Oti ina ua tanumia a o faigaluega

O se taimi laititi lava na le mafai ai ona vaai lelei le nofoaga na galue ai, lea ua uma ai le ola o se alii e 39 tausaga le matua o Vaiee ma Vaitele ina ua tanumia i totonu o se autu i galuega fai i Apia.
O le ua maliu na galue i le Kamupani o galuega tau auala a le Ah Liki Construction i Apia. O se galuega ua faatino ai le eliina o se alavai tele e sau mai i le nofoaga o loo fai ai se galuega mo ofisa tetele o le Malo i Savalalo. O le galuega ua oo ane i tuamaota o le Maota o Tina ma Tamaitai ma o faamatalaga a nisi o avetaavale sa tutu ai i lea nofoaga e faatali a latou pasese, na vaai atu lava ua solomuli atu le loli tele ma le uta palapala e iai ma ‘alā tetele sasaa loa le uta i le lua lea ua taatitia ai paipa. O le alii ua maliu sa i lalo ma na galue ai i le fesootaiga o paipa nei.
O le alii e faasinosinoina le sasaaina o le uta palapala ua le o iai i lea nofoaga. Peitai na faaalia foi e nisi o le paipa sima sa i le augutu o le lua lea na taavale i lalo a o iai le alii lava lea ua maliu. O le faamatalaga a le alii komesina lagolago o Leoleo o Papalii Taeu Masipa‘u, sei maea suesuega ma le taotoga o le alii ua maliu ona manino lea o le mea na tupu, sei vagana ai le faamaoniga sa i lalo i le lua le alii ae tulai mai ai se faalavelave ma maliu ai. O le alii foi na faatatope atu i le falemai peitai e oo atu i Motootua ua maliu lava o ia.
O si alii lenei e faaipoipo atu i se tamaitai o Faatoia ma sa nonofo i se fanua umia saoloto i Vaitele. E maea lelei lava le vaiaso e lei toe faatautaia ni galuega i lenei nofoaga ma ua amata ona agai i luga le suavai toa mai i timuga o le faaiuga o le vaiaso ona o le le toe lotea o le lua lenei ma ua le toe faatautaia ai ni galuega. Ona pau le isi faamatalaga ua oo mai o le tulaga lea i se meaalofa mai i le kamupani i le aiga o le ua maliu ona o le faalavelave lenei ae ua tele telefoni e tau saili mai se saunoaga a le kamupani e le o faamanuiaina lava.
Faaalia e le Alii Komesina Lagolago o Leoleo e le o iai foi nisi ua taofia pe molia i le faalavelave ona o loo faatalatalanoa uma i latou sa iai i lea nofoaga i le taimi na tulai mai ai lenei faalavelave.