Talu mai le tausaga e 1869 – ua vaaia pea le finau o le afioaga o Vaitele mo lona faasinomaga.
O le afioaga muamua lea o Samoa na faatau uma e Siamani a o pulea le malo o Samoa i lea vaitau ona fanua.
“O isi afioaga e fai lava faamatalaga e tuaoi i le tuasivi pe a lumafale i le sami ae o Vaitele e matua leai lava se tuaoi i ni fanua faa-Samoa auā na faatau lava leai ma se fanua na totoe,” o le faaaliga lea a Toī Ioane, lea ua foi mai i le mae‘a ai ona galue ma tautua i atunuu mamao ina ia nofo i lona aiga ma ia toe faafoi le tausiga i lona aiga.
O le oo mai ai o lea tamalii i Samoa na amata ai loa lana ia finauga e pei foi ona faia e isi tuaa ua mavae o le afioaga mo ni fanua Samoa e mafai ona toe faafoi mai e le Malo mo le afioaga.
O le faaaliga a lenei alii, ua tele tausaga o taumafai mai si o latou afioaga ona o le manatu o “Vaitele o le nuu mavae, e iai ona faalupega ae o lea ua tau saili ni fanua e faamautu ai”.
O le Aso Gafua a le afioaga sa faia i le faaiuga o le vaiaso na tea nei, na lāgā ai loa le manaoga o Vaitele mo le oo atu i le Malo e toe talosaga foi le toe faamatuu atu o ni fanua mo tagata o le afioaga ua faaigoaina o Vaitele.
Ua iai le popolega o le nuu ua lē amanaia le faiganuu i lea itu o Faleata ma e talu ai o Vaitele ua faasino o se nofoaga mo pisinisi ma atina‘e eseese, ua atili ai le lē tausisia o tu ma aga faalenuu.
“E 29 eka ia na toe foi mai lea e nonofo ai tagata o Vaitele i le taimi nei ae o loo talosagaina lava fanua Samoa o le afioaga ina ia faamautu ai lana faiganuu.”
Faaalia e Toī, na ave e le Malo o Siamani ia fanua ma fesuiai ai i agaese ma apefai i ia tausaga.
O loo iai lava pulega a alii ma faipule o Vaitele ma o loo mautu foi ekalesia lotu ua faatutu ai i totonu o le afioaga ae o le mea moni ua tulai mai, o le toatele lava o le atunuu, ua fesootai lava Vaitele ma tulaga tau i atina‘e.
O le tele foi o ga‘uta o le afioaga ua faatau faafanua umia saoloto ma ua toatele le atunuu i ona vaega eseese ua maua ai fanua faatau i Vaitele. Ae o tagatānuu lava ia o Vaitele ia ua faamautu i fanua ia na toe faafoi ane e le Malo.
Faaalia e Toī, e lagona lava le faanoanoa ona o le lē mafai mai o sina vaega o nei fanua ua faatau e le Malo mo tagata o le eleele.
O le popolega tele foi ua faaleo e le afioaga o le itu lea, e leiloa lava i tuutuuga o le nonofo ai i Vaitele i le taimi nei, ona e ono iai ni fuafuaga a le Malo e toe aveese tagata nei mai i le 29 eka ua faamatuu atu – ona faanoanoa ai lea auā e lē mafai ona finauina le tulaga o loo iai le afioaga i le taimi nei talu ai o le eseese o le pulea ma le umia o fanua faatau ma fanua umia faaleaganuu.
“A tulai mai se tulaga e ono faapea ai le Malo e aveese matou, ona pau le talosaga e ave uma matou i Tafaigata i le toese pe faaui atu foi i le malo se talosaga e ala atu i le Malo o Saina latou te fau ai ni nofoaga i tai i le sami, se‘i mapu atu i ai lo matou nuu ae se‘i tau saili poo fea tonu lava o Samoa matou te omai ai,” o le faamatalaga lea a Toī.
E manino le tulaga faapopoleina o le afioaga ae o loo tālia pea se feiloaiga ma le alii Minisita o Punaoa faale-Natura ma le Siosiomaga mo se tali o le latou talosaga.
Ua tele galuega fou ua vaaia i le itu i gatai o le afioaga o Vaitele e pei ona amata ona faatutu ai pisinisi ma supamaketi ma o le popolega lea o nisi o Vaitele nei faalautele atu ia atina‘e ma toe faaaogā atu ai ma eleele ia na toe faafoi ane e 29 eka a o tautua ai Toī Aukuso o se sui faipule o lea itu o Faleata.
O se sailiiliga a le tatou pepa na maua ai ua iai le faatonuga a le afioaga o Vaitele i le pulega a Alii ma Faipule ina ia faatea ese ni aiga e silia ma le 10 (sefulu) i totonu o Vaitele.
O loo nonofo nei tagata i luga o fanua o le 29 eka e pei ona ta‘ua, ae e lē o ni tagata ua lesitala ai ia fanua.
O le mafuaaga la lea ua faia ai le faatonuga e tapena ese nei tagata ona o le tuutuuga o le nonofo ai i fanua nei, “e faaaogā seia maua ni o latou fanua e nonofo ai”.
O le faamatalaga a sui o le afioaga o tagata nei na aumai e nisi o matai o le afioaga ma mafai ai ona faamautu i nisi o fanua nei.
O lea la ua fia toe foi mai aiga e ana fanua, i latou ua lesitala suafa i fanua nei, ua mae‘a vaevae ma faamatuu e le pulega a alii ma faipule i aiga Vaitele.
O le mafuaaga la lena o le feiloai o le afioaga ona ua iai nisi o aiga sa faamautu lē tumau i nei fanua ua lē fia o ese e ui o lea ua manino lava o fanua nei ua umia saoloto ma ua lesitala i lalo o igoa o tagata Vaitele lava ia.
O le talosaga la ua tuu atu i le taimi nei mo nisi fanua se‘i faamautu ai ni fanua Samoa o le afioaga.
