O le alii e suafa ia Norris Kennach – o se alo e faasino i le Komesina Lagolago o loo pulea nei le falepuipui i Tafaigata, le Afioga Seana Uili – ua pei o se vaisu a le alii talavou lenei le taofia i le toese i Tafaigata, sola ese, solitulafono ma toe taofia foi.
E umi se taimi o tau saili le alii lenei ina ua sola ese i le tausaga na tea nei ma e foliga mai o moliaga ia ua faamaonia lona faia i lenei vaiaso, na faatino e lenei alii a o sola i tua ma le vaaiga a Leoleo i Tafaigata.
O moliaga fou nei na ta‘ua e le lipoti a Leoleo na gaoia ai e lenei alii ni meatotino e pei o se moavao, o se iliafi atoa ai ma isi meafaigaluega o se maota o se tamalii i Salani i Falealili e suafa ia Fuimaono Esera.
Faaalia i le mau a le faletua o Fuimaono, Temukisa Rimoni, sa talepe lo la fale ma aveesea ai ni meatotino e pei o laau malosi, moavao ma le iliafi. O le masani a lea ulugalii, o le tuua o lo la fale ae agai mai i Alafua ona toe foi ai lea i Salani, ae peitai o le aso tonu na gaoia ai ia meatotino na malaga mai ai i Alafua ae sa ia mautinoa sa loka le faitotoa o le potu sa teu ai ia meafaigaluega.
“Sa vaaia le faitotoa o le potu na teu ai meafaigaluega, ua vane ma sa vaaia ua toesea nisi o meatotino, o laau malosi e tolu, lua moavao ma le iliafi e tasi. Sa ta‘ua foi i se mau a se tasi o alii mai Salani, sa uu atu e Norris se laau malosi ma faapea ane, sa avatu i le fale o Fuimaono, ae o nisi o mau na ta‘ua ai foi, ni faatauga i ni tupe na avane e Norris i nisi o taulelea o le nuu ma e masalomia o le tupe lea e mai i le isi solitulafono.
O isi moliaga ua faamaonia na aofia ai foi le talepe e lenei alii o le faletalimalo ua faaigoaina o le Salani Surf Resort ma ia ave ai se ato tupe a se tasi o malo o lea faletalimalo.
E $800 tala Amerika na gaoi e lea alii ave ai ma se i-phone, o se palanikeke ma isi foi meatotino a le palagi na nofo ai i lea faletalimalo. O le vaiaso fou la lea ua tuu i ai se faaiuga a le Faamasinoga Faaitumalo e faatatau i moliaga fou nei, ae o loo tālia foi se faaiuga i le sola ai o lenei alii mo ni masina ae lei maua lava.
Na toe foi atu lava lona aiga ma toe faafoi i le toese ina ua o latou maua le nofoaga na lafilafi solo ai. Ua tele faamatalaga ua faia i lenei alii talavou ona o lea e pule le tamā i le toese i Tafaigata, ae e tausolomua i lenei alii le sola ese mai i le falepuipui.
E lē gata i lea o le fai soo o lana amio lea o le gaoi ma le talepe fale, ma o lea foi la ua toe taofia i le toese e faatali ai le faaiuga i moliaga fou ia ua faamaonia.
