O le tamaitai valu tausaga le matua o Marie Tiatia o le aoga tulagalua a Lalomalava i Savaii na ia tusia se tusi talosaga ma ave i le ofisa o le Malo o Niu Sila i Apia i lona fia vaaitino lava i se vaalele helikopa.
O le talosaga a le tamaitai aoga o le tausaga valu a Lalomalava Primary School, na mafua ina ua vaaia ma faalogoina i eleele o Samoa vaalele helikopa o le fitafita o le vateatea a Niu Sila lea o loo auai i se faataitaiga a lea fitafita i Samoa.
Na talia e le sui o le malo o Niu Sila i Samoa le talosaga a le tamaitai o Marie ma malaga faapitoa ai le tasi o vaalele i Lalomalava i le vaiaso na tea nei lea sa lolofi atu ai tagata o le nuu ma le fanau aoga o loo aoaoina i le aoga tulagalua a Lalomalava e faafeiloai le taunuu atu o le vaa. Na faatino e le aoga ma le nuu se tali faaaloalo mo alii pailate ma nisi o fitafita na malaga e tali le talosaga a le tamaitai aoga. Faaalia i se pepa o faamatalaga le faafiafiaina o le tamaitai o Marie ma ua ia faafetaia le sui o le malo o Niu Sila ona ua tali manao ma ua telē se tāua mo ia a o feagai ai ma aoaoga i lona tulaga o se tamaitai laititi.
Atonu o se tasi lea o vaega tāua i le iai i Samoa o ia fitafita ma ona vaalele helikopa ona ua mafai ona auala atu ai se isi a‘oa‘oga tāua mo fanau a le atunuu.
O le iai foi o nei vaalele i lo tatou atunuu ua mafai ai ona fesoasoani i nisi o galuega a le Malo sa fia faatino ae sa le mafai ona e faigata ona maua ni auala faapea o felauaiga.
O se faaaliga mai le ofisa o le Hai Komesina o Niu Sila i Apia na ta‘ua ai o le taliaina o le tusi a le talosaga a le tamaitai o Marie, o se lesona lelei foi lea mo nisi fuafuaga faapea ile lumanai e malaga mai ai ni fitafita a Niu Sila mo ni aoaoga ma faataitaiga i Samoa.
O le vaiaso nei e faatino ai e vaalele helikopa e tolu o le fitafita se faaaloalo i le Aso Faraile aso muamua o Iuni e faia ai le sauniga o le sisiina o le fu’a i Mulinuu mo le amatalia o polokalame o le Tuto’atasi.
E lua vaiaso o loo iai i Samoa vaalele helikopa e tolu o le fitafita o le vateatea a le Malo o Niu Sila mo ni aoaoga ma faataitaiga mo le faia o galuega laveai i atunuu o le teropika e pei o Samoa.
