Ua tuuina atu e le Pule Sili o le Lesitala foi lea o Faamasinoga o Fanua ma Suafa le tofa Masinalupe Tusipa Masinalupe, se poloaiga le tumau poo se Interim Injuction ua logoina ai le taofia o le faaaogaina o le suafa Tupu o le Gato‘aitele na faaee i le afioga Savea Sano Malifa i le Aso Toonai 21 o Iuni 2014.
O le savalia o le ofisa o faamasinoga e Alii ma Faipule o Afega na auala mai ai le poloaiga lea e le gata ina taofia le tumau ai le faaaogaina o le suafa seia vagana ua lesitala faaletulafono, ae ua faamanino mai ai foi nisi o faaiuga a le faamasinoga ua maea ona faia faasino i le faiganuu a lea afioaga, lea e tasi lava ae le lua.
O le mataupu lenei o loo va ai pea le fogavaa i totonu o le afioaga aemaise o nisi o vala o loo faasinoesea ai nisi matai e le o i totonu o le faiganuu.
Talu mai taumafaiga a tusitala e fesiligia se finagalo o le afioga Savea Sano Malifa poo le afioga i le Gato‘aitele e tusa ai o le solitu a Alii ma Faipule o lona nuu i lana faanofonofo aemaise o le tuualalo e taofi le faatinoina o le faanofo Tupu, e oo mai lava i le taimi nei e le o aumaia sona finagalo.
