Talo e le faipule se leleiga

E na o le toalua lava sui na tauva mo le nofoa o le itumalo o Gagaemauga Numera Tasi i le palota a le atunuu ia Mati.

O le afioga Tuala Iosefo Ponifasio sa lagolagoina le Tautua Samoa, ma le afioga Sala Fata Pinati o le sui tauva o le HRPP.

O le mae‘a ai o le palota na manumalo ai Sala Fata Pinati, ae sa tautaulia lona manumalo ina ua faaulu e Tuala Iosefo se tagi o moliaga solitulafono i faatosina eleelea i le faamasinoga faaitumalo.

E tasi le moliaga na muamua faaulu ma teena e Sala, ae na toe faaulu atu le isi moliaga lona lua, ma sosoo ai loa ma taumafaiga i le va o le sui faipule o le Minisita foi o le matagaluega o leoleo ma falepuipui, e saili se toafilemu o itu e lua.

“Sa ma feiloai i le Aso Sa ma le minisita ma faatino ai loa se ma maliega ina ia ma galulue faatasi i le faasa‘osa‘o o nisi o faaletonu i lo matou nuu”.

O le finagalo lea o Tuala Iosefo ina ua fesiligia i sona lagona ua mafua ai ona tuuina atu e lana loia se talosaga mo le toe faauiina i tua o lana tagi faasaga i le faipule poo le minisita o leoleo ma falepuipui.

“Ou te lei faia lenei mea ona ou te manao i se taui, ae ou te manao ia teuteu le lotoifale o lo matou nuu ma le itumalo ona o faaletonu sa aliali mai a o tapena le palota ma le mae‘a o le faigapalota”.

O le naunautaiga o Tuala Iosefo ia avea lona usitaia o fautuaga mai lona aiga ma tagata sa lagolagoina o ia, e fai ma faitotoa e ulufale ai le nofo filemu i le itumalo aemaise lava o le va o ia ma nisi o sui lagolago o le afioga i le faipule.
Faaalia e Tuala o le faipule lava na ia faailoa atu i le la feiloaiga, o le a fai le leleiga ma e manao e talo uma ai ma le itumalo. O le Aso Toonai, 14 o Me 2011 lea faamoemoe.

“O le a mafai i le feiloaiga lenei ona maua se taotoga lelei o mataupu sa feeseeseai ai matou, ae o le mea sili ia te au ia maua le fiafia ma soifua lo matou nuu ma le itumalo i le filemu”.

O le Aso Lua 17 o Me 2011 o le a toe valaauina ai le mataupu i le va o Tuala Iosefo ma Sala Fata Pinati i le faamasinoga faaitumalo.

O le valaauga lea o le a maoti ai le taotoga o le mataupu ma faaui uma ai loa i tua moliaga e aunoa ma le faia o se faamasinoga.

O le talosaga e faaui i tua na tuuina atu i le Aso Lua na tea nei, ae ua mae‘a ona tuuina atu le tali tetee a le minisita ma ua sauni e tuuina atu ana molimau e lagolago ai lana tetee.