O le igoa ua leva ona faatali iai Niu Sila ma Samoa, talu ona faailoa i le lua vaiaso talu ai o le a toe foi Lupesoliai Laauli Joseph Parker i le maea i le aso 15 o Tesema.
Ae e lei faailoaina i lea taimi le tagata o le a fusu ma Parker. Ae o lea ua faailoa e Duco Events le alii o Alexander Flores o le a feiloai ma Lupesoliai. Ua talitonu foi Flores, o ia e manumalo i le fusuaga i Horncastle Arena i Kalaiesetete.
O le vaiaso na tea nei na malaga faapitoa mai ai Flores mai Amerika, o ia foi o se tagatānuu o Mexico mo le sainia faapitoa o le feagaiga ma Duco Events mo le faamoemoe. Na avea foi lea ma avanoa e feiloai ai i le autusitala i Niu Sila mo puegaata ma talanoaga e faasino i le fusuaga ma Lupesoliai.
E lē o se mealilo ia Flores le metotia ma le sikaili e manaomia mo le fusuaga ma Parker. Auā e masani lelei ia Andy Ruiz Jr. lea na fusu ma Parker mo le Fusi a le WBO i le lua tausaga talu ai.
Ua mautonu ai foi ma Flores e lē manao e oo le fusuaga i faamasino.
O lona manatu na’o le pau lona avanoa pe a manumalo i totonu o taamilosaga e 12 o le fusuaga. E manao i le tu’ioti ae e lei uma le fusuaga.
E lē o fefe foi Flores i le masau o lima a Parker. E masani foi ona manumalo i ana fusuaga i le tu’ioti. E 17 fusuaga faapolofesa a Flores, e tasi lana faia’ina. Ae o le tele o ana manumalo na maua i le tu’ioti. Ae ua tofo foi o ia i le pa’u i totonu o le maea i le faia’ina e tasi na oti ai i lima o Charles Martin.
O le tausaga o lea fusuaga, o le 2014. Talu mai le faia’ina lea e tolu ana manumalo na maua i le tu’ioti ma le fusuaga tasi na tutusa.
I le faitauina o igoa o le Paga Mamafa o vaega a le WBC, WBO, IBF ma le IBO e lē o iai le igoa o Flores i lisi a vaega ia i le vasega 15 maualuga. E na’o Parker o loo iai lona igoa i lisi a le WBC i le numera #5.
O lona uiga o le manao o le pulega, Duco Events o le fia maua lea o se fusuaga tau faigofie mo le latou tama.
E toe momoli ai Parker o se alii fusu faitauina i le lalolagi. I le latou suesuega, o Flores ua tasi iai Kevin Barry le faiaoga, ma Parker o se fusuaga e ao ona manumalo ai i le tu’ioti.
O le naunautaiga lea o Laauli Parker, o le toe foi lea o ia i le manumalo mautinoae ala i le tuioti i se taimi vave o le la fusuaga.
O le manao o Parker ia toe foi o ia i lana masani o le palasi o ana paaga i totonu o le maea. Ua fai si leva e le’i toe maua se tu’ioti a Parker.
O le fusuaga ma Alexander Dimitrenko mai Rusia na gata ai le malo o Parker i le tu’ioti. O fusuaga e lima e sosoo ai e tolu manumalo i ‘ai, Ruiz Jr, Hughie Fury ma Razvan Cojanu, ma faia’ina e lua ia Anthony Joshua ma Dillian Whyte.
O faasologa o loo nofo malie ia Parker. Tuu ia le manao o lana pulega, ae o le vaai a le alii fusu e toe fia foi o ia i lona malosi ma le matautia. E amata i le aso 15 o Tesema i Kalaiesetete i le tu’ioti o Alexander Flores i se taimi vave o le la fusuaga.
