Taofi e Magiagi le suavai mo nuu tuaoi i nisi taimi o le aso

Talu mai le amataga o le tausaga ua taofi e le afioaga o Magiagi le suavai e alu atu i Vaivase-Uta ma se isi vaega o Toomatagi mai i le itula e 6pm i le afiafi seia oo i le 6am i le taeao.
O se tuutuuga na vaaia ai ni feiloaiga i le va o le Pulega o le Suavai ma sui o le afioaga ona o le talosagaina o le faaauau ona sau o le suavai i le vaega o le talafatai o Apia peitai o loo malosi le manatu o le afioaga e pei ona taua e le Tofi le alii Pulenuu, ua faia lenei suiga ona o loo tau faasoasoa uma lava le suavai e le gata i afioaga tuaoi ae faapea foi i aiga o le nuu lava ia o Magiagi.
Faaalia e Tafili Misilei Fagamalo, o loo faasafua e le nuu le suavai ona o le tele o taimi ua na o sui lava o le afioaga o Magiagi o loo faavaitaimi le maua o le suavai, ae o loo saoloto lava le alu o le suavai i nuu tuaoi.
O le tulaga lea ua taumafai ai le afioaga ina ia faasafua le vai maua e aiga uma o lenei itu o le atu Vaimauga.
Faaalia e se sui sooupu o le Pulega o le Suavai, o le galuega o le faasoa o le suavai, o le matafaioi lea a le Pulega ae le o se galuega ea ua tuu atu i le afioaga na te faatautaia.
A fua i se isi tulaga ua solitulafono le nuu i le taumafai fua e fai i lana pule le faasoaina o le suavai i afioaga ua aafia.
Taua foi e le alii pulenuu o le isi lava mafuaaga o le faia o lenei tulaga ona na malepe nisi o paipa o loo sau ai le suavai mamā mai Alaoa o uta atu lava o Magiagi ona o le mafuie.
Na fai ma motusia ai le suavai e agai i isi afioaga o le talafatai o Apia e pei o Lelata faasolo ane ai i Motootua ma le agai atu lava i Malifa, Leififi e oo i Apia.
O le manaoga o le nuu na tapa ai se fesoasoani a le Pulega ina ia oo atu ni palama latou te toe faalelei ogapaipa ia peitai na taua e Tafili Misilei, o le tali na avane e agai le nuu o Magiagi e toe faalelei paipa nei ua faaleagaina.
“Ana le taofia le suavai agai i le isi itu lea o le taulaga e le malilie mai e agai faatasi le nuu ma ni tagata faigaluega o le pulega e toe faalelei ogapaipa nei,” o se faaaliga lea a le alii pulenuu.
“E lei faia ona o le manao o le nuu e pulea le suavai; leai ae ua foliga mai ua iai le manatu o a lava meatotino a le Suavai e leaga ae o loo i totonu o le nuu ona manatu lea ua tatau ona faalelei e le nuu ae e afaina ai aiga o isi nuu”.
O le faamatalaga a le tofi o lea ua toe faafoi le suavai maua ia Magiagi, Vaivase ma isi nuu uma ia na aafia i le faaleaga ai o ogapaipa ia ua maea nei se galuega tele na toe faaleleia ai.
O le mau a le alii Pulenuu o le galulue faatasi lava e mafai ai ona faamalie soo se faafitauli. O timuga foi o loo faaauau pea, ua vaaia ai le tele o le suavai maua ma ua faigofie ai foi le toe faasoasoa o le suavai i taimi uma o le aso.
O le afioaga foi lea o loo sau ai le suavai e agai i le afi o loo i Tanugamanono aua le gaosiga o le eletise, ma o se tasi lea faafitauli pe a utiuti le suavai o le taufao ai o le Malosiaga tau Eletise le EPC ma le Pulega o le Suavai i le faasoasoa mai o le vai taumafa aemaise le vai mo le eletise.
O le taimi nei o le tele o le taulaga o loo maua le suavai mamā mai i Alaoa ma vaega o Magiagi ae o le afioaga lava ia o Magiagi, e le o totogiina se suavai maua aua e le o vaimamaina ma e sau sa‘o lava i le vaitafe.