Ou te fiafia e faitau i talaaga o tagata finau ua faamanuiaina, poo nisi sa tuivi ma ui mai faigata, ae tua lelei o latou taunuuga. O tala e faaosofia le lototele ma tutupu ai lagona taumafai ia siitia tulaga, ma fesoasoani e titina le paiē ae fatufatuai manuia ua uma na saunia e le Atua mo le tagata. O se faataitaiga o nei tala, o le soifuaga o le susuga ia Filipo Tevaga Sio, o loo faamatalaina i lana tusi e taua o le The Samoan Who Said Yes. E maoae le saili malo ma le faatamatane o lea tamalii o le atunuu, e ui sa feagai ma luitau faigata, ae sa faamuamua le miti ia manuia. Sa soifua tauivi ma filiga ina ia faia mea uma e tusa ma lona soifua faatuatua, ma iu ai i se tautinoga ola e luitauina soifua o tagata Samoa, aofia ai ma latou uma e faitau ma aafia o latou loto i le molimau a lenei tamalii.
O lo tatou olaga o loo siosiomia e le faavaivai ma tagata faavaivai gofie ma le lima lala‘u. E matananana ma fiafia puupuu toe solomuli gofie. E oo foi nei lagona ma manatu ia tatou uma i le tele o taimi, e aofia ai ma lo tatou ola faaleagaga. E tofotofoina e faigata, o le pogai lea o le tusia e le Agaga Paia o nei fuaiupu, e faamanatu mai ai le tatou savaliga, e lamatia e mala ma faafitauli, ae o loo iai nisi o tapuaia la tatou taufetuliga, o nisi sa mua i malae i le faatuatua, o tagata sa tauivi ma manuia, lea o loo matamata mai.
• Tapuaiga a le au faatuatua
‘O lenei’ (12:1), o i tatou foi, o loo vagavagaia, …’ O le upu ‘lenei’ o se upu soo upu pe sosooina ni parakalafa, e mai le gagana faaperetania o le ‘therefore.’ E na te faaauauina se manatu. O lona uiga, o le upu ‘lenei’ e faatatau i le mataupu e 11, ae faaauau e le 12, o loo iai le potopotoga o e o matamata mai e faapea na toatele. O ai latou nei? Latou nei o loo tusia i le mataupu e 11, pei o Aperaamo. Mose, Iosua, Iosefa ma isi. O nisi sa feagai ma faafitauli ma faasaoina, a o isi sa feagai ma faigata, ae lei faasaoina ai o latou ola, ae lei suia lo latou faatuatua. Fai mai le Tusi Paia, a faaosoosoina oe, pe feagai oe ma faigata, ia manatua e na muamua. A tofotofoina lou onosai, ia manatua Iopu ina ua feagai ma ma‘i faigata. A feagai ma faaosoosoga, manatua Iosefa. A oo mai le faavaivai, manatua Noa, e 120 tausaga o galue e fau le vaa ma faatalitali.
A o isi o loo tusia i le mataupu e 11, sa ililuaina i ili, o nisi sa saeia e manu feai, o nisi sa susunuina ma faaumatia o latou soifua, ae lei suia ai le faatuatua ia Iesu. Ia manatua latou, a o e iai i le taufetuliga, o loo patipati ma faalaeiau mai ma tapuaia lau taumoe. Aua le galo latou.
• Tapuaiga a tuaa
Le gata i le aufaatuatua o le Tusi Paia, ae aofia ai ma nai tuaa ua fai i lagi le folauga, o matua sa faatuatua ia Iesu, o iai faatasi i lea tapuaiga o vagavagaia le taufetuliga faaleagaga o loo tatou tamomoe ai. O loo faamalosi mai ma latou ina ia tau lau o le faamoemoe. Ia tatou manatua latou pe a siisii le tai o mala, ma fotuai mai afa fulifaō taufaamatau a le tiapolo e faavaivaia ai le faatuatua ia Iesu. Ua saofagā latou i le manuia, o loo faapea foi na matamata mai ma musumusu mai i tatou taliga faaleagaga, faamalolosi.
Pei o nai ou augatama o loo lagomau i le atu Niu Heperiti sa maliliu ai i le talaiga o le talalelei a Iesu Keriso, ma si ou tina ua maliu sa fai tatalo mo matou ia manuia. Ia manatua foi ma e o loo soifufua pea, o loo tatalo ma tuitui faitotoa o le lagi i le agapogi ma le tatalo, ina ia alofagia tatou. Manatua latou.
• Tamoe ma le onosai
E le gata ia tamoe, ae ia tamoe ma le onosai. O le taufetuliga e le faigofie, e iai maatui ma maagao, ma le anoano o maa faalavea aao. Afai e momoe ae aunoa ma le onosai, e faaafe e atua o le ala lau tamo’ega. Ae ia onosai, o le soifuaga faaleagaga pei se taufetuliga i se ala mamao. E faatusa i se marafoni, e manaomia le faamalosi ma le onosai.
• Taulai ia Iesu
Ia onosai, ma taulai le vaai ia Iesu o ia o le amataga o lo tatou faatuatua, o ia foi le taunuuga o lo tatou faatuatua. O ia na amataina le galuega lelei i totonu o tatou loto, o ia foi na te faaatoatoaina lea galuega lelei, ae ia onosai ma taulai ia te ia. E faigofie na aveese o tatou mata ma Iesu pe a tutupu faafitauli, ae ua apoapoai mai le Tusi Paia, ia taulai ia Iesu. E le taulai i se tagata poo se tapuaiga, e le taulai i se faalapotopotoga poo se aoaoga, a o Iesu.
Samoa e, ia faamalosia oe ona o isi ua muamua atu. Ae manatua, e faamalosia foi isi ona o oe ma lau momoe o loo fai nei. Atonu e te leiloa, ae o loo matamata lau fanau ia te oe. Poo au uo ma nisi o lou aiga. O loo faalogologo i au tautinoga. E faamalosia lo latou faatuatua ona o oe, e faavaivaia foi latou ona o oe.
Ae afai e tamoe ma taulai ia Iesu, ou te tautino atu, e fia tamomoe atu ai ma nisi ua faavaivai. Ae talofa, pe afai o lena foi e te faavaivai, ua e fai se faataitaiga leaga, e ola faapalapala ai foi ma nisi e pele ia te oe. Soifua.
