E ui lava i le matagofie o le fonotaga a sui o le Pasefika ma le matagluega o Leipa a Niu Sila sa faatunuuina i Aukilani i le vaiaso talu ai, peitai i le finagalo faaalia o le susuga i le sui sinia o le ofisa o le Palemia a Samoa sa malaga mai, sa lē atoa lona fiafia talu ai le faafitaul o loo tulai mai pea i tagata Samoa o loo malaga mai i avanoa o galuega faavaitaimi.
Saunoa le sui o le malo na malaga mai le tofa ia Fata Uili Kapeteni, o le faauluuluga o galuega faavaitaimi i le ofisa o le Palemia a Samoa, ma ia toe ta‘ua ai le tulaga lē faamalieina o loo iai pea, ona o le lē galulue faatasi o le malo ma aiga o i latou o loo malaga mai mo ia galuega.
E ui lava ina o loo faatumauina pea le malosi o faiga faapaaga a Niu Sila ma Samoa i maliliega ua mae‘a ona saunia mo ia avanoa, ae sa iai lava le lagona e ao lava ona usitaia pea aiaiga ma tuutuuga ua mae‘a ona faia. Na ta‘ua foi e Fata, le tulaga i le va ma le vaavaai mai a isi atunuu o le Pasefika, o loo solomua lava ia Samoa le soli ma le lē amanaia o aiaiga e pei ona malilie uma i ai atunuu i lalo o lea foi polokalame tāua.
O loo ua taoto atu nei le talosaga a le malo o Samoa e tauala mai i le sui na malaga mai le tofa ia Fata, faapea foi le afioga i le Konesula o Fefaatauaiga i Niu Sila le susuga ia Paolelei Luteru, i aiga o i latou o loo tau sailia nei e lei toe foi i le atunuu talu ona mae‘a le taimi faatulagaina sa malaga mai ai mo galuega faavaitaimi, ina ia fesoasoani ane i le mataupu.
O loo maualuga pea le manatu o le malo o Samoa, e ao lava ona galulue faatasi le mamalu o aiga o i latou e malaga mai i lea polokalame i tausaga uma, ina ia faatumauina pea tuutuuga o pemita e malaga mai ai, ae aua le fautuaina sese, ma taumafai e fai faiga piopio ma le solitulafono e lē manuia.
