Ua tuu atu nei i le Faalapotopotoga o le Toomaga mo Tagata Puapuagatia, e saili se auala e ono fofo ai se tasi o gasegase ua tele masina e lei maua lava se fofo, e ui ua tulai pulega a nuu ma afioaga ina ia saili se tasi ma se filemu.
O le mataupu lenei ua tulai mai i le va o le aiga o le tamā ia Faumuina Fereti ma lona aiga ma le afioaga o Tanugamanono.
E ui o lea ua silia i le tolu masina talu mai le faaiuga a le Faamasinoga o Fanua ma Suafa e toe foi le aiga o Faumuina Fereti ia latou meatotino e aofia ai fale ma se pisinisi i Tanugamanono. E lē o mafai lava ona agai atu alo o lea tamalii ia latou meatotino.
O loo tulai mai lava feeseeseaiga i taimi uma e oo atu ai le fanau e nonofo i o latou fale e pei ona faatonuina e le Faamasinoga. E manino e lei maua lava se fofo o lea faafitauli ma ua agai mai loa le aiga i le Toomaga mo Tagata Puapuagatia mo se isi fesoasoani.
O le faamatalaga a le Faalapotopotoga, o le a se‘i auiliili lelei le mataupu ma talanoaina uma foi itu o loo aafia i lenei feeseeseaiga a o lei faia i ai se galuega.
Ae o le galuega o lea ua mae‘a logoina ai e le Toomaga mo Tagata Puapuagatia sui o le aiga, ina ia faatino loa ni tagi i le osofaiga o lo latou maota ma le afi lea na faatamaia ai nisi o fale o le aiga i le faaiuga lava o le tausaga na tea nei.
E tulai mai le mu ma le talepe o se tasi poo nisi i maota nei o le aiga o Faumuina Fereti ua faatulai ese le aiga.
O se mataupu ua aofia ai le Faamasinoga o Fanua ma Suafa, ua aofia ai ma le Faamasinoga o Soligatulafono ma le Matagaluega o Leoleo ma le Falepuipui ina ua tulai mai ai se mu i le faaiuga lava o le tausaga na tea nei, ae ua tuufua lena o le nofoaga lea.
Ua talanoa le Toomaga mo Tagata Puapuagatia ma malu o le Malo ua nafa nei ma le suesuega o lenei mataupu.
O le latou tali ua aumai i le Toomaga, o loo iai lava nisi o vaega o loo sailiili i ai i le taimi nei ona faamautu mai lea o le latou suesuega i le tagi a le aiga i meatotino ua faaleagaina i le afi.
O le faaiuga o le tausaga na tea nei na tulai ai itu e lua i luma o le Faamasinoga o Fanua ma Suafa, ua ave i ai le mataupu o le leai o se fealofaniga i le va o sui o le afioaga, atoa ai alo o Faumuina na faapea ona nonofo ai i lo latou aiga lea e tuaoi lelei ma le malumalu ma le Maota o le Galuega a le Ekalesia Faapotopotoga Kerisiano Samoa i Tanugamanono.
O le faatulai ese o le aiga lenei mai i lea nofoaga na oo ai le mataupu i le Faamasinoga. O le iloiloga na maua ai o se fanua e tasi lea e tutu ai maota o le aiga lea ma Maota o le Galuega a le Atua i tafatafa ane lava. O le fanua lea e faasino i le Suafa Atoa.
O le iloiloga foi lea na faamautu ai o le Afioga Faumuina ma ona alo o i latou ua ave i ai le pule o le fanua.
O le mau a le Afioaga na folasia i luma o le Faamasinoga o Fanua ma Suafa, o le aiga lenei ua fai soo le amio o le faatupu vevesi i totonu o Tanugamanono.
Ua vevesi alo teine o Faumuina Fereti ma tina o le aulotu lea. Ua lafo ni lafoga lē migao i se aufaigaluega Kamuta o loo latou fausia le sosooga o le Maota o le Galuega ma tau‘ai le maota o le galuega ma le Malumalu.
