6 masina o le visa faigaluega o Perth, ma le 6 masina o le visa asiasi o lana tama ia Elizabeth Alenepi Siolo ua talia mai e le Minisita o Femalagaiga a Niu Sila
Na pei ua matuu ese se avega mamafa sa i le ua o le tina ia Perth ma le aiga, ina ua tali mai le Minisita o Femalagaiga a Niu Sila, ma faatonuina ai lana Matagaluega ina ia faamatuu ane le ono masina o le pemita faigaluega mo le tina ia Perth, ma le isi ono masina o le visa asiasi mo le tamaitai o Elizabeth lana tama sa feagai ma mafatiaga ona o le ma‘i sa aafia ai.
O le tali a le Minisita e pei ona faalauiloa ane i le aiga, o loo tālia i le taimi nei lona faatinoina e ala i le faapipiiina ma faamaufaailogaina i totonu o la tusifolau, ma o le vaega mulimuli lea e faia mo le aloaia o lea faaiuga faigata sa nafa ma le Minisita ma lana Matagaluega.
O se faamāmā avega mo le tina loto mafatia, ma o se fesoasoani tele mo ia ma le aiga, a o tau saili tupe mo le totogiina o lepili a le falemai, o loo faaopoopoina pea ma ua oo atu nei i le $206,000 tala.
E pei ona silafia o le Minisita o le Matagaluega, o le tagata mulimuli lea e mafai ona faia se suiga i soo se talosaga, pe afai e iai sona vaega e alagatatau ai ona oso i totonu ma faia se suiga i se mataupu tuga. E lē gata i lea, ae o se mataupu foi sa lē lelei ona faatinoina ma faia se tali mautu e ofisa o lana Matagaluega.
O le malosi o le Minisita, o lana lea faitalia e faia ai se faaiuga talafeagai, ma toe tatalaina se isi avanoa e toe sailiili atili ai le mataupu ma toe faia i ai se isi faaiuga mulimuli ane.
O le auala lea ua faaaogāina nei e le Minisita o Feamalagaiga a Niu Sila, e tali ane ai i le talosaga a le tina ia Perth ma lana tama teine o Elizabeth.
Mo le silafia foi e le atunuu, e lei faavaivai le tina, ma e lei nofoai foi ina ua lē talia le talosaga muamua sa faaulufale i le Matagaluega. O le ala lea sa mafua ai ona tapa ni fesoasoani mai nisi o auaunaga lautele mo se fesoasoani. E pei ona ta‘ua e faatolu ona apili le faaiuga sa faamatuu ane, ma lē talia ai le talosaga.
O se tulaga lelei lea, i le vaai ma le faitau a le Minisita, ona o le tele o talosaga aemaise sa totogi lava tupe ona o le fia maua o le fesoasoani ma le naunau sa iai. Afai na oo tupe sa totogi mulimuli i nisi o auaunaga i totonu o faamaumauga ma faila a le Matagaluega, o isi ia molimau maumaututu e masani foi ona faaaogāina i le faia o faaiuga a le Minisita.
Sa fesiligia le tina loto mafatia, pe ua faafiafiaina i lea avanoa ua fesoasoani ane ai le Minisita. O lana tali ua matuā fiafia ma ua fesoasoani tele mo ia. E ui ina faaavega mamafa le pili a le falemai, peitai o le tulaga lava lea sa sili atu ona popole i ai.
O le molimau a lona aunty o loo fesoasoani tele mo ia i le taimi nei, le afioga ia Mile Seupule, sa ia ta‘ua ai foi le fiafia tele ma le faafetai, ona o le tulaga ua tali mai ai le malo e tauala i le Minisita, e uiga i le talosaga a Perth ma si ana tama.
O le Law Office i Magele sa feagai ma le toe taumafaiga mulimuli lea ua tali mai. O le talosaga sa tuusa‘o lava i le alii Minisita, ina ua mae‘a ona apili faatolu le faaiuga sa faamatuu ane muamua, ma lē talia ai le manaoga o le talosaga mo se nofomau.
