Ua toe tolu vaiaso ma aso ona taunuu lea o le atunuu i le faamanatuina o le lima sefulu tausaga o le Tutoatasi ae e lei maua se faaiuga a le Kapeneta ile polokalame ua faataoto e le Komiti o tapenaga lea e taitaifono soofaatasi ai Minisita e toatolu e aofia ai le Minisita o Faamasinoga, le Minisita o Galuega tetele ma le Minisita o Tina ma Tamaitai Atinae o Nuu ma aga Fesoota’i.
I se faatalatalanoaga ma le Minisita o Tina ma Tamaitai le tofa Tolofuaivalelei Falemoe Leiataua, ina ua mae‘a le fono e lima itula o faagasolo a le komiti i le Aso Tofi 3 o Me 2012, na ia faaalia ai o le polokalame ua taoto e faalagolago i le talia e le kapeneta i lana fonotaga masani e usuia i le Aso Lulu 9 o Me 2012.
“O le polokalame e iai vaega e lei mautu ae o le tele lava o tapenaga ua mae‘a ae faalagolago uma i se faaiuga a le kapeneta”.
O le finagalo lea o Tolofuaivalelei ina ua fesiligia. Na ta‘ua foi e le alii minisita e lei faamautuina foi nisi o malo valaaulia mai fafo pe taunuu ona malaga mai e auai i le Tutoatasi.
O le taimi nei foi ua na o le Kamupani o le Yasaki ua tali atu i le faatalauula a le komiti i pisinisi ma kamupani mo se fesoasoani tupe i le faatinoga o polokalame uma o le aso fanau o le atunuu.
“O le isi tulaga lena e na o le tasi lava le kamupani ua tali mai, ae o se avanoa lelei lenei e toe faamanatu atu ai i kamupani o loo manaomia e le komiti le latou tauau e lagolago ai le faatupeina o le fuafuaga o le tutoatasi. E i le va o le 4 ma le 5 miliona tala o le a faatupe ai tapenaga uma.
Polokalame o le Tutoatasi o le a tuuina atu i le kapeneta mo se latou faaiuga mulimuli
O le Aso Tofi 31 o Me o le lotu o le Tutoatasi e faia i le malae i Tiafau i le 4.30pm i le afiafi lea o le a faia ai ma le ‘ava faatupu (Royal Ava ceremony). Faaalia e le Minisita le tofa Tolofuaivalelei o le ‘ava faatupu e lei faamautuina se afioaga o le a faatinoina, ae o loo fuafua e faia mo Malo faaaloalogia o le a malaga mai.
O loo faatalia foi se finagalo o le Kapeneta i lea fuafuaga a le komiti ae na faaalia e le minisita o se tasi o taitaifono soofaatasi, e to‘afa lava Malo valaaulia o loo silasila e tatau ona ave i ai le faaaloalo e taumamafa i le ‘ava faatupu. Ua na o le Ao o le Malo, Kovana Sili o Niu Sila ma Ausetalia ma le Kovana Sili o Amerika Samoa. O le ‘ava faatupu e pei ona faaalia e le minisita e le toatele nisi e taumamafa ai.
O le Aso Faraile aso muamua o Iuni 2012 o le sauniga i Mulinuu i le malae o Tiafau e aofia ai le sauniga lotu, o le sisiina o le Fu‘a, le Malelega a le Ao o le Malo ma savali faaaloalo.
O le hall a Tupulaga EFKS i Mulinuu o le a faia ai le taumafataga o le aoauli mo malo valaaulia i le aso muamua o polokalame, ae faagasolo ai nisi o faafiafiaga i le malae i Tiafau. O le 2 i le aoauli e taliu ane ai malo valaaulia ona faatino ai lea o faafiafiaga faaleaganuu ua sauni mai i ai nisi o afioaga ua lautogia e pei o Lotofaga, le itumalo o Gagaemauga numera 3, o le afioaga o Tafua ma le itumalo o Aiga i le Tai.
O le fitu i le afiafi o le taumafataga mo malo valaaulia i le fale mataaga o Lopati Lui Sitivinisone i Vailima, ae o le po foi lea o le koneseti tele a le fa‘aili o le UB40.
O le a faia ai foi se faaaliga o mea faapapa e fana agai i le vanimonimo poo fireworks display i luga o le apitagalu o le taulaga o Apia. O le Aso Toonai aso 2 o Iuni o taaloga eseese e pei o kilikiti faasamoa, lakapi, netipolo, o le a auai au masii mai fafo.
O le ‘afa o le ono i le afiafi o le aso lea o le siva tele o le Tutoatasi le Independence ball e faia i le hall a le EFKS i Sogi. O le Aso Sa e sosoo ai, aso 3 o Iuni o sauniga lotu masani i le atunuu ma le faaaliga o koneseti pese ma tala faatino faaleagaga e faia i Tiafau Mulinuu ma o loo tapenaina e le ekalesia Peace Chapel. O le Aso Gafua, aso 4 Iuni o faaaliga o meataulima ma isi galuega alofilima i luma maota o le Malo, faapea tauvaga savali a tamaitai ma faaaliga a fa‘aili pu.
Faaalia e le tofa Tolofua ua le taunuu le tauvaga faaili pu ona e na o le lua na lesitala atu mo le tauvaga ae o le isi fa‘aili sa faaulu atu mo le faafiafia ae le tauva. O le aso foi lea o tuugavaa Tulula, o paopao ma vaa alo. O le po o le faaaliga o taleni ma siva a le Digicel i luma o le maota o le Malo i le eleele fou faapea ma le faaaliga a le au tafiti mai Saina.
O polokalame lea a Saina e faia i le hall a le EFKS. O le Aso Lua, 5 o Iuni o le suega siamupini o tuuga fautasi ma o loo fuafua e valu fautasi o le a sailia le siamupini.
O le valu lea o fautasi e saili mai i vaega e lua o le tuuga poo hits e faia i le aso 30 ma le 31 o le masina nei o Me. E lua fautasi o Tutuila ma Manu‘a ma ua faaalia e Tolofuaivalelei ua mae‘a ona logo i kapeteni ma auvaa o fautasi o Tutuila o le a masii mai e manaomia fautasi e fau i le laupapa ma alo i foe laau, ae le faaaogaina fautasi o fausaga faaonapo nei atoa ai ma foe sipuni.
O le aso foi o le a tauaao ai e sui o le Malo o Niu Sila ni meaalofa mo le Malo o Samoa. O faafiafiaga o le a faaiu i ai le aso mulimuli o le a saunia e afioaga e lua mai Amerika Samoa.
O Alataua mai le Manu‘atele ma Asu o afioaga ia mai Sasae o le a auai, ae taualuga e le itumalo o le Vaimauga. O le sauniga o le tuuina i lalo o le tagavai e taualuga i ai. Ua faaalia foi e le taitaifono soofaatasi o le a iai faailoga taualoa o le a tauaao e le Malo i nisi o le atunuu ua iloga le latou tautua ma o loo iai se komiti o loo nafa ma lea polokalame.