Ua tuuaia le aiga i le tele o tausaga e faia o latou uiga e lē tusa ai ma le silasila lautele a le afioaga. E manino e iai ni va faaletagata a nisi o le aulotu ma le aiga lea ua faatulai ese.
O le sailiga a le Faamasinoga na faaalia ai i lana faaiuga o le pule faamatai tausimea ua ave ia Faumuina ma lana fanau.
O le fanua lava ia ua pulea e le suafa Atoa ma o i latou foi ia e faia le faaiuga o soo se tulaga e tulai mai i le fanua.
Peitai ua manino lava le faatuatuaga ua ave ia Faumuina ma lana fanau, e vaai ai soo se suiga e ono tulai mai i le fanua e pei ona ta‘ua.
O le faaiuga a le Faamasinoga ina ia toe foi le aiga lenei o Faumuina i lo latou fale ma faaleaogāina ai loa le faaiuga a le Pulega o le afioaga ina ia faatulai ese Faumuina ma lona aiga.
O feeseeseaiga ia na tulai mai ai foi se isi mataupu ina ua mu se vaega o fale ma le pisinisi a le aiga o Faumuina ae ua faatulai ese lea.
E oo mai i le asō o loo tālia le faamasinoga o le mataupu lea a o tau saili e Leoleo i latou na susunuina le maota o le aiga.
O le masalosaloga lea e ui o loo finau le afioaga e leai se tasi na iai i le maota ma o loo tau saili foi le nuu poo ai na faia lea tulaga. Sa leoleo foi e Malu o le Malo lea nofoaga ina ua tulai mai le mu.
Na feiloai ina ua mae‘a le vaiaso le afioaga ma sui o le afioaga o Solosolo faapea Magiagi o afioaga nei na faamautu ai le aiga lea ina ua faatulai ese e le afioaga.
O lea feiloaiga na faatautaia ai ma faaaloaloga a o talosagaina lava i le va fealoai o afioaga se avanoa e toe talia ai le aiga, e ui o lea ua faamautu mai le finagalo o le Faamasinoga o Fanua ma Suafa, e tāua pea le agai atu o le aiga a ia lē toe tulai mai nisi vevesi.
O faaaloaloga na toe momoli ia i latou na oo atu ma le savali o afioaga nei – o se faailoga ua lē talia le savali i le momoliga atu o le aiga lenei i totonu o le afioaga. O le faamasinoga na laga ai le finagalo o le afioaga e lē toe mananao lava i le aiga lenei i totonu o Tanugamanono.
O le mae‘a o le feiloaiga lea na ta‘u ane ai e le afioaga, i sui o afioaga o Magiagi ma Solosolo e tuu atu se taimi sei toe fono le afioaga ma saili se tasi pe o toe iai se manaoga i le aiga lenei i totonu o Tanugamanono.
Ua toe laga le faatupu vevesi ma le leai o se filemu e tulai mai i alo o Faumuina. Na faalalolalo i latou na momoli atu le aiga ma toe tapa se tofa i le afioaga ma ona taitai, ae e foliga mai e lei tafa lava le finagalo auā e oo mai i le taimi nei o le agai atu lava o le fanau lenei, tulai mai feeseeseaiga ma sui o le aulotu o loo tuaoi.
Ua tālia nei la poo le ā se isi gaioiga e mafai ona faatino e le Toomaga mo Tagata Puapuagatia, lea ua tapa e alo o Faumuina mo se isi fofo e mafai ai ona talia e le afioaga le toe foi atu o lea aiga i totonu o le afioaga.
O Faumuina ma lona faletua o loo aumau i Niu Sila ona o togafitiga o loo moomia ai le siaki i le tele o taimi, ae o o la alo ia ua nonofo ma faamautu ai atina‘e i le afioaga o Tanugamanono.
