E masalomia le latalata i le ‘afa miliona tala le tupe ua leiloa a le toatele o le atunuu na agai i le ofisa malaga o le K&M Travels lea e pule ai Sanele poo Katie Moananu lea ua tapunia ai lona ofisa ma ua taofia ai nei Moananu i Tafaigata e faagasolo ai le mau tagi ua faia faasaga ia te ia.
O Katie e pei ona silafia ai e le toatele lenei alii, ua tuua‘ia i le taufaavalea ma le gaoi ae o lea lava e faagasolo le mau suesuega i tagi ua faaputuputu pea faasaga ia Katie Moananu ma lana aufaigaluega i le faatinoga o talosaga o visa poo pepa ulufale a le tele o aulotu faapea ai aufaigaluega na fuafua e agai i fafo mo galuega faavaitaimi.
Faaalia e le ofisa o Leoleo – o lea ua tapuni mo se vaitaimi le ofisa o lenei alii ae ua ave uma tusifolau a tagata ua saili atu i le ofisa o leoleo a o faagasolo ai le sailiga o tupe ua faamauina le leiloa ai ae ua lē faia le auaunaga o le talosagaina o avanoa e malaga ai i fafo i latou na talosaga.
E aofia ia i latou ua oo i le ofisa o Leoleo a latou tagi o ni aulotu se fitu ae e silia i le to‘a 200 tagata taitoatasi e lei tali atu le K&M Travels ia latou talosaga ae o lea ua mae‘a ona totogi le tupe. Ua tele lipoti ua faia faasaga ia Sanele Moananu ma ana faatautaiga o pepa malaga ma talosaga i taimi ua tuanai peitai e agai lava lenei alii i luga o televise ma taumafai e faasa‘o mai ai ni lipoti ua faia ma ta‘u ai lona lē faatino o le auaunaga ae ua faaaogā tupe a tagata.
E faapena foi la le masina na tea nei ina ua toe laga foi ni faagaulemalie a nisi o tagata o le atunuu i Leoleo ma o le mau a nisi na agai i Leoleo, ua leiloa poo ai o le alii pule ma lana aufaigaluega e sa‘o.
O lea foi la e taatitia tagi a le aufaigaluega o se alii ma se tamaitai ua faia faasaga ia Sanele Moananu ae ua fai foi se tagi a Moananu latou faasaga i lana aufaigaluega ia ua ia tuua‘ia na o la tapa seleni a tagata ma o le tele o nei tupe e lei ave sa‘o le lisiti i le taimi na maua ai le tupe ae ua sau le faatonuga i tagata talosaga e faatali se‘i toe agai atu e aumai a latou lisiti i se taimi mulimuli ane.
O le vaiaso la na tea nei ave sa‘o ai loa Moananu e Leoleo ma taofia mo le tālia ai o le tulai e tali i le tele o nei mataupu ua agai atu ai le mamalu o le atunuu.
O nisi o aulotu e pei o le aufaigaluega faavaitaimi mai Paia i Savaii lea ua mae‘a totogi le tinoitupe e $24,000 (tala) ia Moananu ma lona ofisa ae o lea ua tau agai ane e toe ave a latou tusifolau auā o lea ua maua e lei faia faatasi ni talosaga ma ua leai se tupe.
E lē gata i lea o se aufaigaluega faavaitaimi mai i se isi aulotu mai i Saoluafata faapea foi se isi aumalaga toatele mai i se afioaga o Fagaloa.
O le faamatalaga la a Leoleo a faaopoopo faatasi lava i latou e lei faatinoa ni o latou pepa malaga ae ua uma ona totogi tupe e oo atu lava i le $400,000 tala le tupe lea ua lē o toe maua ma o se tupe tele ua saili nei e leoleo poo fea ua agai i ai.
O le faamatalaga a le Ofisa o Leoleo e lē toe tatalaina le ofisa o lenei kamupani seiloga lava ua mae‘a suesuega a leoleo, peitai e lē o faatali foi le Ofisa o le Ekalesia Metotisi latou e ana fale ia na faamautu ai le ofisa o lea alii o Sanele Moananu, ona o lea e lei mae’a foi ona totogi le tele o pili o lea fale na faaaogā e lea ofisa mo ana galuega, ma ua agai foi la le Ofisa o le Metotisi e aveese uma meaafale ma totoga o lea ofisa ae faaavanoa le ofisa mo nisi faipisinisi laiti o loo moomia le avanoa o le maota lea i Matafele.
