Ekalesia EFKS Blenheim ma le latou faifeau le susuga ia Peniamina ma le faletua

O le susuga i le faafeagaiga ia Rev Peniamina Faalave ma le faletua ia Rita Faalave na ulufale atu i le kolisi faafaifeau i Malua i le tausaga e 2014, ae na faauu mai i le Kolisi i le tausaga 2017. Sa galulue i laua i le ekalesia EFKS i Tamaki i lalo o le taitaiga a le susuga i le faafeagaiga ia Rev Eperone Futi ma le faletua ia Mafa Futi a’o lei tuuvaa atu e a’otauina i le Kolisi i Malua.
Na mae’a le aoga i Malua ma faaiuina ma le manuia lo laua taumafai ma toe taliu mai ai ma toe galulue i Tamaki i Otara, ma le la naunautaiga e fia o faamisionare i Jamaica e tautua le Atua ma lona finagalo i lea itu o le galuega. Peitai e lē vaoia e se tasi le valaau a le Atua i le mea e galue ai, auā o manatu o le tagata e lē o le finagalo lea o le Atua, o ala o le tagata e lē o ala foi ia a le Atua.
O le ekalesia EFKS i Blenheim sa faavaeina mai i le tausaga e 2008, i lalo o le taitaiga a le susuga i le faafeagaiga ia Rev Faleulu ma le faletua, a’o galulue foi i laua i le ekalesia EFKS i Nelson. Sa tauave lua le galuega i lea vaitaimi ina ua manaomia mai e tagata Samoa o loo aumau i Blenheim sa ekalesia i lea itu o Niu Sila. Ina ua mautu le lotu ona tau saili lea o se faifeau e galue ai.
Na tasi le filifiliga a le Ekalesia i le Susuga i le faafeagaia ia Rev Meni ma le faletua ia Siliva, ma faapea ai loa ona osi le feagaiga i lea taimi seia oo ina malolo penisione le auauna a le Atua ma lona faletua i le tausaga 2017, ma tatala ai loa le latou feagaiga i le tausaga 2018.
A’o tau saili se faifeau e faaauauina le galuega, sa tusi aao faatasi le ekalesia i le susuga ia Rev Peniamina Faalave ma lona faletua ia Rita Faalave e avea ma faifeau e tausia le lafu mamoe i totonu o Blenheim. Sa talia fiafia e le susuga i le faafeagaiga le valaau, auā o le ola ofoina mo le Atua ma lona finagalo poo fea lava e sau le valaau e galue ai e tulai lava i luga ma talia le valaau.
O le taimi muamua lea ua tausi nuu ai le susuga i le faafeagaiga ma lona faletua, ae ua ia saunoa e faapea e ese foi le matagofie o le aai ua valaauina i ai laua, e filemu e leai se pisa pe gase i le tele o taimi.
O le faaiuga o le vaiaso ua mavae na malaga atu ai aiganalua o le susuga i le faafeagaiga ia Rev Peniamina Faalave ma le faletua ia Rita Faalave e momoli atu le latou taulaga soifua e osi feagaiga ma le ekalesia EFKS Blenheim. O se feiloaiga fiafia sa iai i lea aso auā o le faaamoemoe ua taunuu o le laau lea o le ola, e pei ona iai tulaga masani i le sauniga lotu ma faaaloaloga e pei ona masani ai Samoa i lana aganuu.
E 17 matafale o le aulotu ua iai, a’o aiga nei, o tagata sa malaga mai i Samoa i le kuota, na omai i pepa faigaluega o faatoaga vine, o fale faigaluega e fai ai le maso ma le fale fasimanu.
Ua fiafia lava i latou i lea itu o Niu Sila ma ua ola fiafia ai foi fanau, o latou ia o loo tumu ai le lotu.
E lē misi se tausaga ma omai tagata Samoa i le kuota, ma o le fiafiaga sili foi lea ia i latou o le omai ae o loo iai le aulotu poo le ekalesia e galulue ma lolotu ai. O le tele foi o tausaga e sau ai malaga mai Samoa, o galuega faavaitaimi i le pikiina o fualaau’aina aemaise le vine, ma faapea foi ona mafuta faatasi ma le ekalesia.
O Rev Peniamina Faalave e mai le afioaga o Faala i Paluli, Safotulafai, Vaiala ma Lotofaga, ae o lona faletua ia Rita e mai le afioaga o Lepā ma Samata.