“Ua faateia i matou i le faatauina o le maketi ua uma ona faamatuu mai e le Malo e taui ai tausaga sa faaaogā ai le fanua o lo matou aiga sa faagaioia ai le maketi, ae o lea ua puleesea e isi matai e leai se latou aiā i le fale ma le fanua”.
O se faamatalaga lea a se tasi o sui o le aiga o le tina o Pauli Falefia ua ia faailoa mai faamaumauga o pepa o le fanua o loo tu ai le maketi tuai i Salelologa.
“Ua matou maua tala e $50,000 na faatau ai le fale (maketi) e le kamupani o loo faatauina mai le nonu i nuu i Savaii”. O le faamatalaga lea le sui o le aiga ua musu e faailoa lona suafa. “Ua tumu i matou i le lē fiafia ina ua matou faalogo mai Niu Sila ua uma ona saini le maliega a isi matai o le matou nuu e leai se aiā i le fanua ma le fale, ma sui o le kamupani e faatau ai le fale”.
O le tina o Pauli Falefia Taetage ma lona alo tama o Pauli Sanele na malaga mai i Samoa i le amataga o le vaiaso nei ma faia sailiga o le faatauga o le fale, ina ua logotala ua faatau le maketi tuai i Salelologa e nisi o matai e aofia ai Pauli Apelu ma isi matai e toasefulu.
O le molimau a se tasi o le aiga e faapea, o i latou ua faia le fefaatauaiga o le fale ma sui o kamupani o loo galulue e faatau i le atunuu o Saina le sua o le nonu e ala i se sootaga faapisinisi ma le alii Saina o Tupailelei Jack Chen e leai se isi na aafia i feutanaiga o le taofia o le talaina o le maketi, ina ua amata faaaogā le maketi fou i Salelologa.
“O le mea e ofo ai e leai se isi o latou na iai ae o lea ua latou faia se fefaatauaiga faasolitulafono”.
E lei manuia sailiga mo se finagalo o le tofa Pauli Apelu poo se isi o matai na latou sainia le maliega e faatau ai le maketi.
O le faamatalaga a le tina o Pauli Falefia sa ia finauina ma lona alo tama o Pauli Apelu ma isi o lona aiga le taofia o le talaina i lalo o le maketi ona o le 30 tausaga na faaaogā ai lo latou fanua mo lea atina‘e a le malo e leai ma se taui na totogiina atu.
O le latou feiloaiga ma le Minisita o Punaoa Faalenatura ma le Siosiomaga i lea vaitaimi le afioga Faumuina Tiatia Liuga, na faailoa atu ai e le minisita, o le a taatia le fale atoa e lē talaina e avea ma taui. Peitai ua ese le tulaga ua tulai mai.
O le Aso Faraile, 12 o Aukuso 2011 na sainia ai e Pauli ma isi matai e toasefulu le maliega ma sui o kamupani o loo faatauina mai le nonu mo le faatauina o le fale ae teu ai le nonu e faigofie ona la‘u ane ai i le uafu ma aumai i Vaitele i le nofoaga o le kamupani o le Pure Pacific o loo saunia le sua o le nonu mo le auina i Saina.
O le faatauga o le maketi e lei faailoaina mai i se pepa o faamatalaga na faalauiloa ai le maliega pe fia le tau. Ae ua faailoa e se sui o le aiga o Pauli Falefia e $50,000 le tau ua latou iloa na faatau ai.
Ua ave le tusi a le loia o loo tauaveina le mau a Pauli Falefia ma lona aiga i sui o kamupani ua faaatauina le maketi ua taofia ai le faaaogāina o le nofoaga, ae se‘i sailiili atili vaega uma o le mataupu i tagata e ana le eleele ma le fale.
