Talosaga pisinisi tau turisi ua faaleagaina mo se fesoasoani

E atoa lelei le 32 o pisinisi i Samoa ua faatino le auaunaga tau i tagata tafafao maimoa mai i fafo, ua faailoa atu i le Malo le manaoga mo se fesoasoani ona ua faaleagaina a latou pisinisi i le galulolo.
O le vaiaso na tea nei na feiloai ai mo le uluai taimi le afioga i le Sui Palemia, Misa Telefoni Retzlaff ma i latou nei ua aafia atinae i le tsunami.
O le Sui Palemia ma sui o le Pulega o Faletalimalo, aemaise se ofisa faufautua ua taua o le KVA Consult faapea sui o le Komiti e tali atu i Faalavelave Faafuasei na feiloai ma le au faipisinisi ia e aofia ai pulega o faletalimalo ua faaleagaina, o i latou e faatautaia tafaoga a tagata tafafao mai ia latou vaa faapea ai foi taavale.
O kamupani taavale umia faavaitaimi poo Rental Cars, o faleaiga ma isi pisinisi laiti ua faapea ona lesitala uma o latou suafa i se faamaumauga na oo atu ma le Alii Sui Palemia ina ia mautinoa ai le seleni e tatau ona alu e fesoasoani ai i e ua faaleagaina uma auala sa maua ai tupe e tausi ai aiga.
O lea fonotaga na faalauiloa ai foi ma le KVA Consult. E afa miliona tala ($500,000) na maua mai ia Ausetalia e ala i lona Ofisa i Samoa nei mo le suesuega lea ua faatautaia mo vaiaso e lua e le KVA ma na taua e le alii Sui Palemia, o lenei suesuega e tatau ona maua uma mai ai faamaoniga o meatotino a nei atinae ua faaleagaina.
O le aso 26 o le masina o Oketopa lea ua faaalia e Misa e tatau ona maea ai le suesuega ma faataatia atu loa e le KVA poo le a tonu lava le tulaga o iai le faaleagaina o faletalimalo, apitaga tumatafaga faapea ai isi atinae ua taua le aafia.
Faaalia e le Alii Sui Palemia sei vagana ua maea ona iloiloina ma aumai foi fautuaga i le KVA i le Pulega o Tagata Tafafao Maimoa ma faamautu loa se isi gaioiga a le Pulega ina ia mafai ai ona maua le fesoasoani mo i latou nei ua siilima i mafatiaga ua fia maua ai se faamama avega.
O le taimi lenei ua tatala foi e le afioga i le Sui Palemia pisinisi ua amata ona faia galuega toe faalelei ina ia logo atu le Pulega e mafai ai ona aumai le lagolago e ala i faamaoniga o nonogatupe i faletupe mo le faatinoga o nei galuega.
Faaalia foi e Misa afai o iai se pisinisi e le maua i Samoa le tomai aua nisi o galuega faapitoa i faletalimalo ona logo mai lea o le Pulega o Tagata Tafafao Maimoa, aua e mafai ona fesoasoani mai i le aumaia o i latou e faatino ia galuega.
O le suesuega e pei ona taua e le alii Sui Palemia o le a fafau mai ai se talosaga mai ia i latou lava ia e iai atinae tau tagata tafafao ua faaletonu ona o le galulolo.
Ua iai foi nisi nofoaga ua amata lava ona vaaia le toe faatino o galuega e toe faaleleia ai.
O le faletalimalo o le Sinalei Reef Resort lea ua folafola e le Afioga Tuatagaloa Joe Annandale o le a toe tatala lenei faletalimalo ia Novema.
O se tasi lenei o faletalimalo na matua manino le faaleagaina i le mafuie faapea ai le galulolo na mulimuli mai ai. E le gata i lea ua lipotia atu foi le toe amata o galuega toe faaleleia o le Apitaga tu Matafaga, o le Foafoa Beach Fales. O le Coconuts Beach Resort le isi faletalimalo tu matafaga i Maninoa i Siumu na iloga le faaleagaina ma ua amata foi galuega toe faaleleia ona o le toatele o tagata tafafao mai ua vaaia nei le toe gasolo atu ae e lei maea lelei le galuega tele o le toe faamama ma le faaleleia o nofoaga ua aafia ona o le galulolo.
E i le va o le 88-90 pasene o faletalimalo ma isi pisinisi e fesootai ma lenei atinae tele o tagata tafafao mai e lei aafia a latou meatotino i lenei faalavelave faalenatura ma o fale ia ua taulai i ai le faalauiloa i le taimi nei ona o le manaoga o le Pulega e pei ona saunoa i ai le alii Sui Palemia, e matua moomia lava le fesoasoani ia Samoa i le taimi lenei. E lei leva atu le galulolo ae o nisi o matafaga e pei o le Paradise i Lefaga ua vaaia le tumutumu ai o tagata tafafao i Aso Malolo mo le fanau – na sau lava le galu ma aumai ai ma le oneone mafiafia paepae ma atonu ua aafia isi nofoaga ae ua avea lea galulolo ma tulaga ua tele ai se faaopoopoga o matafaga i nofoaga e pei o Matautu Lefaga ia ua matua manino le tele o le eseesega ua iai nei le vaega tu aai lea o le afioaga.
O le itu i Lefaga ma Safata ia na laititi se aafiaga i galulolo ae ua vaaia le tele o le faaopoopoga e pei ona taua i le oneone ua foliga mai ua lautele atu ai matafaga nei. Mo Lalomanu e manino e umi lava se taimi ona faatoa mafai lea ona toe foi i foliga sa iai i le tumutumu ai o tagata tafafao, ae o galuega toe faaleleia ua amata vaaia nei i le aai.