O le faaiuga o le vaiaso na faamavae atu ai aiga ma uo aemaise o le matua o Fausaga lea ua faatea ma le nuu i le tausi o Toeoso Taulauniu.
O se gasegase ua fesootai ma le fatu o le tina ua mafua ai le maliu, e pei ona ta‘ua e sui o le aiga i le Samoa Times.
E maliu le tausi ua atoa le tolu o vaiaso talu ona faatea ese le fetalaiga ia Toeoso, ona o lona auai atu i le faaee ai o le suafa SULA i se tasi o alo o le afioaga o Fausaga.
O se sauniga ma se faiga ua matuā teena e nisi o le afioaga ma iu ai lava ina faatea Toeoso Taulauniu aemaise isi matai o le afioaga o Fausaga na auai uma i le faafotutupu.
O le mataupu lenei ua oo i le Faamasinoga ma toe aumai i tua ina ia mafai ona toe soalaupule le afioaga peitai e lei maua se tasi ma ua faaauau ai le faatonuga a le afioaga o Toeoso Taulauniu, ua faatea ma faigaupu a le nuu mo le isi 50 tausaga.
O le tagi a Toeoso i le Faamasinoga pe aisea lava ua tulai mai ai lenei faaiuga ae o loo manino le faavae o le SULA ia i latou e pulea le suafa. O le fesili foi a le toeaina e mafai foi ona ave ana faamanuiaga ma lana lagolago i le itu o le nuu o loo tetee pe a manatu Toleafoa faapea Laumatia o loo seei i le itu o loo teena le SULA o iai nei, e faaee se suafa SULA i se alo e faasino ia i latou foi.
Ua faaauau pea feiloaiga ma tetee i le mataupu ma ua taatia nei i le Faamasinoga o Fanua ma Suafa mo se latou fautuaga ma se latou faaiuga ona o lea ua tele feiloaiga ae e lē o maua lava se tasi i le va o itu ua feeseeseai nei. O le maliu ai o le tausi o le tina na toe vaaia ai le talosaga a aiga o lenei tamā i le nuu ina ia toe faaa‘e Toeoso Taulauniu e tautua le afioaga o Fausaga.
E lei iai lava se tali ua tuuina mai e le afioaga se‘i vaganā ai lana faaiuga ua faalauiloa nei. Sa iai sui o le nuu i le maliu o le tausi ma na lāgā e nisi o le aiga i toe sauniga o le tina, le iai o le fesootaiga o le faasalaga o le tamā lenei ma le gasegase o le tina lea ua maliu ai ona o le faatea faapea o se matai ma se tamā matua o se afioaga. E tele lava aafiaga o le mafaufau e ono oo i ai aemaise i ē ua matutua.
O loo nofo lava Toeoso Taulauniu i Fausaga ma o toe sauniga foi o le tina o le aiga na faia lava i le afioaga ae ua tālia lava poo fea e agai i ai le mataupu o le suafa o SULA pe faamata e mafai ona toe soalaupule i ai itu e lua e pei ona iai le finagalo o le Faamasinoga o Fanua ma Suafa.
