Talosaga le Malo i tama e atinae le lau‘ie

O le talosaga ua tuu atu e le Malo i le Fono a Pulenuu o Samoa i lenei masina ina ia amata ona agai i fanua o afioaga e atinae le lau‘ie. 
O le laau ua tele ina toe atinae ona o le faamalosia ai o le Ie o le Malo aua le faaaogaina i lenei vaitau.
O le tele o mafutaga poo komiti a tina i le atunuu ua toto lava a latou toga lau‘ie ina ia mautinoa e lava le laufala e lalaga ai le iniini poo le ie sae.
Ua faaalia e le vaega o loo vaaia le toe fotuai o le Ie Samoa e fai foi o le unaia o lenei measina a le atunuu ae e moomia le lava o le laau e faatino ai lea galuega.
Ua iai foi fuafuaga a le Matagaluega o Tina & Tamaitai, Atinae o Nuu ma Afioaga ma Agafesootai, ina ia amata atu i le tausaga fou ona faasa le toe faaaoga o laupaogo faapea laufala malo mo le lalagaina ai o le Ie Samoa.
O le a faamautu ia tulaga i asiasiga a le Matagaluega i Komiti a Tina uma o le atunuu e vaavaai i falelalaga o loo faatautaia, ina ia mautinoa afai e faaaoga le laupaogo ma le laufala, ia faaaoga e lalaga ai fala lilii, papa ma papa laufala, ae o le Ie Samoa lava ia ua faamalosia nei le faaaoga na o le lau‘ie aua faalelegapepe o loo sauni atu foi i ai tina i le lumanai.
O le Malo lava na amata ona unaia le toe fotuai o le Ie Samoa, lea foi e faaigoaina o le iniini ma le ie sae ma o le mafuaaga o lea manaoga ina ia tuuitiitia ai le lalaga ua matua taatele i tausaga ua mavae.
O le tele o afioaga ua faamalosia na o ie tetele ua faaaogaina ma ua le toe faatagaina lava le faaaoga o lalaga.
Talu ai la le malosi o le tulai mai o falelalaga i afioaga eseese, o lea la ua faaopoopo atu i ai ma le fesootaiga a le Matagaluega i Atinae o Nuu, poo le vaega o le Lotoifale e tāpā ai le lagolago a alii ma faipule o nuu taitasi.
I le fono a Pulenuu na talosagaina ai tamā ina ia amata loa ni atinae o lau‘ie ma o le a asiasia foi e le matagaluega ia atinae i masina taitasi ina ia iloa ai le tele o le lau‘ie o le a mafai ona faaaoga e tamaitai ia latou falelalaga.
O le taimi lenei ua oo atu i le $40 i le $50 i le taaiga lapoa o le lau‘ie pe a faatau i le maketi ma o le tele lava o lau‘ie lelei e oo lava i le $100 i le taaiga.
O le tapu la e pei ona folafola e le matagaluega mo le tausaga fou, lea o le a le toe faaaoga ai le laupaogo ma le laufala e toe lalaga ai se Ie Samoa, o le a mafai ona faamalosia pe a mautu togalau‘ie i totonu o le atunuu.
O le mafuaaga foi lea o le faamalosia o le sui o le Malo – o se tofiga ua ave i tamaitai o afioaga e filifili i ai Komiti a Tina ma Tamaitai ina ia vaai le tulaga o iai le Ie Samoa ma lona lalagaina i nuu taitasi.
O le sui o le Malo e fesootai i ai tina ma le saofaiga a alii ma faipule.
O le tele foi o afioaga ua malosi ai lava le faamalumaluga a alii ma faipule ma o le isi la lea vaega o le latou lagolago, ua talosagaina ai lo latou sao i le atinae ma le totoina ai o le lau‘ie. 
Sa iai nisi pulenuu na laga le toe tuu atu foi o ia atinae i alii ma faipule ae le taatia lea tulaga i tamaitai aua o i latou lava o loo nafa ma lea faiva alofilima, ae na faaalia e le toatele, e ui lava i atinae nei o loo taulamua ai tamaitai, o loo iai lava le lagolago a tamā poo alii, ma e leai foi se eseesega ma le atinae fou lenei.
O le faaiuga o le vaiaso na faamanatu ai le Aso o Tama o Samoa i se sauniga na faatautaia i le Maota o le Tuutuuileloloto i Apia, ma o le mafutaga lea na toe faamautu ai lenei atinae fou.