“E sili le puipuia nai lo le togafitia”, e faamata faigofie lona faaupuina, ae faigata lona tausisia ma le faatinoga. O le Aso Tofi o le vaiaso na tea nei sa faataunuuina ai le fonotaga a le Tano‘a e ta‘i lua masina ma faatinoina, sa faia lea i le malaevaalele faavaomalo i Aukilani, lea sa talimalo ai le vaega o le puipuiga ma le saogalemu a le Ea Niu Sila, ua lima nei tausaga talu ona faavaeina.
O le auga ma le autū o le fonotaga i lenei tausaga, o le vaavaai toto‘a lea i ni auala e puipuia ai tagata faigaluega Pasefika mai le manunu‘a i faalavelave faafuasei i totonu o falefaigaluega. O se avanoa lelei foi, e fesootai atu ai i nisi o falefaigaluega o loo toatele ai tagata faigaluega Pasefika, ina ia auai o latou sui o le saogalemu i lenei mafutaga ma faasoa atu nei aoaoga i falefaigaluega mo le faatāuaina lava o le puipuia o tagata faigaluega mai faalavelave tutupu faafuasei.
Sa auai i lenei fonotaga sui ofisa ulu o le saogalemu (health and safety reps) mai falefaigaluega eseese i Aukilani, e aofia ai le Susuga ia Panu Raea o le Pule Sili o le vaega mo le Saogalemu a le Ea Niu Sila, faapea le Susuga ia John Beaglehole o le Pule Aoao o le Vaega o le Puipuiga a le ACC (Faalapotopotoga mo taui o faalavelave faafuasei). O le Afioga Toleafoa Neil Soonalole, o le Faufautua faapitoa o le Saogalemu a le ACC, ma o ia foi na nafa ma le faamaopoopoina o lenei fonotaga. Na saunoa Toleafoa: “Ua toatele tatou tagata ua manunu‘a ma maliliu mai faalavelave tutupu faafuasei i totonu o falefaigaluega, ae o nei faalavelave e mafai ona taofiofia le tutupu mai.” O nisi o mafuaaga na ta‘ua e Toleafoa, o le lē malamalama atoatoa o tagata Pasefika i le gagana faaperetania o loo faaaogāina, aemaise o le fenumiai o faailoilo o faatupumala (hazard signs) e faigata ona malamalama i ai, o loo faapipii i totonu o falefaigaluega.
Na amata aloaia le fonotaga i se asiasiga sa savalia ai vaega uma o le malaevaalele o loo faatinoina ai galuega eseese a le toluafe tagata o loo galulue mo le Ea Niu Sila, ma asia vaega uma o le puipuiga o le saogalemu o tagata faigaluega.
E tasi lava le faamoemoe na tonu uma i ai i latou sa lautogia e saunoa mo le fonotaga, o le faasoa lea o le feau faaauau, ‘e faatāua le saogalemu o tagata faigaluega Pasefika i totonu o falefaigaluega, ma ia unaia Ofisa ulu Pasefika o falefaigaluega taitasi, e faaliliu i gagana a le Pasefika faamatalaga uma mo le nofo silafia o tagata faigaluega.’
Sa talanoaina foi aafiaga i aiga, pe a iai se tagata faigaluega e faamanu‘alia mai i totonu o falefaigaluega:
• Muamua, o le a lē maua le tupe masani e faagaoioi ai le aiga ona ua lē faigaluega le eliauro a le aiga.
• Lona lua, o le a taulai uma le malosi o le aiga e tausia lē ua manu‘a i le fale, ma e telē foi le avanoa o le a lē faigaluega ai ma nisi o le aiga ona o le vaaiga ma le tausiga o lea tagata pe a faapea e tugā ni manu‘aga o aafia ai.
E lata i le limasefulu tagata faigaluega Pasefika o loo avea ma ofisaulu o le saogalemu (health and safety reps) i falefaigaluega i Aukilani sa auai i le fonotaga o lenei tausaga ma le faamoemoe, o le a faatupulaia pea sui auai mo lenei fonotaga i se taimi o i luma. E mafai ona maua nisi faamatalaga auiliili, pe a fesootai le Afioga Toleafoa Neil Soonalole, o le faufautua faapitoa o le Saogalemu a le ACC, i le telefoni 09 250 6532 i taimi faigaluega.
