Na faatumulia le laumua o Ueligitone i le faaiuga o le vaiaso talu ai i tama taaalo mai le 16 atunuu o le lalolagi, e pei ona latou finauina le manumalo o le taamilosaga lona tolu i lenei tausaga.
O loo filo ai lenei 16 le au a le Manu Samoa lea na siamupini i lea lava taamilosaga i le tausaga ua tuanai.
E lē gata la i le au taaalo a o le lolofi mai o le au maimoa mai soo se itu o Niu Sila aemaise nisi mai atunuu i fafo. E molimauina e nisi le mataina o le fitu i Ueligitone i tausaga taitasi ona o le felanulanuai ma le matagofie o teuga a le au matamata.
O le Aso Tofi, aso 3 Fepuari na faia ai le solo (parade) a tama taaalo mai le falefono (Beehive) agai atu i le Civic Square mo le faafeiloai faapitoa a le pulenuu o Ueligitone i malo ua asia le laumua i lenei vaiaso.
Na filo ai i lenei solo umi ma le mataina nisi o autaaalo mai Samoa sa auai mai i le taitoafitu a le Ulalei sa faia i Ueigitone i le vaiaso ua tuanai.
E pei o le au a Vaiala, Moataa ma Malisi.
