E ui ina ua pei a galo atu tiga ma mafatiaga sa feagai ma le atunuu i Samoa, ona o le toatele o aiga, uo, ma e pele sa toesea faafuasei ona o le mafuie ma le galulolo sa aafia ai, peitai ua faamaonia mai, o loo toatele pea nisi ua manaomia se fesoasoani.
E le o le itu tau taumafa, aua oloo ua fau ma lava pea meaai, faapea foi vai inu.
O lavalava foi ma isi mea totino e oo lava i fale ma tupe, o loo mautinoa o loo lava tapena, ma oloo solosolo manuia lona faasoasoaina.
O aafiaga o le mafaufau, o se tulaga faigata tele lea, O aafiaga foi o le tino ini taaviliga faigata sa feagai ma nisi i le taimi sa felafolafoaina ai e galu malolosi ma le maualuluga o le galulolo, o le tasi foi lea faafitauli e fai lava si umi o tau fofo ma toe faasaosao lelei itutino, ona o le tiga ma le oia.
O le mafuaga tonu lea sa tuuina mai ai se talosaga mai le Matagaluega a le Soifua Maloloina i le atunuu, mo le fia maua o se fesoasoani mai NZ.
O lea manaoga faapitoa, ua tali nei iai nisi o loo iai le agavaa ma le tomai, i le faia o lea ituaiga fesoasoani.
O fofo o mea tiga o le tino, atoa ai ma aoaoga faapitoa e faafilemu ai mafaufau o i latou sa matua aafia tele ona o le faalavelave sa tupu. O le galuega tonu lea o le a feagai nei ma le vaega o i latou ua ofoina o latou taimi ma le tomai, ma ua sauni e malaga i Samoa mo le faationina o lea fesoasoani.
O le vaiaso nei i le aso 25 o Fepuari, o loo fuafua le aumalaga a le faalapotopotoga a le NZ Trauma & Recovery Team, e tuua NZ, mo le atunuu. O i latou nei o alii ma tamaitai fomai faapitoa a Niu Sila, faapea ma nisi mai fafo. O le a latou fesoasoani i nisi o fomai faapitoa o le Soifua Maloloina o le atunuu, e leai se totogi o le latou auaunaga. E faapitoa lo latou tomai mo le fesoasoani ma le laveaiina o tagata ua aafia i mala faanatura ma faalavelave faafuasei. O nisi o auala fesoasoani, o le faatalatalanoaina lea o tagata i auala mo le faamaloloina o le mafaufau, ona e tele le aafiaga o mafaufau o tagata mai mala e pei o le sunami.
O se tala lata mai i le faaiuga o le vaiaso na tea nei, mai le vaega lea, ua faamaonia mai, ua ofoina e le fale talimalo o Aggie Grey i Apia, ma ua fesoasoani mo le faamautu ai i le taimi taunuu atoa ai ma le umi o le a iai i le atunuu.
O le faatupeina atoa o lea fesoasoani, e tusa ma le $17,000. O se vaega tupe mulimuli o loo manaomia e oo mai i le taimi nei, e tusa ma le $6000. Ona pau lea o le tupe o totoe, ma manaomia mo le faamoemoe.
O loo talosagaina e lenei au malaga, le fesoasoani tupe a tagata Samoa. Mo soo se tasi lava e fia fesoasoani ane i le vaega tupe o loo tau sailia nei, e mafai ona silasila i le tuatusi lenei, www.traumarecoveryteam.org.nz, pe faafesootai ane le telefoni feaveai 021 701 138.
