O le aoaoina o le lalagaina o le ie sae, e manatu le Faalapotopotoga a Tamaitai Faipisinisi a Samoa (Samoa Women in Business) e tatau ona amata mai i totonu o aoga.
O se fuafuaga foi lea ua mae‘a ona faalauiloa mai e le afioga i le Minisita o Tina ma Tamaitai, Atina‘e o nuu ma Agafesootai (Afioga Tolofuaivalelei Falemoe Leiataua) i le faamalosia ai o le lalagaina o le ie sae poo le Ie Samoa e pei ona silafia ai i lenei vaitaimi.
E oo mai la i le taimi nei, o loo tālia pea se tali mai a le Matagaluega o Aoga, Taaloga ma Aganuu i se talosaga ua faataatia atu i ai e le faalapotopotoga a Tamaitai Faipisinisi Tauatia‘e, ina ia aoao ai lea tomai faaleaganuu i le silapasi poo le mataupu tau Samoa mo Aoga Maualuluga a le Malo.
“Ua matauina le toatele o tamaitai e faamaamulu mai le Vasega 12 poo le Vasega 13, ma o se tasi lea o agavaa e manaomia ona aoao ai le tamaitai Samoa, aemaise ai o le toe atina‘ega o le ie sae o se measina a lo tatou atunuu,” o se saunoaga lea a Fuimaono Paepaeolemuliaga Rosalia Me, o le sui o le Faalapotopotoga lea o Tamaitai Faipisinisi a Samoa. O lea faamamafa a le faalapotopotoga, o le a aofia ai ma le faatinoina o soo se galuega taulima e pei o le siapo ma le laau vane, ina ia aofia i le silapasi a aoga pe a faamaonia mai lea talosaga.
O le ie sae, na amata ona toe tau faaolaola mai lona lalagaina i le vaitaimi o tulai mai le Afioga ia Tofilau Eti Alesana i le tofi Palemia.
“O se vaavaai lea i se faamāmā avega i le tagi mai o le atunuu ua matuā mamafa sauniuniga faaleaganuu i taimi o faalavelave,” o se saunoaga lea a le Alii Minisita le Afioga Tolofuaivalelei.
O se alagatupe na fesoasoani mai ai Niu Sila i lea vaitau (NZ overseas development aid-ODA) na faatupe ai le toe atina‘ega o le ie sae ma na o le tolu tausaga le umi o lea fesoasoani. O se fesoasoani na faaauala sa‘o mai lava i Tamaitai faipisinisi, ma o le tuutuuga o lea seleni, ua ave ai le tupe i tamaitai e iai le tomai i le lalagaina o le ie sae ina ia lalaga ni ie tetetele ae totogi i le fesoasoani lea.
O se faiga lenei o lea ua vaaia le faaauau mai i le taimi lenei ae ua lē toe sau le seleni mai i Niu Sila ae ua agai sa‘o mai i soo se tagata e iai le manaoga e lalaga ni a latou ie Samoa ae totogi matuauu ma le au seepapa ina ia o latou faatino lea galuega.
O le faalautelega o lenei taumafaiga i afioaga taitasi na lafo i le Matagaluega o Tina ma Tamaitai i se auala e toe lalaga ai le ie sae ona ua tele ina tetele le tosi o le ie malo sa faaaogā i lea foi vaitau.
O le tausaga e 1999 ma toe talanoaina ai loa e le faalapotopotoga o le WIB le toe vaavaai i se auala e toe lalaga ai le ie sae poo le iniini ina ia mafai ai e nisi tamaitai ona toe faaauau le tosi ninii.
Sa faafaigata foi le faatinoga o lea polokalame ona o le tau sue o ni tamaitai aemaise o tina matutua sa latou faaauau mai pea le lalagaina o le ie sae i lea vaitau.
O le tina matua mai le afioaga o Puiai Manono, le tamaitai o Vi Lealava Vaipae lea na agai i ai le faalapotopotoga ma iu ina malie mai mo le faia o ni aoaoga i tamaitai o loo i totonu o le WIB ina ia maua lea tomai ma agai ai i tua i nuu mo aoga a komiti o tina i alalafaga taitasi.
O le fua na amata mai ai o le valu i le sefulu aga lima auā o le ie sae e lē fua i vae e fua i lima o matuauu na amata mai ai lea measina a le atunuu.
Ina ua faagasolo lea polokalame i nuu i tua, na toe fiafia ai loa tina matutua e auai ma lagolago le toe lalaga o le ie sae ma ua tuufaatasia ai loa ma nisi o gagana mo le faatinoga o le ie mai aso anamua.
O le faalelegapepe o le 2001 mo le ie malo tosi ninii, na faalauiloa ai loa le polokalame ie sae ae taatia le ie malo ma sa fono ai loa le faalapotopotoga o le WIB ma le Matagaluega o le lotoifale faatasi ai ma le lagolago mai pulenuu e toe lalaga le ie sae.
O loo faaauau lava la lea polokalame i tua i nuu ma ua toatele foi ofisa ma faalapotopotoga ae o tagata faipisinisi foi ua lagolago ma e totogi lea seleni i le WIB mo totogi o i latou ua mae‘a ona aooga i aoaoga sa faatautaia mo le lalagaina o le ie sae.
E tusa ai ma se saunoaga a se tasi o Minisita Lagolago o le Matagaluega o Tupe, Peseta Vaifou e faapea ua fai faapisinisi le measina a le atunuu, e lei teena e Fuimaono lea tulaga.
“O le taimi nei, a leai se tupe, e lē mafai foi ona faatino le galuega a tamaitai o loo taumafaia lea atina‘e,” o se saunoaga lea a Fuimaono.
Na ia faaalia foi, o le vaai ma le faanoanoa i le ie o le malo ua fai faataelega i vai, ua vaai foi i le lē ano o tina e toe lalaga le ie sae ma fala, ma le vaai i le aganuu ua lē mamalu lea ua toe atina‘e ai le ie sae.
Ua galulue faapaaga lava la le faalapotopotoga a Tamaitai Faipisinisi Tauatia‘e ma le Matagaluega o Tina ma Tamaitai i lea foi atina‘e ma o tofi poo sui tamaitai o nuu lea o loo unaia lea atina‘e mo tamaitai o le atunuu.
O loo agai i luma lea atina‘e ma ua soo foi le atunuu i le polokalame o loo faagasolo pea.
E ta‘ilua vaiaso ma agai asiasiga a le faalapotopotoga o le WIB e asia le polokalame, ma o le ala lea o le taumafai pea i la latou talosaga ua faataatia atu nei i le Matagaluega o Aoga.
E iai le faanaunautaiga o le faalapotopotoga ina ia talia lea talosaga ma o le a mafai ai foi ona faasoa atu matuauu aemaise tina matutua o loo taumafaia lea atina‘e i le tupulaga mo le faaauau ai o le atina‘ega o lea foi measina a le atunuu.
