Ua tolu masina talu ona goto se vaa toso vaa ma se masini sua eleele sa i le uafu i Satitoa. E oo mai lava i le taimi e lomia ai le tatou pepa, e lei iai lava se tala mai i le Ofisa Sili o le Pulega o Uafu ma Taulaga, pe aisea na tulai mai ai lea tulaga ae o le ā foi le galuega e tatau ona faia ina ia mafai ai ona faaauau galuega faaleleia ia o loo faia lava i le uafu i Satitoa Aleipata.
O le tali a lana failautusi, o ā lava mataupu e faasaga i lo latou pule, e tatau ona agai uma i le tamaitai loia o loo vaaia mataupu faapea mo le Pulega. Na suesue atu i le tamaitai loia ae faapea mai lana saunoaga, e leai se faamatalaga e mafai ona ia faia i le mataupu lava lea ua fesiligia ai o ia auā o le Ofisa Sili lava e tatau ona sau ai faamatalaga o lea mataupu.
O le vaa toso vaa lenei ma le masini sua eleele, na aumai i le lua tausaga talu ai, ina ia fesoasoani ai i le galuega tele o le toe eli ma faalelei atili le gataifale o le uafu lea. E lē o iai lava la se lipoti pe aisea na goto ai ia masini ae sa i luga o le vaa la‘u vaa le masini sua eleele, o se faamatalaga sa fealuai solo ai lava le vaa lenei ae o loo faatino mai ai galuega a le masini sua eleele. O le goto o le vaa na goto atu ai lava ma lenei masini.
O le lua tausaga talu ai na lotea ai foi e le Palemene lenei matupu. O faipule e pei o Levaopolo Talatonu lea na faaali lava foi lona lē fiafia ona o le tupe na faaalu ai i le aumaiga o ia masini mai i Korea. Faaalia ai e Levaopolo Talatonu i lea taimi, o le $4 miliona tala na aumai ai le Vaa toso vaa ma le suaeleele, atoa ai ma le $600,000 (tala) na toe ave e faalelei ai le afi o le vaa na aumaia nei masini i Samoa, ua matuā maimau atoa.
O lana faamatalaga ana alu lea tupe ae o ni masini fou e tatau ai ae o le lē talafeagai o lenei faatauga oloa a le Malo, ona o masini uma nei e lua ua faaaogā (second-hand). “Lea la ua aumai aumai lea ua goto,” ona pau lea o se tala a le Alii faipule o le Tautua Samoa.
Sa iai le taimi pe tusa o le taimi lea i le tolu masina talu ai na taofia ai femalagaaiga mai i le uafu i Satitoa agai i Amerika Samoa. Sa faaauau ona faasalalau faigamalaga mai i Satitoa ae na maua o le tele o ia faigamalaga na toe avatu sa‘o lava mai i le uafu i Apia.
Na ta‘ua e le Faalapotopotoga o Vaa a Samoa, e lei iai se aafiaga o femalagaaiga i Pago Pago ona o le goto ai o ia masini. Ae na mafua lava ona sa iai faaletonu e lei mafai ai ona avatu i Satitoa ia faigamalaga.
O le tala a le tamaitai Loia o le a mafai ona faamatala mai se tulaga o iai se faaiuga a le Pulega o Uafu ma Taulaga pe a mae‘a ona avatu se faatagaga aloaia mai i le alii Ofisa Sili o le Pulega ia te ia. “E tatau lava ona sau i le pule le faatagaga e ui o lena ua faatonu atu e lana Failautusi e te talanoa mai”, o lana faamatalaga lea ina ua mafai ona fesootai i ai ma taumafai mai se faamatalaga.
Ua mae‘a lelei le vaiaso atoa e lei maua se fesootaiga ma e lē mafai ona sao atu se telefoni i le alii Ofisa Sili auā e taofi mai lava e le Failautusi.
