Talosaga Samoa faatu se ofisa Malo Amerika Samoa i Apia

Ua saunia le Malo o Samoa e talosagaina le Kovana sili o Amerika le tofa i le matua Togiola Tulafono, ina ia faatu se ofisa o le faigamalo a Tutuila ma Manu‘a i Apia e faigofie ai ona faatino fesuiaiga tau femalagaiga i le va o Samoa e lua. O le feiloaiga a tusitala i le Aso Faraile ua mavae ma le alii palemia susuga Tuilaepa Lupesoliai Sailele Malielegaoi, na ia faailoa ai lea fuafuaga e mafua ona o ni suiga faafuasei i le tauaveina o pemita ulufale mo tagata malaga mai Samoa e fia afea Amerika Samoa.
Faaalia e le palemia e lelei mafuaaga na faavae ai le suiga peitai ua fai si vave ma sa tatau ona tuu mai se lua aso poo le 48 itula e tapena lelei ai Samoa Tutoatasi a o lei faatinoina le suiga lea ua toe taofia, ae foi lava i le faiga masani o le fax mai o le kopi o le pemita ulufale, ae alu ane le tagata i Tutuila na talosagaina ma le pemita i le malae vaalele i Tafuna poo le uafu i Fagatogo. O loo iai le talitonuga o le a soalaupule atili lenei mataupu pe a feiloai taitai o Samoa e lua mo talanoaga masani e taua o le Inter Samoa Talks, lea o le a talimalo ai Amerika Samoa i se taimi o le tausaga nei.