“Sa tatau ona logo mai le vaega o femalagaiga i Samoa”
“E pule lava Amerika Samoa ia latou tulafono tau femalagaiga, ae sa tatau ona logo mai le ofisa o femalagaiga a le Malo o Samoa pe afai ua iai se fesuiaiga i aiaiga o pemita ulufale”, o le finagalo lea o le sui ofisa sili o le Matagaluega a le Palemia ma le Kapeneta i le vaega o femalagaiga, le susuga Togatalima Faafouina Milford, ina ua lipotia le faia o se suiga faanatinati i pemita e ulufale atu ai tagata mai Samoa i Amerika Samoa. O lea suiga na logoina ai kamupani vaalele ma kamupani vaa i Apia i le Aso Faraile 10 o Iulai 2009, ma le faatonuga e amata ai lava i le aso lea ona faamamalu le suiga. Ua le toe talia e le ofisa o femalagaiga a le Teritori ni kopi o pemita ulufale poo entry permits lea e masani ona fax mai i Samoa e aiga ma faauo o alaala i Amerika Samoa pe a manao e alu atu se isi mo se tafaoga, poo isi fuafuaga, e ese mai i au malaga e masii ona o faalavelave e pei o maliu, poo ni faaipoipoga.
Na faateia le vaega o femalagaiga a le Malo o Samoa i lea tulaga ona e lei logoina i latou. Peitai na faaalia manino e Togatalima Faafouina, atonu e iai ni mafuaaga lelei ua faia ai lea suiga i se taimi vave. Na ia taua nisi o faafitauli sa aliali mai i le toe tasui e nisi o faamaumauga o faamatalaga o loo i pemita e ulufale ai i Amerika Samoa, peitai na saunoa le ofisa sili lagolago o femalagaiga e lei maua lava se tagata mai Samoa Tutoatasi ua na faia sea tulaga solitulafono.” Ou te manatua e iai tagata malaga mai Asia sa afea Samoa ma le faamoemoe e faaauau atu i Tutuila, na maua ina ua taunuu i Pago Pago ua latou toe tasui faamaumauga, ae e lei maua ai lava se tagata mai lo tatou atunuu”, na saunoa ai Togatalima Faafouina.
O loo manatu le susuga Togatalima Faafouina o sootaga vavalalata o Samoa e lua e ao ai lava i se suiga faapea ona logoina mai i latou ina ia lava le taimi e logo ai tagata malaga mai Samoa e manaomia ni pemita ulufale. O atugaluga foi ia na faailoa e le alii Pule Sili o le kamupani vaalele a le Polenisia, le tofa Taua Fatu Tielu, ona e toatele pasese a le Polenisia na faaletonu a latou fuafuaga i le Aso Faraile, 10 o Iulai ina ua taunuu le tusi mai le ofisa o femalagaiga a Tutuila ma aumai ai ma le fautuaga e amata lava i le aso lea le suiga fou. E manatu le alii pule o le a tele feuiuiaiga aua o le a faatali se tagata malaga sei taunuu mai le pemita sao (original entry permit) ona faatoa mafai lea ona tuua Samoa. O lona uiga o le a alu se tupe e lafo mai ai, pe aumai i le uta a se vaalele mai Pago Pago, poo le sue o se tagata malaga mai Tutuila na te aumaia.
Toe foi i le faiga tuai
Ua toe foi nei i le faiga tuai o le fax mai o pemita ulufale mo tagata mai Samoa e fia malaga mo Tutuila, ma o se faaiuga a le Loia Sili a le faigamalo a Amerika Samoa, na ave i le faauluuluga o le ofisa o femalagaiga a le Teritori na toe taofia ai le suiga. Na mafua lea faaiuga ona ua faasea kamupani vaalele o le SPEX, Inter-Island Airways, ma le Polenisia, i le faia o se suiga e lei lava tapena i ai, aua le logoina o tagata malaga. O le Aso Lua, 14 o Iulai 2009, na aumai ai se faasalalauga mai le ofisa o le Loia Sili a Amerika Samoa ua faaalia ai ua faaaoga pea kopi o pemita ulufale o loo auala mai i le fax, ae o le tiute o aiga ma tagata i Amerika Samoa o loo lagolagoina se pemita poo le sponsor, le alu ane i le malae vaalele i Tafuna poo le uafu i Fagatogo ma le faamaoniga o le pemita (original copy of entry permit) ina ia taunuu le tagata malaga o loo iai mo le faamaoniga. A leai foi e momoli ane le pemita i sui o le ofisa o femalagaiga o loo tiute i le uafu ma le vaalele.
Ina ua aliali mai lenei faaluafesasi i suiga o pemita sa fia iloa e le vaega o femalagaiga i Samoa pe o lea faiga ua aofia ai ma aumalaga mai Samoa e fia malaga i Amerika Samoa i faalavelave e pei o maliu, lea e fesootai ai le ofisa ma le ofisa o le Loia Sili a Amerika Samoa mo le aumaia o le pemita e tasi o se aumalaga e auala mai i le fax. “Ou te fia maua se faamaninoga mai le faauluuluga o femalagaiga a le teritori pe lavea ai ma aumalaga toatele mo faalavelave o maliu, aua o le a atili faigata ai le faagaioiga o pepa malaga mo o tatou tagata”, na saunoa ai Togatalima Faafouina. E iai nisi ua latou faaalia e faapea, o le latou matau e foliga ua faafuafua lea faiga ma se suiga mo tagata malaga mai Samoa ona o le tauvaga a kamupani vaalele i le va o Samoa e lua, e pei ona toe tatala le malae vaalele i Fagalii mo malaga a le Polenisa i le va o Apia ma Pago Pago.
Faanoanoa le Palemia
O le aliali mai o lenei tulaga na faaleo ai se finagalo o le Palemia susuga Tuilaepa L Sailele Malielegaoi, o ia o le Minisita o femalagaiga a le Malo o Samoa i le faia e le faauluuluga o femalagaiga a Tutuila o ni suiga e aunoa ma le silafia e le Loia Sili a lo latou Malo, o loo iai le pulea ma le vaaiga o mataupu tau femalagaiga. O se taimi o le tausaga nei o le a faia ai feiloaiga masani a taitai o faigamalo a Samoa e lua mo talanoaga masani faavaomalo mo le talanoaina o mataupu e faaleleia ai auaunaga ma tautua a Samoa Tutoatasi ma Samoa Amerika, ma o se tasi lea o mataupu ua iai le talitonuga o le a talanoaina ai. O le tausaga nei o le a faia ai talanoaga e taua o le Inter-Samoa Talks i Pago Pago.
