O le tumutumu o le faletifaga o le Apollo i Savalalo – o se vaaiga ese. E lē masani ai Samoa i le tulaga lea o le faalauiloa aloaia poo le faia o se sauniga e tatala aloaia ai se ata ua taunuu mai i Samoa ma o le a faalauiloaina. Peitai ua faaopoopo lava le numera o ata tifaga ua mafai ona faalauiloa faapea.
O le ata fou lava la o le toatele foi lea o tagata ua molimauina le agai e maimoaina ia faamoemoe.
O le vaiaso na tea nei na faaali ai le ata tifaga o le Sione’s Wedding i lona vaega lona lua.
Ua lima tausaga talu mai le faaaliga o le uluai vaega o lenei ata tifaga, ma sa iai tagata i lea faaaliga ae e matuā lē tutusa lava ma le tumu na iai le po o le Aso Lulu lea na tatala ai le vaega lona lua.
E pei o vaaiga e masani ona molimauina i fafo e pei foi o Niu Sila ma Amerika, o le kapeta lanu mūmū ua fofola ma le tumutumu o le lautele o le atunuu e maimoaina le taunuu atu o alii ma tamaitai na faapea ona iai i le ata tifaga lea.
O le tamaitai o Teuila Blakely na taitaia atu le solo a i latou o alo o le atunuu i Niu Sila faapea ai isi sui o le Pasefika o loo i totonu uma o lenei ata tifaga.
O le eseesega ma le tatalaga o tifaga i fafo, o le itu lea, e tatau lava ona faia se sauniga lotu ma na puupuu le sauniga ae na ave ai lava le faatāua i le maualuga ua iai faamanuiaga a le Atua i fanau a le atunuu ua aumau i atunuu i fafo.
O le alii Palemia, le Susuga Tuilaepa Lupesoliai Sailele Malielegaoi, na ave i ai le faaaloalo e saunoa i le tatalaga o lenei ata tifaga ma o le faamatalaga a le alii Palemia, o faamanuiaga nei ua maua e fanau a Samoa ma le Pasefika e ala i le tomai ua maua ai galuega i ata tifaga ma polokalame a televise, e na o le faafetaia lava ma na ia talosagaina ai i latou na tuufaatasia ma pueina lenei ata tifaga ina ia vaavaai i le agai mai i Samoa i le isi vaega o le ata tifaga lenei.
Faaalia e le Alii Palemia o le tele o ata tifaga faapea e pue ma faaali, o le tele foi lea o le avanoa e faalauiloa ai Samoa i atunuu i fafo.
E ui o Niu Sila na faia ai lenei ata tifaga ae o loo tele lava vaega o le ata o loo faailoa ai tu ma aga faa-Samoa ma o le aumai o lea ata tifaga i le atunuu na ta‘ua e le Alii Palemia, o le Minisita foi lea o tagata tafafao maimoa mai i Samoa, o le a toatele ai foi tagata mai i fafo e fia asiasi mai i Samoa nei.
Ua tele ata tifaga ua agai mai i Samoa mo le pueina e pei ona iai Le Tulafale poo le Orator lea na tuufaatasia ma pu‘eina i lalo o se fesoasoani a le Atina‘e o ata tifaga a Niu Sila.
Na faapea foi ona molimauina le sosoo ai ona pueina o le polokalame lauiloa a Amerika o le Survivor Series ua agai mai i Samoa e faatautaia ai.
O le maua ai o galuega ma le faaaogā ai o mataaga o le atunuu aemaise o isi auala e tele auā tupe maua, o mafuaaga ia o le unai a le taitai o le Malo ina ia mafai lava ona faaaogā Samoa o se nofoaga mo nei atina‘e.
Na mae‘a le sauniga ona tatala lea o fale tifaga e lua o le Apollo mo le faaalia o lenei ata tifaga ma e lei umi lava ona faatumu nofoa e 1040 o ia fale tifaga e lua.
O le toatele na faatalatalanoa i le mae‘a ai o le uluai faaaliga o le ata lenei na o latou ta‘ua le mālie ma le faigofie ona fesootai i le tele o le mau mataupu na laga ai i le ata tifaga lenei.
Faaalia e alii na tuufaatasia lenei ata o le a vaavaai i se auala e mafai ai ona tali atu i le talosaga ua tuuina mai e le Alii Palemia ma e faamoemoe lava i le tupe maua ma le tagata o loo tusia lea tala, le alii Samoa o Oscar Kightley.
Ua faagasolo nei ona faaali lenei ata tifaga i Apia i lenei vaiaso.
