O se feiloaiga na taloina e le Faamasinoga o Fanua ma Suafa, na feiloai ai le pulega o alii ma faipule o le afioaga o Magiagi ma se tasi o matai e toalua ia na o latou faatea i le masina o Setema.
O le mae‘a mai o se feiloaiga a le nuu ma le Kapeneta na sosoo ai ma le isi fono a le nuu na taloina ma o inā na faaali ai finagalo o le nuu e faatea ese Mataipule So‘a ma Puleiata Eli Tuimalealiifano mai i le faiganuu “seia iai se taimi”.
O manatu faaali i lea aso, ua fai soo le lē talia e nei matai o ni finagalo autasi o le nuu.
O lea ua mae‘a masina e lua talu ona faia lea faaiuga ae ua agai Mataipule So‘a i le faamasinoga e aumai ai se “fesoasoani ona o lea ua lē toe faaa‘e lava i laua ma Puleiata”. O lea la na mafua ai le feiloaiga na tapa e le Faamasinoga o Fanua ma Suafa.
Na fesiligia Mataipule o le mafuaaga o lana talosaga ua ave ina ia fai mai se faaiuga a le Faamasinoga o Fanua ma Suafa, o lana faamatalaga, E lē iloa lava pe aisea ua faatea ai i laua ma e fia manino poo ā tonu mafuaaga ma mau ua faia ai lea faaiuga.
Na tapa se finagalo o le nuu ma o Malopito Kopelani na uluai saunoa ma faaali i le Faamasinoga na faia lenei faaiuga ona o le itu lea ua lē usitaia faaiuga ua autasi i ai le nuu, ae afai o le finagalo o Mataipule So‘a e ave le mataupu e faamanino ma auiliili mai e le Faamasinoga o Fanua ma Suafa o lona uiga o le a leai se isi laasaga e faia e le nuu se‘i vaganā ai le sauni e tali i lea talosaga i luma o le Faamasinoga.
Na tele isi finagalo lē fiafia o matai o le afioaga na tuu avanoa e faalauiloa ai i lenei feiloaiga.
E lei auai atu Puleiata Eli ona o le faamatalaga a Mataipule e lē o auai i lea feiloaiga ua tapa e le faamasinoga. O le finagalo foi lea o nisi o le nuu ona o le manatu ua faatasina atu lava le nuu i nei feiloaiga ona ua agai i le faamasinoga.
O le faamatalaga a le Lesitala na feagai na itu e lua, talu ona faamalosia le teuteuga o le tulafono o Faamasinoga o Fanua ma Suafa i le masina o Mati, o soo se mataupu lava i le va o sui o afioaga e fia fofogaina ma iloilo i luma o le Faamasinoga o Fanua ma Suafa, o lea ua iai le aiaiga e tatau lava ona faatalatalanoa e saili ai pe maua se fofo i feiloaiga nei ma taofia ai le ave i luma o le Faamasinoga o Fanua ma Suafa o nei mataupu.
A leai se tasi e maua ona faato‘ā laasia loa lea o le Faamasinoga, e lē o se faatasina la o le nuu ae o le saili o se isi fofo i le tulai mai pea o feeseeseaiga e mafai ona faapuupuu ma faasao le taimi e soalaupule faatasi ai a o lei oo atu i le taunuuga o feeseeseaiga.
O le mae‘a la ona faaali o finagalo na agiga ai lava le finagalo o Mataipule o le a faifaimea faatasi pea ma le nuu ma o lona lē usitai e pei ona ta‘ua e le nuu, i le lē fono ae agai atu momoli le mataupu a Magiagi i le Kapeneta, e pei ona tuua‘ia ai na ia faia ona o lona manatu o ia o le sui sooupu o le nuu.
O le tali a le nuu ua mae‘a ona tasi le finagalo i le pulenuu e momoli le finagalo o Magiagi ae ua faomalo lava Mataipule ma finau e na te momolia le mau ma ua lē ogatasi ma le finagalo na ioe uma le nuu e ave i le feiloaiga lea.
Ua toe agai nei la i le afioaga itu e lua ma na ta‘ua e Tuiono Keni le pulenuu, o lea lava foi na fuafua e toe faaa‘e matai nei i le vaitau o aso fiafia ae se‘i faatali la pe oo le tagi e ave i le Faamasinoga.
