma le fiafia.
Na mulimuli ane ua faigata i lana fanau ona totogi le latou fale, ona ua o tamaiti fai le aitalafu mai fale fai aitalafu ae totogi le 30% faaopoopo o le tului.
O le mea na tupu ua misi loa le totogiina o le aitalafu, na amata mai le aitalafu e $1,000 ae e oo atu i le faaiuga o le tausaga ua $15,000 le aofai o lenei aitalafu talu ai ua lē totogiiga ma ua faaopoopo le isi faasalaga i luga o le isi faasalaga e le pisinisi fai aitalafu.
Ua faaletonu ai ma le totogi o le latou fale, ua faaletonu le totogi o le moli o le fale, ma o le tele o aso na o le ai paagugu o tamaiti ua lē lava le faasoasoa.
E lē gata i lea ua saisaitia latou i le aitalafu e $1,000 na fai mo le sailigatupe mai Samoa, a o lenei ua oo i le $15,000 ma o loo agai pea i luga lenei aitalafu.
Ua faamatala mai e lenei tamā ma tagi ma ua fai mai ua lē iloa poo le ā le mea o le a fai, ma ua manaomia se fesoasoani, o latou o le a tuli ma le fale.
Ona ou faamalulu lea i lenei tamā, e leai leai lava se matagaluega a le Malo e toe mafai ona fesoasoani atu ia te ia ma lana fanau.
E leai foi se fesoasoani a le matagaluega a fale e toe mafai ona maua mo latou. Pau lava o le onosai e totogi le aitalafu seia mae‘a auā o le nonogatupe na ioe i ai latou ma le mautinoa, ma saini uma e lana fanau talu ai lona manao e faamuamua le faigamalaga mai Samoa.
