
Ua talia e le faamasinoga se talosaga a le afioga i le Minisita lagolago le Faipule o Faasaleleaga Numera 4 le afioga Peseta Vaifou Tevaga e ala atu i lana loia, ina ia soloia ma talepe moliaga a leoleo.
O le talosaga lea na tuuina atu e le tamaitai loia le afioga Leulua‘ialii Olinda Woodroffe, ina ua tulai le afioga Peseta i le amataga o le vaiaso talu ai e tali i moliaga o le faia o ni gaioiga solitulafono i faamaumauga o le au faisea ma faatonu o le kamupani nonu o le Local Partners and Associate.
Ua mae‘a ona faaalia e le loia le teena e le Minisita lagolago o ia moliaga e lua, peitai i le talosaga mo le soloia o moliaga o lea sa naunau le tamaitai loia e vave faia se iloiloga a le faamasinoga i le talosaga ona o loo iai fuafuaga a lē o loo molia mo le faaiuga o le tausaga e pei o le malaga i fafo.
Peitai ona o le tele o isi galuega a le faamasinoga ua tuu atu ai i le aso 19 o Ianuari o le tausaga fou e suesueina ai le talosaga a le alii faipule. Ua faamataali atu e le loia a Peseta i le faamasinoga, o le talosaga lenei o le a tuu atu ai ni mau e lagolago ai le mau, e lei uia e leoleo ma le Loia Sili a le Malo auala e faia ai ni suesuega o ni moliaga faasolitulafono.
O le taimi nei o loo suesueina e leoleo le tagi a Peseta Vaifou faasaga i le Fofoga Fetalai o le Palemene, ma o le feiloaiga a tusitala ma le Sooupu o le matagaluega o leoleo i le vaiaso ua mavae na faaalia ai o loo faia pea ia suesuega e lei mae‘a. E leai foi ni moliaga ua faia.