Talia e le Peresitene Koluse Mumu a Samoa le $10,000 mai le Canon NZ

O le anavatau ma le mau tauave a le kamupani o le Canon New Zealand, “Soifua ma Galulue Faatasi mo le Manuia Lautele”. E talitonu le pulega a lea foi kamupani tele i totonu o Niu Sila, o le tuuina atu o se fesoasoani tau seleni e faaopoopo i nisi o foai tupe ua tuuina atu mo Samoa talu mai mafatiaga o le galulolo, o se tulaga ua talafeagai ma le mau tauave a le kamupani e pei ona talitonu i ai.
Na taua e se tasi o tamalii o le atunuu o loo pulea le faasoasoaina o galuegafai ma le vaaia lelei o paaga a lea foi kamupani, le susuga ia Laufale Tanu Tautala, ua matua malilie ma autasi finagalo o le pulega ma le aufaigaluega a le latou kamupani, e tuuuina atu ma foai se vaega tupe e $10,000, e faailoa atu ai foi lo latou manaoga ina ia tiga faatasi ma tagata o Samoa sa sili ona mafatia, e le gata i soifua sa toesea, a o le tele foi o meatotino sa faaleagaina ona o le mafuie ma le galulolo.
E le gata ia i latou sa sili ona pagatia, ae faapea foi tagata uma o le atunuu aua o Samoa o le aiga lava e tasi pe afai e tuutuu i le loloto lona gafa.
O Laufale Tanu Tautala, o se tamalii mai le afioaga o Sataoa, ma o Sataoa foi o se tasi o afioaga sa aafia tele i le galulolo.
Ua silia ma le luasefulu tausaga talu ona alaala Laufale ma le aiga i Niu Sila nei, peitai o se tamā e taulai pea lona mafaufau ma agaga tele i ona aiga ma uo atoa ai lona nuu ma si ona atunuu o Samoa.
Sa ia taua, ma faamaonia mai foi i se talanoaga ma le Samoa Times, ma sa ia taua ai e leai se isi tapenaga mo i tatou e tali atu ai i mala faalenatura e pei ona tulai mai i le taimi ua mavae, ae na pau le lagona ua oo mai, o le taumafai e tutu faatasi, galulue faatasi ma tapena soo se fesoasoani e mafai ona faatinoina, e fesoasoani atu ai mo i latou sa mafatia tele i sauaga a le galulolo.
O le Aso Faraile o le vaiaso na tea nei, sa feiloai ai i le nofoaga autu o le Koluse Mumu i le Pasefika atoa i Aukilani, le susuga ia Tanu ma le afioga ia Muagututagata Pita Ah Him, o le Peresitene foi lea o le faalapotopotoga a le Koluse Mumu i Samoa, faapea le susuga ia Tautala Mauala, o le Failautusi Aoao a le Koluse Mumu, ma tuuina atu ai loa le meaalofa o se siaki tupe e $10,000.
Sa taua e Tanu sa fai ma sui o le kamupani a le Canon NZ, o se fiafiaga sili ina ua fetaui le malaga mai o le Peresitene ma le Failautusi Aoao o le Koluse Mumu, ma le maea ona soalaupuleina o sina fesoasoani a le latou kamupani, maua ai loa ma le avanoa e tauaaoina atu ai sia latou foi taumafaiga.
O le lagona lava foi e tasi sa saunoa i ai le susuga i le Pule Sili o le kamupani le susuga ia Mike Johnson (Country Manager Canon NZ, o le manatu lava ia oo atu sina fesoasoani e ala i sina tupe, e faatino ai agaga ootia ma le alofa.
O le saunoaga lava lea a le alii pule, sa ia toe taua ai e le gata i le tupe ua foai e le kamupani, peitai o loo iai lava foi nai isi seleni o loo aoao malie mai tagata lautele o le kamupani lava latou mai a latou lava taga, e faaopoopo ane i le vaega tupe e pei ona tuuina i le siaki.
Ua manatu Mike ma Tanu ma le kamupani atoa, e tuuina atu lea fesoasoani i le faalapotopotoga a le Koluse Mumu, ma le faamoemoe e fesoasoani mo le toe faaleleia o fale ma tulaga uma tau le atinaeina ma toe faafoi le tamaoaiga ma le soifuaga e pei ona sa masani ai aiga ma afioaga sa matua faaleagaina meatotino i le mafuie ma le galulolo.
O le isi itu sa faatauaina tele i le finagalo o le alii pule ma lea foi tamalii o le atunuu, o le faailoa ma faamantu pea lea i tagata Samoa ma soo se tagata Pasefika, le latalata tele o le mafutaga faaleuo a tagata Niu Sila ma ona tuaoi.