O le faamatalaga a le Peresitene o le Asosi o Tausi Soifua o Taulapapa Faamanatu Nielsen …”e leaga le fauga o le fale.”
O le mau a le Pule o le Matagaluega o le Soifua Maloloina, Palanitina Tupuimatagi Toelupe…”ua fautuaina le Matagaluega i le saogalemu o lenei galuega”.
Ae o le faamatalaga a le tamalii o loo faafoeina le galuega, o se tasi o loo faisea i le Konekarate o loo fausia le fale mo tausi soifua e nonofo ai, o ia lea o Fuimaono Poloma Eteuati…”sei faatali poo le ā le lipoti o le suesuega ua faia nei ina ua taofi le galuega”.
O le konekarate na amata galulue i le tausaga ua te‘a i lenei galuega, lea o loo aofia ai le afioga Fuimaono ua faaigoaina o le Pineapple Enterprises.
Na faaalia le faateia o lea tamalii ina ua oo atu le faatonuga a le Matagaluega o le Soifua Maloloina ina ia taofi le galuega.
Na mae‘a lea, ona faatautaia loa lea o se suesuega a le Komisi o Tagata Faigaluega a le Malo le PSC ma le Ofisa o Tupe a le atunuu ma o lea la o loo tālia se lipoti mai i lea suesuega poo le a le faaiuga o lenei mataupu.
Ua tele tausaga e lei toe fausia se fale e faamautu ma nofo tumau ai tausi soifua e pei ona sa sau a‘i aoaoga o tausi soifua i Samoa i tausaga ua mavae.
O le nofoaga lea na fausia ai le nofotumau a Tausi Soifua lea ua iai nei le Falemai Suetoto a le Atunuu.
O le isi ituala la i le nofoaga o loo i ai le Faleaoga ua fausia mo aoaoga a alii ma tamaitai tausi soifua lea ua sosoo atu ai ma le galuega lenei.
O le faamoemoe o le Asosi o Tausi Soifua ina ia mafai ona maua pea i latou o loo aooga ai i le tomai faatausi soifua i taimi uma a o aooga, aua galuega faatino e mafai ona latou ofo atu i le Soifua Maloloina i lana vaega o tautua faafomai.
O loo tausavali lava tausi soifua i le taimi nei ma o le tele o aoaoga tusitusia ua faatautaia pea i le Iunivesite Aoao o Samoa a o le faleaoga i Motootua o loo faatautaia ai a latou galuega faatino.
O se fale fogafalelua lea na fausia ae ua taofia nei. O le mataupu ua i luma nei o loia ma ua leai se itu o aafia i lenei mataupu o mafai ona toe fai mai i ai se faamatalaga a o feagai ai loia ma feutagaiga.
O le konekarate foi auā le fausia o lenei fale tele na faia i le va o le Malo ma le Konekarate lenei. O le tasi lenei o konekarate na galulue ma isi konekarate fau fale i le fausia o le Faletupe o Atinae a Samoa i lona nofoaga fou i Savalalo.
