E silia i le sefulu afe 10,000 pepe e fananau i le tausaga i le falemai i Mater e tinoiti.
O tamaiti pepe uma nei e fananau mai ma taofia tausiga faapitoa e faapelepele ai ona e tinoiti, poo pepe e vave ona fananau mai ae lei oo i le taimi e tatau ona fananau ai (premature), pe iai foi ni aafiaga i taimi o ma’itaga o tina o le ala lea e tausia ai lava i totonu o le falemai, e iai foi o latou nofoaga faapitoa, e talosagaina ai pea fesoasoani ona e lē o pine le faatuputupulaia o tamaiti e fananau mai ma maua i aafiaga faapenei. O nei tamaiti pepe e ta’ua e le falemai o tamaiti tinoiti (tiny babies) ma faapolokalameina lea vaega i le Mater Foundation o le ‘Mater little miracle’. Na saunoa le sui o le Mater Foundation, Maggie Hsieh (Senior Manager Donoro Relation). “O le fanau mai o se pepe fou o se mitamitaga lea o se tina ma se aiga, ae a aafia loa se pepe i ni ma’i pe ua fanau vave ae lei oo i le taimi e fanau ai, e tatau lava ona tausia i le falema’i seia oo ina mautinoa ua malosi le tino faatoa auina atu loa i lona aiga.
O tausaga taitasi e silia i le 2,000 o nei pepe tinoiti (tiny babies) mai soo se tafa o Kuiniselani i Saute ma le itu i Matu o Niu Sa Uelese e moomia lenei lavea’i, lea o loo saunia faapitoa e le Mater’s Neonatal Critical Care Unit i tausaga uma.
O le faatāuaina o lenei auaunaga, ona e lē taugofie vaega e tausia lelei ai latou, e afua ai ona solo atu fesoasoani ma le lagolago malosi a le community ma matagaluega eseese ona o le faamautinoaina ia tali atu ia latou galuega lelei mo le laveaiina o nei oloa tāua.
O le Aso Lua aso 23 o Iulai, na faaalia ai le agaga faafetai tele o le susuga ia Mark Young (Executive Officer Administration for Mater Foundation), mai le Mater Foundation ona o le seleni na faimeaalofa atu ai le Matagaluega S.I.S.D.A.C a Kuiniselani.
O lea seleni e $5,000.00 o se fesoasoani tele lea e laveaiina ai ola o nai tamaiti pepe nei mo lo latou soifua maloloina lelei ma le ola saogalemu. Na ia saunoa foi o le a tulimata’i pea i la latou faigapaaga faaauau ma le matagaluega S.I.S.D.A.C a Kuiniselani i le lumanai.
O le susuga i le taitai Matagaluega ia Pr Misa sa molitaiina le meaalofa, ae tali fuaitau mai i le agaga faafetai le tamaitai ia Cass Conwell (Donor Relationship Manager). O le susuga ia Pr Johnny Siofele na saunoa e fai ma sui o le Matagaluega S.I.S.D.A.C e faaalia foi lo latou agaga faafetai ona o galuega lelei foi a le Mater Founation.
O le naunautaiga o le susuga i le taitai faapea le aufaigaluega e faaauau le fesoasoani i le community aemaise le Mater Foundation ona ua tele lona sao i le tele o aiga ma fanau a le matagaluega ekalesia Aso Fitu Samoa Tutoatasi a Kuiniselani.
E toafa sui o le Mater Foundation na auai i le taliaina o lenei aao foai e aofia ai Mr Greg Beard (Mater in the Community Manager), ma i latou o ta’ua i le ripoti.
Na maualuga le agaga faafetai o le Mater Foundation ona o le foai a le matagaluega S.I.S.D.A.C e fesoasoani ai mo nai fanau pepe e fananau mai i le falemai e aunoa ma se auina sa’o atu i tua i aiga ae tausia i le falemai.
O le Mater Foundation o loo agalelei ma faasaoina le tele o le ola o nai tamaiti pepe nei, o loo faatalosagaina pea le fesoasoani i faalapotopotoga lautele ma soo se tasi e fia foai e mafai ona fesootai mai i le numera 3163 8000, o loo i le tuatusi Stanley Street, South Brisbane.
