O le vaiaso na se‘i mavae atu nei na amatalia ai taualumaga a le Faamasinoga i le mataupu i le va o sui ia na tamomoe mai le itumalo o Anoamaa i Sasae, le susuga ia Moefaauo Lufilufi ma le susuga ia Alai‘asa Filipo Schwartz Hunt.
I le toe faaauau ai la o molimau a le itu a Alai‘asa, na tulai le tamā ia Faitaumatau Eli Mata‘avao mai le afioaga o Falefa i le fofogaina o lana molimau i luma o le Faamasinoga.
I le molimau la a lenei tamā, na ia ta‘ua ai o ia sa komiti ia Moefaauo ma sa auai foi i le fono lea sa faia i le aso 22 o Fepuari o le tausaga nei lava a o lumanai le palota. Ma o le ala o lona tulai e molimau mo le itu a Alai‘asa ona na te tetee i tufaga tupe ia sa faia e Pereise i tagata palota ia sa auai i lea fono.
“O le fono lenei sa faia i le maota o Moefaauo i Lufilufi, ou te ta‘ua lava e a‘u o le fono a komiti ma tagata palota, ma na faamanatu mai lava e Pereise e manatua Moe i le palota”, o le saunoaga lea a Faitaumatau i le taimi o lana molimau.
Peitai na fesiligia e le alii loia o loo tulai mo Moefaauo le susuga ia Solomona Toailoa lea tamā, pe aisea na ia lē teena ai le $50 pe afai na ia iloa o se solitulafono poo se auala e faatosina ai o ia e palota mo Moefaauo, ae na tali o ia sa komiti ma e alagatatau ona maua tupe mo le komiti ae o le faatosina tupe ia na tufa e Pereise i tagata e le komiti lea na auai i lea fono.
I se molimau a se tasi o tamā mai Falefa lava o Visesio Fanua na ia ta‘ua ai foi lenei tufagatupe na faia i lea fono ma na ia ta‘ua o Alai‘asa Tavita se tasi o komiti a Moefaauo na oo atu i lona fale ma logoina o ia o le a faia le fono i le maota o Moefaauo.
Faaalia e lea tamā lona tetee i le ta‘u komiti o nisi o i latou na auai ae lē komiti ma e $20 lana tupe na maua i lea aso lea na te mautinoa o se auala e faatosina atu ai latou e palota mo Moefaauo ae lē o Alai‘asa.
I le molimau lava a Fanua na ia ta‘ua ai i luma o le Faamasinoga, na o le pau lava lea o le ‘auga o lea fono o le faamanatu mai i tagata na auai e palota mo Moefaauo, ma na mae‘a le fono fai la latou inugati ma tufatufa ai seleni e pei ona ta‘ua muamua ma toe foi loa i o latou aiga.
I molimau lava a lea itu, na tolaulau ai le molimau a se tasi foi o tamalii mai le afioaga lava o Falefa, le tofa ia Loi Alo. Ta‘ua e lea molimau na maua foi lana $50 tala ma na saunoa atu foi Pereise e ‘Manatua Moe i le palota’ ma e lē o ia o se komiti a Moefaauo.
Faaalia e lea tamā na ala ona ia avea le tupe ona e leai se tagata sa i le fono na teena nei seleni ma o le ala foi lea na ia lē teena ai.
Na fesiligia foi e Toailoa pe na ita ina ua ave le tagi a Moefaauo e faasaga ia Alai‘asa ae na tali e leai. Na pau le itu na ia manatu ai e faia sana molimau e tali atu ai i le molimau a le tina ia Pereise lea na ia faalogo ai i luga o le leitio.
Na laga se finagalo o le afioga i le alii Faamasino ia Lesatele Rapi Vaai e tali atu ai i le molimau a lea tamalii, ma na faaalia lona lē fiafia ona na faamanatu i lea tamā lana tautoga i le moni o lana molimau ma e mafai ona molia o ia i le tulafono i lona pepelo i le Faamasinoga. Ta‘ua e le alii faamasino, o le molimau a Pereise na fofogaina i le aso 12 o Aperila ae o lana molimau na tapena i le aso 6 o Aperila.
