Tālia se faaiuga a le Faamasinoga i le mataupu a le aiga o Manuleleua ma Seiuli Titi Sapolu

O loo ua tālia nei se iuga a le Faamasinoga Maualuga i le talosaga a le tina ia Seiuli Titi Grey e toe iloilo ai se faaiuga o Mati o le 2008 na faia e le Faamasinoga o Fanua ma Suafa e faatulai ese ai le tina sa pulea le Aoga Musika a Samoa ma faatautaia ai lea aoga i le fanua i Sinamoga lea ua mafua ai lenei mataupu.
O le avane o lea faaiuga na iu ai ina agai lenei tina i le Faamasinoga Maualuga aua le taumafai ai e aumai se isi finagalo o le Tulafono i le faaiuga ua faia faasaga ia te ia ma ua aafia ai lana aoga.
O le susuga Seiuli sa faaipoipo atu i le Afioga Manuleleua Lagofaatasi, o le sa avea ma faipule o le Itumalo o Faleata i Sasa’e i ona toe aso ma o i laua ma le faletua ia Seiuli sa nonofo ai i le fanua lenei ua faaigoaina o le Siumoo i Sinamoga. O le fanua ua faapea mai le faaiuga a le Faamasinoga o Fanua ma Suafa o le fanua tau Manuleleua i Vaimoso.
O le tuumalo ai la o le alii o le tina ia Seiuli ua faia ai ma le faaiuga a le aiga e see ese le tina lenei mai i le fanua o le aiga. O le susuga George Latu o le loia lea o loo tulai mo le tina ia Seiuli ma na taua e lenei alii i le Faamasinoga Faaitumalo e lei maua mai se iuga o le talosaga ua tuuina atu nei i le Faamasinoga Maualuga ae o loo nofo Seiuli i lona fanua i Vaivase.
Peitai o le faaaliga a le sui o le Aiga o sa Manuleleua o Matavao Ioane Manuleleua i le faamasinoga, e mananao e aveese le ulugalii ua avatu e Seiuli e nonofo ai i le fanua ae o loo iai foi le manaoga e taofi le toe faia o ni galuega i le taimi nei i le fanua e pei ona taua.
O le faamatalaga a Tauiliili Harry Schuster le Faamasino o le Faamasinoga Faaitumalo, e tatau ona faatali muamua i se iuga a le Faamasinoga Maualuga ae e tatau i le aiga sa Manuleleua ona faafesootai se latou loia ina ia vave talosagaina ai le Faamasinoga Maualuga mo se tali e mafai ona aumai i le mataupu.
O lea la ua faataatia ai lenei mataupu seia maea se finagalo faaalia o le Faamasinoga Maualuga.
O le asiasiga a le Samoa Times i le fanua lea e pei ona taua i Sinamoga na iloa ai e ese le ulugalii ua nonofo ai i le fanua lea – o le ulugalii ua iai nei o na avatu e se isi sui o le aiga sa Manuleleua e vaai le fanua a o talia ai se tali o lenei mataupu i luma o le faamasinoga.