O le aso Lulu o le vaiaso nei e tuuina atu ai le talosaga tusitusia a loia a le Malo o loo tauaveina le itu a leoleo i le su’esu’ega o le maliu lilo o pepe e toalua poo le inquest, o loo i luma nei o le faamasinoga.
Ua manao le itu a leoleo e ave le su’esu’ega o le maliu lilo e fai faatasi ma le faamasinoga o tausi soifua e to’alua ua molia i le fasioti tagata pa’ivalea faapea moliaga o le taumafai e nana le faia o le amiotonu ma le moliaga o le faatamala.
O loo finau le loia a matua o pepe na fano ola e le tatau ona su’esu’eina faatasi ona e eseese ia vaega e lua.
Peitai o le su’esu’ega a le komisi su’esu’e na amatalia i le vaiaso ua mavae ua finauina ai e le sosaiete a tausi soifua, faapea le auaunaga tau soifua maloloina ma le asosi o foma’i le tatau ona toe faaauau le polokalame o tui puipui o le fanau. Na faaalia e le alii foma’i le afioga Tagaloa Robert Thompsen i le folasaga a le matagaluega o le soifua maloloina, ua iai fanau ua maua i aafiaga o le ma’i o le tale vivini ma o lea faama’i e mafai ona togafiti i tui puipui.
O le faavae lea o le manaoga o le matagaluega ua tatau ona toe fai tui puipui ona o lea ua silia i le lua masina o taofia tui puipui uma e aofia ai le tui mo puipuiga o faamai o le rupela, misela ma le mami. Na fesiligia e le taitaifono o le komisi su’esu’e le tofa Tuiloma Neroni Slade le sosaiete a tausi soifua ma le matagaluega o le soifua maloloina poo iai se gaioiga e toe iloilo ai le faiga o tui puipui aemaise o le toe taumafai e faatumau le talitonuina e tagata o le atunuu aemaise o matua o le polokalame o tui puipui.
O le tali a le alii foma’i o Tagaloa faapea le pelesetene o le sosaiete o tausi soifua ua taoto taiala o le faatinoga o tui puipui ma oni taiala o loo malutia ai vaega uma o le polokalame.
O le su’esu’ega a le komisi na ma’ea i le aso Lulu ua mavae ma le faamoemoe e toe faaauau ise taimi pe a taunuu lipoti o su’esu’ega o loo faia i vaega o tino o pepe na maliliu.
Ua taunuu le lipoti o su’esu’ega i le ta’otoga faapitoa peitai e lei faalauiloaina le taunuuga o lea su’esu’ega. O le faatinoina o tui puipui o fanau ina ua amata i le vaitau o le tausaga e 1970 sa feagai lava ma tausi soifua, ma o le tulaga lava lea o loo iai ile taimi na tupu ai le faalavelave i fanau pepe ua fano ola.
Na faaalia i le folasaga a le sosaiete o tausi soifua sei vagana ua iai ni tulaga maaleale e tulai mai ile faiga o tui puipui ona faato’a tapa lea ise tagata e iai ona tomai ose foma’i o galuega tau soifua maloloina.
