Talia pea su’esu’ega ile maliu o Sa’u Justina Sa’u

Sa’u Justina Sa’u: Photo - Samoa Observer
Sa’u Justina Sa’u: Photo – Samoa Observer

E oo mai ile taimi na tuufaatasia ai le tatou lipoti lenei e lei toe maua mai lava se isi faamatalaga mai ile ofisa o leoleo e faatatau ai ile mataupu e pei ona maliu ai se tasi o faauluuluga o ofisa a le Malo, le susuga ia Sa’u Justina Sa’u o Apolima ma Ululoloa.

E tele lava mau faamatalaga eseese e faatatau ile maliu ai o Sa’u Justina Sa’u peitai o lo o talia e le ofisa o leoleo ile taimi nei le faia ai o se taotoga faapitoa e faamaonia ai le mafuaaga tonu na uma ai le soifua o Sa’u lea sa avea ma pule sili o le Faaputugatupe teu faafaigaluega o Mavaega Tausi a Samoa (U.T.O.S.)

I se ripoti mai ile ofisa o leoleo na taua ai, pe tusa o le 4am ile vaveao ole Aso Sa 21 o Oketopa, na taunuu atu ai se valaau mai ile Maota Gasegase i Ulumotootua ma taua ai se tina e 43 tausaga le matua na taunuu atu lona tino maliu ile falema’i.

Na vave ona faasalalau faalauaitele mai ai e le Malo le maliu ai o se tasi o poututoa o le faigamalo e pei ona ia tauveina mai ai le tofiga pule sili ile Ofisa o Mavaega Tausi a Samoa. Tele foi faamaiseiga na faasalalau ai i luga o le social media e faatatau ile tautua a lea tamaitai mai ile tele o tausaga, ae mo le silafia e le mamalu o le atunuu, o le susuga ia Sa’u Justina Sa’u na faaipoipo muamua ma le susuga ia Johnny  peitai na motusia le la mafutaga ina ua maliu ai le susuga ia Johnny ise gasegase oso faafuasei ile masina o Iulai o le 2008. Na toe nonofo mulimuli ane Sa’u Justina Sa’u ma le susuga ia Kolani Junior Lam ma faamautu ai i lo laua fale i Ululoloa ma si a la fanau e to’alua.

O le maliu ai o Sa’u Justina Sa’u na momoli ai faamaiseiga a le taitai o le atunuu, le Afioga ile Alii Palemia ia Tuilaepa Sailele Malielegaoi ile aiga ma le fanau faanoanoa. Taua e le alii Palemia, e fai si umi o le taimi na o laua faasoa ai ma Sa’u ile taimi o le faigalotu a le Malo na faia ai ile Maota Tatalo i Palisi ile afiafi o le aso lulu 17 o Oketopa, ma taua ai e Sa’u e malaga i Fiti ile Aso Gafua 22 o Oketopa e talanoaina ai mataupu ma le ofisa Tausi Mavaega a Fiti, peitai ua faateia o ia o le taitai o le atunuu ina ua oo atu le faamatalaga ile Aso Sa ua maliu ai lea Ofisa Sili. Na viia e le taitai o le atunuu le tautua a lea tamaitai ma ia faamatala ai o se tamaita’i galue malosi ma le faamaoni i ona tiute tauave ile malo, ma e faatuatuaina foi e lana aufaigaluega aemaise o taitai o Samoa.

Ua faalauiloa aloaia mai ai nei e le Ofisa o Tausi Mavaega a Samoa le faaauau ai pea o galuega masani a le Ofisa mo le tautuaina o le mamalu lautele o le atunuu. Ua filifilia foi e le Ofisa Tausi Mavaega le susuga ia Fainu’ulelei James Ah Wai ma pule lua, na te tauaveina le tofiga o le Pule Sili ile taimi nei.

O le tele o mau faamatalaga eseese e faatatau ile maliu ai o lenei Ofisa Sili, na taua ai e le Ofisa o Leoleo e leai ma se faamatalaga o faamaonia ai ile taimi lenei seia vagana ua maea a latou suesuega, ma o lo o talia se fomai faapitoa malaga mai atunuu mamao e gafa ma le faatinoina o se taotoga faapitoa ile tino maliu o Sa’u Justina Sa’u. Ma o le maea ai o lea taotoga faapitoa ona faatoa faailoa aloaia mai loa lea o se aso e faia ai toe sauniga o Sa’u, ae i se pepa o faamatalaga mai ile Malo ile vaiaso na tea nei, na taua ai le ave o le faamuamua a le Malo ile faataunuuina ai lea o suesuega mo le mafuaaga sa’o na uma ai le soifua o Sa’u.