Taofi e le Matagaluega o Aoga le fai o fafaga tetele i taimi o suega

Ua faagasolo suega a le fanau aoga i Samoa. O loo talosia uma e le atunuu suega eseese e amata mai i le fanau laiti seia oo lava i aoga maualuluga.
O le fanau i le Vasega valu (8) lea na amata i le vaiaso na tea nei a latou taumafaiga e saili ai aoga maualuluga mo le isi laasaga o le ola aoaoina. O loo faaauau i lenei vaiaso aemaise le masina atoa lenei o Novema.
E pei lava ona silafia e lo tatou atunuu o taimi nei e fai o le talosia ai o suega a fanau, ae o le isi vaitau lenei e vaaia ai le tele o fafaga e maau i ai matua o fanau o loo sue, o isi aoga e auai fafaga vasega uma o le aoga.
O le auala lava ua masani ai afioaga eseese aemaise aoga laiti nei e iai komiti o nuu o loo faatautaia. O isi lava matua ua matua la‘u ane i faleaoga fafaga e pei o suavai ma kuka o taumafa eseese e tali ai le sua a le au faisuega, faapea ai ma faiaoga ia ma sui foi o le komiti. O la‘uga e vaaia i aso taitasi, ua le gata i faisuega ae faapea foi nisi o faiaoga.
O le tausaga lenei ua vaaia ai se suiga. O lea ua suia fuafuaga sa talai mai i le lua vaiaso talu ai i fafaga a fanau. Ua taofi e le Matagaluega o Aoga faiga fafaga a aoga mo le au faisuega.
O lea foi ua na o fanau o loo sue ua talanoaina ai se fesoasoani mo se iputi ma se sanuisi a le au faisuega e tali ai le sua a o faagasolo suega a le fanau.
O le pulega foi la a alii ma faipule ua tapa e le Matagaluega e faamamalu ai nei suiga ma ia logo atu i Komiti o Faleaoga taitasi e taofi fafaga nei e vaaia i tausaga taitasi.
O le faamatalaga a nisi o pulenuu i le fono ma le Matagaluega o Aoga, o le tele o aoga o loo faia pea lenei tulaga ona o loo faatonuina lava e komiti ma faiaoga lea tulaga.
O isi taimi e pei ona maua i le faatalatalanoaga o lenei mataupu e matua ta‘i lava sua a le au faisuega. O lea la ua tapa le fesoasoani a pulenuu aemaise foi i le vaega o le Faafaleula lea e unaia le faamama avega i faatasiga a le atunuu ina ia laugaina lenei feau taua e ala ia latou polokalame faalauiloa.
O le talosaga a le Matagaluega o Aoga Taaloga ma Aganuu, o le vaiatu lenei o loo moomia lava e le mamalu lautele o le atunuu ni faamama avega, ae le o le toe faaopoopo atu foi o fafaga i matua. 
O le galuega foi a faisuega o loo totogi lava i itula faigaluega a le Malo. O le saunisi lava la ma le ipu ti o loo faapea ona faatalatalanoa e le tele o aoga i suega ua faagasolo nei.