Talosaga faifaatoaga ‘ava mo se ponesi mai i le Malo

O se talosaga lea ua faaleo e se tasi o faifaatoaga ‘ava i Samoa i le toe tatala ai o fefaatauaiga o lenei oloa mai i Samoa ma le Pasefika atoa.

O Mau‘u Siaosi Puepuemai, o se faipisinisi ua lauiloa i le fale‘aiga o le Georgie’s Pizza ma le kamupani taavale totogi aso poo taavale rent. O ana pisinisi nei na amata ona faatupe e le ‘ava o se faatoaga na ia amata ma lona uso i lo latou itumalo i Fagaloa. Ua faailoa mai le faaiuga a le faamasinoga i Siamani, ua toe tatala le maketi i Europa faapea ai ma Amerika e avatu ai le ‘ava ua faatau atu i atumotu o le Pasefika.

Ua 12 tauasga talu ona faasā le maketi lenei mai i le faatau atu ai o le ‘ava mai i lenei itulagi ma o le 12 lea o tausaga e lei mālōlō foi le komiti o le ‘ava a le Pasefika i finauga e toe tatala ai lenei tapu. O lea la ua tatala mai ua na o le faafetai lava ua faapea ona faaleo e i latou na aafia ina ua taofia lenei fefaatauaiga.
E tāua tele lenei laasaga fou ua toe agai i ai i latou na totōina le ‘ava ma ua toatele lava i latou ua faapea ona agai e fai isi faatoaga ina ua faamamalu le sā o le faatau atu o lenei tapu.

E toaitiiti lava i latou na faaauau le totōina o le ‘ava mo le maketi i Samoa lava ia. O se tasi o i latou ia o Mau‘u Siaosi Puepuemai o Fagaloa. E faamamalu le tapu ua faatoa amata ona gasolo lelei le ‘ava a lenei alii ma lona uso ma sa faaauau ona totō le ‘ava i fanua o Fagaloa.

“O aso a o lelei le alu a le ‘ava i fafo, sa maua le ponesi mai i le Malo e faamalosiau ai i faifaatoaga ‘ava mo le faaauau o lenei atinae i le atunuu ma o le toe tatala mai o le maketi i le taimi lenei i le toaitiiti ua faaauau le totōina o le ‘ava, ona pau lea o le auala o le a toe faatosina mai ai faifaatoaga e toe atinae le ‘ava, o se ponesi mo le latou galuega,” o se faaaliga lea a le fetalaiga ia Mau‘u.

Faaalia e lenei faifaatoaga o lea ua oo atu i le 3 eka le telē o lona fanua i Fagaloa ua totō ai le ‘ava ma o se galuega tele ua maua ai foi galuega a taulelea o le atu Fagaloa latou.
O le faigata o le ‘ava e fā i luga atu tausaga e totō ma faafailele lelei ai ona faatoa mafai lea ona faapea ua sauni e tu‘i mo le ‘ava e faatau atu i fafo.
“O le taimi atoa la lea e totō ma faatali ai le matua o le ‘ava, o le taimi lena e moomia lava le faaauau o le galulue e faamamā faatoaga ma ia maua pea le naunau o le au faifaatoaga e totō le ‘ava”.

Faaalia e Mau‘u o le isi lava luitau o loo iai ona e lē o eleele uma e ola ai le ‘ava, e iai eleele e ola le ‘ava mo ni tausaga se lua ae te‘i ua toe vaaia le mate ma e lē o mautinoa lelei lava pe aisea ae o eleele o le atu Fagaloa ma eleele o Safune i le motu tele i Salafai lea e molimauina le ola lelei ai o le ‘ava.

“E mautinoa lava le tele o le tamaoaiga o le a toe vaaia le sasaa mai i Samoa i lenei laau ma e manaomia lava le toe agai o faifaatoaga e totō le ‘ava ina ia lava le oloa e avatu i fafo. O ā foi aiaiga ma tulafono ua faamalosia ina ia atoatoa le lelei o le ‘ava, e tatau i faifaatoaga ona usitaia ia tulafono ina ia aua ne‘i toe tulai mai faaletonu na taofi ai le faatau atu o le ‘ava,” o se saunoaga lea a Mau‘u.

O le mafuaaga o le tapu lenei ona na maua i suesuega a faletalavai i Siamani, e iai nisi o ‘ava o loo faatau atu e lē tatau ona taumafaina ma e toalua lava tagata na faatauina fualaau na gaosi mai i le pauta o le ‘ava na faatau atu i le Pasefika na aafia ai totoga ona o ia fualaau.
Ua mae‘a nei foi suesuega a saienitisi na tapa e le komiti o le ‘ava a le Pasefika se latou fesoasoani ma ua sau sa‘o ai lava ‘ava e tatau ona ave i fafo ma ava e lē faatagaina ona e oona.

I Samoa lava ia e lua ituaiga o ‘ava e lē o faatagaina le tu‘i ma ave i fafo. O lea la ua faamautu tulafono ae o le faamatalaga a le sui o le faalapotopotoga o faioloa ma faatau oloa i fafo (SAME) Tagaloa Eddie Wilson, ua totoe nei na o le numera o faifaatoaga ‘ava ua fia unai i luga ina ia mautinoa e lava se uta o ‘ava e avatu i Samoa i masina taitasi. E $250 miliona tala Amerika na maua e faifaatoaga ‘ava i le Pasefika atoa i le taimi lea na taofi ai le maketi lea.

O lea foi taimi ua oo atu i le oloa lona lua lea le alumia i fafo i oloa mai i Samoa nei. O le i‘a o le oloa faatau atu i fafo aupito maualuga lea i ia vaitaimi. Mo Mau‘u, o le ponesi lava a le malo lana ia talosaga ina ia mautinoa e toe faatuputupulaia le manaoga o tagata o Samoa e atinae lea laau.

“O le ‘ava e lē pei o le talo ma le fa‘i ma isi fua o faaeleeleaga auā e uma lava le ono masina amata ona tino mai ma fua mai, ae o le ‘ava e umi lava se taimi e tausi ai ma o lea na ave ponesi mo le au faifaatoaga kofe, koko ma le niu ma e manaomia foi la se ponesi mo lenei laau,” o se saunoaga lea a Mau‘u Siaosi.