“Ua galulue le komiti mo se isi avanoa o Alai‘asa Filipo”…Savea Sione
O tuuaiga o faatosina faaalatua na faamaonia faasaga i le afioga Alai‘asa Filipo S Hunt, sa tuuaia ai nisi o lana komiti sa taitaifono ai le tofa Savea Sione o se matai o Falefa.
O le finagalo o lea tamalii sa faailoa i se tasi o leitio na ia faailoa ai le savalia e le komiti o le alii Palemia ona o le fia ave o se tuualalo i aiaiga o le tulafono o faiga palota. E fasino lea i le tulaga o le lē agavaa o se tasi e faamaonia ni moliaga o faatosina o le palota e toe tauva ai i le tofi faipule mo le lima tausaga.
O le naunautaiga o le komiti e pei ona saunoa lava Savea i lea ualesi faasalalau, ia toe silasila ma tagai lelei le Malo i le tulafono o palota ma aiaiga ua tapunia ai le tulaga agavaa.
O loo naunau le komiti ia toe maua lava se avanoa o Alai‘asa a lē o le palota laitiiti, poo le palota tele o le 2016. E leai se isi o i latou ua aafia tofiga faipule i faaiuga o faamasinoga o le palota e lē o fesiligia aiaiga o le tulafono o faigapalota. E pei foi i le afioga Vaai Papu ua faaalia sona finagalo e tatau ona toe silasila i aiaiga o le tulafono i le itu i le aganuu faasamoa lea e ave ai se tupe i se tagata ona e iai le mafuaaga tatau faapei o se faalavelave, poo se meaalofa i se pasese pe faatau ai se taumafa.
“Silasila foi i le itu i taumafa, o tatou o Samoa a iai loa ni mea e fai, e lē tuua lava le saunia o taumafa, ae ā pe a oo i le lua masina fai se palota, e matuā faasā lava”.
O le finagalo o Vaai e tatau ona amanaia e le tulafono le aganuu a Samoa, ae lē o le faataga i aso uma ae oo loa ina o le a fai se palota e saili ai sui o le Palemene ona faatapulaa lea o le taimi e faia ai lea masani i le aganuu.
O loo atugalu nisi o sui sa fia tauva i le palota i le aso 4 o Mati 2011 i le lē agavaa ona tauva ona e lē atoa aso o le tolu tausaga e tatau ai ona mau i Samoa.
O nisi foi sui sa fia tauva na lē mafai ona e leai ni monotaga o faia i totonu o faiganuu. Sa fesiligia foi lea aiaiga e le toatele ona e iai i latou e leai ni monotaga ae o loo fai mea faalelotu ma o atu foi e osiosi o latou aiga i faalavelave tetele e pei o maliu ma tuumalo poo isi faalavelave masani o le atunuu.
O vaega ia faatasi ai ma le faasalaga pe a faamaonia ni moliaga o faatosina o loo tatalo nisi ua tatau ona toe silasila i ai le Palemene pe talafeagai ona toe faia i ai se suiga.
