O le fonotaga talu ai nei a le Palemene na faaleo ai e le taitai o le Itu agai, afioga Palusalue Faapo II, se talosaga i le Palemia ma le Malo ina ia silasila i se tulafono e amanaia ai le kapeneta agai a lana vaega faaupufai.
O faiga ia a Malo malamalama ma pulea i taiala faatemokarasi e pei ona saunoa ai le taitai o le Itu agai i le maota fono.
O le kapeneta agai o loo lausilafia i le ta‘uga faaperetania o le shadow cabinet, ua iai faipule ua tofia latou te vaaia mataitu ma vaavaai i le faatinoga o galuega a matagaluega eseese a le Malo, aemaise o le mataitu o tiute o Minisita o le kapeneta a se itu faaupufai o loo tu i le foe i le pulea o se Malo ma se atunuu.
O itu agai i tausaga ua alu ma paeaiga faapalemene ua mavae, e lei faia ai ni kapeneta agai, ae o le tulai mai o le Tautua Samoa ma maua ana sui faipule lagolago e 12 ina ua mae‘a le palota tele ia Mati 2011 ma mae‘a foi faamasinoga o tagi o le palota, na faato‘ā faatino ai lea tulaga faaupufai o malo i Samoa.
O le faatalanoaina o le taitai o le Malo i le Palemia susuga Tuilaepa Lupesoliai Sailele Malielegaoi, i le vaiaso ua mavae i luga o leitio, na fesiligia ai i le talosaga a le Itu agai mo se tulafono e amanaia ai lana kapeneta agai. O le finagalo o le Palemia o togafiti lava mea uma, ma o gaioiga lava ia e faia e vaega faaupufai.
Ae o lona lagona o se isi taumafaiga e siitia ai totogi o faipule o le Itu agai, auā a fai loa le tulafono e amanaia ai o le tulaga lea e oo i ai.
E lei maoti se finagalo o le taitai o le Malo pe fai pe leai se tulafono. O paeaiga ua mavae a le Palemene sa taape ma salalautasi ai itu faaupufai sa agaia faigamalo ua mavae a le HRPP.
O ia faaletonu sa feagai ma le SNDP sosoo ai ma le SDUP, sa lagona ai ni lagona faaalia o nisi o faipule o le itu a le Malo i lea vaitau, i le tatau ona faamaopoopo lelei le Itu agai ma fai se latou kapeneta agai.
Lea ua faatino ina ua tulai mai le Tautua Samoa ae ua fetaiai ma se luitau ona e lē o ma‘oti mai se finagalo o le Malo i le alii Palemia, pe na te lagolagoina le isi o se kapeneta agai.
O le aso 20 o Iulai 2012 o le a toe tauaofia ai le Palemene mo le filifilia o se Ao o le Malo mo le isi lima tausaga o le nofoaiga mo lea tofiga taualoa ma maualuga o le Malo ma le atunuu.
E iai le matega atonu o le tauaofiaga lea o le a toe saofia ai le talosaga a le Itu agai mo se tulafono e amanaia ai lana kapeneta agai.
