E malamalama lelei le Samoa Times, o faiga masani ia ma le faagasologa o galuega aemaise ai o le avanoa mulimuli foi lea mo soo se tasi lava, pe afai ua lē taliaina ma teena mai e le matagaluega se talosaga, a o talitonu pea o iai se mafuaaga talafeagai e tatau ai ona toe iloilo e le Minisita se mataupu.O le ala foi lea sa toe tulitatao ai le tina ma lona aunty, ma toe fesiligia, poo ai sa nafa ma le faia o talosaga muamua, ae pe sa fautuaina foi ma faailoa ane lea faiga, ma le avanoa mulimuli e pei ona faatinoina e le Law Centre i Magele.
Sa umi se taimi o nofo le tina, mulimuli ane sa vaaia le maligi o loimata o Perth, ina ua toe fesiligia e le Samoa Times, pe fia se seleni sa faaaluina i talosaga sa faatinoina, ae pe sa fesoasoani foi se isi ia te ia ma si ana tama.
Sa tau lē manino le tali a le tina i le mafatia tele o lona loto, ona ua toe fafagu e le Samoa Times, nisi o manua sa olaola tetele ma faigata ona tamate. O le vaiaso fou o le a e faitauina ai le tala atoa, ma le taamilosaga sa faataamilo ai le faia o le talosaga a le tina ma lana tama. E aofia ai nisi o ofisa ma auaunaga, aemaise tupe sa faaaluina, ma auala sa taumafai e fai i lenei tina mafatia.
O le a oo foi le Samoa Times, e fesiligia ma sailiili auaunaga ma kamupani sa totogi i ai tupe, atoa ai ma lona faaaluina, auā e leai ni lisiti, leai foi se faamaoniga ma ni tusi o ni fetaliaiga ma le Matagaluega o Femalagaiga. O tulaga faapea, o ni pine faamau ia e mautinoa ai sa faia le galuega, ma ua alagatatau ai ona tapa foi se totogi.
E tatau foi ona faamauina vaega eseese uma sa faaalu i ai le seleni, e ese mai i totogi faatulagaina o galuega a le ofisa, atoa ai ma le totogi o le galuega a le Agent, poo lē na faatinoina le talosaga agai i le ofisa autū.
Tapena le aiga e fesoasoani mo le totogiina o le pili o Elizabeth i le falemai
O loo fuafuaina se aiga tele, poo le dinner o le a faia i le nofoaga i Manhattan i le aso 20 o le masina nei lava. O lenei faamoemoe ua mafai ona fesoasoani i ai se tasi o tamafanau faipisinisi a le atunuu, le susuga ia Lui Machine Tusani, ma lana kamupani le Taropages.
O se fesootaiga vavalalata a le aiga ia Mile Seupule ma le tina ia Perth, faapea le alii faipisinisi, sa amata ai ona fuafua ma talanoaina le aiga poo le dinner e pei ona fuafuaina.
O le tupe atoa o le a maua i lea po, o le a tuusa‘o lava i le teugatupe a le tamaitai o Elizabeth, mo le faamoemoe lava o le a fesoasoani mo le totogiina o lona pili i le falemai e pei ona faaopoopoina pea faavaitaimi.
O se feiloaiga ma le susuga ia Lui Tusani, sa fesiligia ai foi sona finagalo, ona o lona amataina o se galuega fesoasoani mo le tina ma lana tama. O le tali a le susuga ia Lui, sa ia faapea mai ai, e lua ni mafuaaga na mafua ai ona fia fesoasoani ina ua maua le tala, ma vaai i le faafitauli.
1. O ia foi e lē mā e ta‘u le mea moni, sa nofo solitulafono pe na ova ona aso i totonu o Niu Sila. Sa oo lava foi ina faatonuina ma aumai se faatonuga ina ia tuua loa le atunuu ae toe foi i Samoa, ona e lē talia se talosaga.
O le afioga ia Taito Phillip Field, o le alii faipule i lena vaitaimi, sa tulai mai ma fesoasoani i lona faafitauli. Sa manuia ma toe foi mai ai i Niu Sila, ma ua faasolosolo manuia foi lona taumafai i galuega, ma le mafuaaga sa fia nofomau ai i Niu Sila.
2. O se tasi o ona tei, poo se tasi o lona aiga, sa maua foi i le ma‘i e pei ona afaina ai le tamaitai o Elizabeth, o loo saili fesoasoani nei. O le tulai mai o le mafatiaga ma aafiaga o le ma‘i o Elizabeth, ua toe fafagu mai ai tiga sa oo i ai lona aiga ona o se fanau a le aiga sa tigaina ai.
O le isi mafuaga lea sa manao ai e fia fesoasoani ma ua avea foi o se lagona sa muamua lava tupu i lona loto, e tatau ona faia i ai se faiga faapea. Sa maua se fesootaiga ma le aiga, ma sa ia faafetaia foi le talia lelei e le aiga, o lona manaoga ma lana auala e saili ai se seleni mo le manaoga faapitoa.
O le susuga ia Lui Tusani, o se tasi lea o ona malosiaga ma taleni e agava tele ai. O le faia ma le faatinoina o sailiga seleni, e ala i auala eseese ma faaaogāina ai lona tomai.
O le faamoemoe mo le aiga poo le dinner, e $50 le ulufale ma o loo faamoemoe e tatau ona oo atu i le 500 ni laulau i totonu o le fale. Sa ta‘ua foi e Lui, o loo iai pea le avanoa mo kamupani ma faalapotopotoga tetele, pe afai e manaomia le faatau o se laulau atoa.
Sa fesiligia foi le faatulagaina o le afiafi, ma ona vaaiga i se polokalame. Saunoa Lui, o le a faia ni faatautu‘i o oloa ua foai ane e tagata taitoatasi ma kamupni. O le a iai foi ni faafiafiaga i pesega, ma aitema e faatinoina, faapea ai ma le taumafataga tele o le a saunia lelei.
Na ia ta‘ua foi e faapea o tupe uma o le a maua, poo le ā lava le auala o le a faatinoina ma maua mai ai, e tasi lava le autū, tasi foi le teugatupe o le a agai uma i ai, o le teugatupe a le tamaitai o loo faapogai ai, o Elizabeth Alenepei Siolo.
O le www.elizaberthsiolo.org, o le tuatusi lea e mafai foi ona asiasi i ai soo se tasi lava, ma silasila i ata ma soo se faamatalaga, atoa ai ma le tuu ane i ai o se foai pe a fia fesoasoani. O le tasi lea o fesoasoani a le alii faipisinisi, Lui Tusani ma lana kamupani.
O lea faamoemoe, o loo galulue faatasi ai le susuga ia Lui Tusani ma le tina ia Perth, faapea le afioga ia Mile Seupule, o loo tu malosi ma fesoasoani i le faamoemoe o le aiga mafatia. O loo talosagaina foi le mamalu o le atunuu, o ai lava e fia mafuta ma fesoasoani i lea po ma le faamoemoe, ina ia vave ona fesootai ane ma taofi se avanoa ona ua amata ona utiuti avanoa o totoe i le taimi nei.
Mo fesootaiga o le telefoni a le tina o Perth,
021 201 2286, poo Lui Tusani i le 027 475 6548.
