Ua teena e le tamaitai faamasino o le Faamasinoga Maualuga i Apia, le talosaga a le loia o loo tulai mo Kolani Junior Lam lea o loo tuua’ia i lona fasiotia o lona toalua o Sa’u Justina Fiapa’ipa’i Sa’u Lam, mo le toe tolopoina o le suesuega a le faamasinoga, ae saili mai le tagata e iai lona tomai faapitoa e molimauina le tulaga na iai le mafaufau o Justina.
Na manino le saunoaga a le faamasino, Niava Mata Tuatagaloa, i le talosaga a le itu tetee ina ua mae’a le malologa, lea na saunoa manino ai Niava e teena le talosaga.
Saunoa Niava e lē o agavaa le talosaga a le loia i lalo o vaega o le Tulafono o Soligatulafono 47, 51 ma le 97, o loo manino ai e leai se malosiaga faafaamasino e faataga ai ona toe tolopo taualumaga o le faamasinoga pe afai e lei faia se faaaliga i le faamasinoga a’o lei amataina suesuega a le faamasinoga.
Saunoa Niava, o loo manino lelei le tulafono, na lava le taimi o le loia, e faaulu ai le latou talosaga a’o lei amataina le suesuega o le mataupu.
Ua faatulaga mai loa e le faamasino le aso 4 o Novema e tatau ona oo atu i ai ua tuuina atu folasaga a loia i le faamasinoga. O le aso 7 o Novema ua faatulaga e folasia ai i le faamasinoga folasaga faaiu a loia, a’o lei tuuina mai le faaiuga a le faamasinoga.
O le Aso Lua lea na tulai ai le toalua faapouliuli a Kolani Lam, le tamaitai o Aiva Kalati, ma ia ta’utino i le faamasinoga mai i le sefulutasi o tausaga talu ona nonofo ma Kolani, e lei oo lava le lima o Kolani ia te ia.
Na ia faaalia foi, na polomisi atu lava Kolani ia te ia, e lē oo atu lona lima ia te ia. Na ia faamatala uiga o Kolani, o se tagata alofa, e alofa faamaoni i lana fanau, ma ia tausi faamaoni i lana fanau, e na te faamuamua le la aiga, ma e manao lava ia maua le filemu i le la aiga.
A oo ina la feeseeseai, o Kolani lava e iai le fofo e foia ai le la faafitauli ma toe sologa lelei ai le la mafuataga.
Peitai ina ua fesiligia e le loia a leoleo, afioga ia Magele Leone Su’a-Mailo le lē tutusa o lana molimau ma le molimau a Kolani i tausaga na tetea ai, na faaalia e lea tamaitai e sese le faamatalaga a Kolani. O le mau a Kolani o le 2014 na lē toe nonofo ai ma Aiva, ae fai mai Aiva o le 2015 na lē toe nonofo ai.
Na fai mai Aiva ina ua fesiligia e le loia a leoleo, e lei fasia lava ia e Kolani, ae ina ua tu’i fesili e Magele, na ia toe ta’utino ai e faatasi lava le taimi na fasi pe po ai o ia e Kolani, ma o le po a Kolani, na mao, e lei fuafuaina e Kolani lana gaioiga.
“E pau na o le taimi na oo mai ai le lima o Kolani ia te au.” “E lē mafai ona ou faapea atu a mea o le fasiava le mea lena, auā e na o le faatasi ona oo mai le lima o Kolani ia te au, o le fasi ava, o se gaioiga e tupu i aso uma.”
O Aiva o se tasi lea o mafuaaga o le vevesi o le ulugalii a Kolani ma Justina. O le tele o molimau a leoleo e aofia ai le Babysitter, ma le tama a Justina i lona toalua muamua, na o latou faaleoina o se tasi lea o mafuaaga o le vevesi soo o Justina ma Kolani i le tele o po. O le molimau a le babysitter o Meaalii, e na te matauina, e amata o fiafia inuga a le toalua ae faamae’a ane ua vevesi.
O le molimau foi a Meaalii lea na fai, e faapea o le tele o taimi e malaga ai Justina i ana malaga faalemalo, o taimi foi na e vaaia ai le tino o Aiva i le fale o Kolani i Sinamoga, e fai ai inuga pia a Kolani ma Aiva, ma Sio le alii teu fanua, na te lē iloa poo le ā le taimi e uma ai inuga ona o le taimi lena ua leva ona momoe ma tamaiti.
Na molimau foi le tuafafine o Kolani o Fuapepe Lam, lea na ia faaalia o ia e aupito sili ona latalata le la va ma Justina, ma o ia foi e tele ina nofo ai Justina pe a malaga atu i Niu Sila. Fai mai Fuapepe, e na te manatua lelei le isi la talanoaga ma Justina, lea na ia fai atu ai ia te ia o ia ua fiu i lana tama o Talei ona o le pepelo o le teineititi ma la’u faamatalaga i lona aiga i Apolima, lea e ala ai ona lē fiafia le aiga o Justina ia Kolani. Faaalia e Fuapepe, e iai foi le isi malaga a Justina na alu atu ai, na faailoa atu ai e Justina ia te ia, na togi lona ulu e Kolani i le tipoti peitai e lē ila ai, ma e lē afaina tele.
Faaalia foi e Fuapepe, e na te manatua e iai le taimi na malaga atu ai Justina, ma e lei tutusa lana vaai ia Justina e pei ona masani ai, o lana vaai ia Justina e pei e iai se mea e mamafa i lona mafaufau, ma e fesili atu i ai poo lelei mea uma ae tali ane Justina, ua faalē lelei foi le la faasoa ua tele le mau mea.
Faaalia e Fuapepe e iai le taimi na vili atu ai Justina, peitai, na te lei taliina ona o lona pisi tele i lana galuega ma e na te lē iloa pe aisea na ala ai ona vili atu.
O le vili atu a Justina o le vaitau tonu o le faailogaina o le aso fanau a le tama a Justina o Julani.
O loo faaauau pea ona taofia Kolani i le vaaiga a leoleo seia maua se iuga o lona faamasinoga.
