Talosaga se ulugalii, sese moliaga o le taufaavalea

O Iuni o le tausaga e 2008 na faia ai se fefaatauaiga a le ulugalii o Jacinta le tina, ae o Ulofu Saifoloi le tamaloa, ma se tina e suafa ia Leilua, lea sa fuafua e faatau ai se fasi fanua e tusa ma le kuata eka. O Leilua ma lana fanau faapea lona tina ua matua le soifua, sa nonofo i se tasi o fanua i Tuanaimato, peitai na faatulai ese ona o se feteenaiga ma le aiga e ana le fanua, le mafuaaga na maua ai le mafutaga ma Jacinta ma lona toalua, ona e faafesagai le faleoloa o le ulugalii ma le fanua sa nonofo ai le aiga. O loo talia nei se faaiuga a le faamasinoga maualuga pe talia le talosaga a le ulugalii e toe apili pe toe iloilo le faaiuga a le faamasinoga faaitumalo, na faasalaina ai i laua i le toe totogi o se vaega tupe e $13,700 i le tina o Leilua i totonu o le masina, a leai ua nofosala i le falepuipui mo le umi e tolu tausaga.
Na mafua ona molia le ulugalii e leoleo i moliaga e 4 o le faia o ni gaioiga tau faasese poo le false pretense, ona o le tupe e $13,700 na amata ai ona faatau le fasifanua o le ulugalii, e lei mafai ona toe maua ina ua le manao Leilua e faaauau le fefaatauaiga ma Jacinta ma lona toalua. I le fofogaina o molimau a le ulugalii i le la talosaga e toe apili le faaiuga a le faamasinoga faaitumalo, na faaalia ai e Jacinta, o lo la alolofa ia Leilua ma lana fanau ma lona tina matua, na la ave ai ua nonofo i se fale o le aiga o lona toalua i se vaega o Lotopa, ma le faaupuga e nonofo totogi ai. Peitai o le tasi aso na alu atu ai Leilia e faatau i lo la faleoloa na fai atu ai ua manao e faatau se vaega o le fanua o le aiga o lona toalua e fau ai so latou fale ma nonofo ai. O le vaega tonu lea na amata ai loa tuugatala o le faatauga o le fanua, ma ave muamua ai loa e Leilua le $10,00 o se deposit o le tau o le kuata e tusa ma le $75,000.
E iai nisi tupe na toe togitogi i le toalua o Jacinta le tamaloa o Ulofu lea na maua ai le aofaiga e $13,700, ma le faaupuga a le tamaloa o lona tina e nofomau i Niu Sila o loo tusi ai le fanua, o le a malaga i Samoa ona vaevae lea o le latou fanua ma maua ai le kuata eka e faatau e Leilua ma lo latou aiga. Peitai na faaalia i taualumaga o le mataupu, na taunuu le tina o Ulofu ma tutuli ese loa le aiga ma le fale sa nonofo ai i Lotopa, lea na toe avane e Jacinta ma lona toalua ua latou nonofo faatasi i le vaega sa lisi ai i Tuanaimato ma fai le la pisinisi o le faleoloa. Na ioe le tamaloa o Ulofu i lana molimau e le o ia o loo tusi ai le fanua ae o lona tina, ma ua ia teena le faamatalaga tusitusia a Leilua ua tuuina atu i le faamasinoga e faapea, na ia faatoa iloa e le o se fanua o Ulofu ina ua taunuu lona tina ma iloa ai o ia o loo iai le pule o le fanua.
O le mafuaaga lea o le toe manao o Leilua e toe faafoi uma atu le seleni, lea na faamatala ai Jacinta i lana molimau na fai lelei a latou tuugatala ma Leilua o le a taumafai e togitogi pe tai $300 i le masina. Na matua teena e le fafine o Jacinta le faaupuga o le la moliaga e leoleo e faapea na la faavalea Leilua, i lana faamatalaga sa silafia lelei e le ua tagi vaega uma o le fefaatauaiga o le fanua aua sa la faamatala i ai. Peitai i le faamatalaga tusitusia lava a Leilua na fofogaina e le Faamasino Sili a o faafofoga le ulugalii o loo molia, o loo taua ai o le ulugalii lava na fai atu o le fanua o le fanua o Ulofu le tamaloa e aunoa ma le faailoaina atu a mea o le tina o le tamaloa o loo tusi ai le fanua. O loo faaalia foi e Leilua i lana faamatalaga tusitusia, o le ulugalii na tauanauina o ia e faatau le fanua, ma ua feteenai ma molimau a le ulugalii e faapea o ia lava na alu atu ma talosaga pe mafai ona faatau atu se vaega o le fanua e nonofo ai.
Talu mai le masina o Fepuari na lauina ai le faaiuga e lei uma ona totogi le $13,700 ae ua toe saili e le ulugalii se fesoasoani e ala i se loia e finauina le le sao o le moliaga a leoleo. O loo talia nei se iuga a le Faamasino Sili, afioga Patu Tiavaasue Falefatu Sapolu, pe talia pe teena le talosaga a le ulugalii e toe apili le faaiuga a le faamasinoga faaitumalo le District Court.