O le faaiuga o suega a le fanau mai lava i le vasega tausaga valu, sosoo ane ai ma le tausaga 12 faapea le vasega tausaga 13, na mapuna mai ai i fafo faitioga faasaga i le Matagaluega o A’oga Taaloga ma Aganuu.
O faitioga i le maualalo o le tulaga pasi o fanau mai mataupu sa sueina aemaise o faitioga i le tulaga o loo faafoe ai e le matagaluega le a’oa’oina o fanau a le atunuu. Peitai o ni faitioga ua ta’utino le Minisita o A’oga le afioga Loau Solamalemalo Keneti Sio e sa’o auā e tāua faitioga, ae o le faalauiloaina o tusi o faiga faavae a le matagaluega na ia faailoa ai o nisi faitioga ua tuua’ia ai lona tofi e lē o iai se aogā o lona tagata e avea pea ma minisita.
“Ae sa’o faitioga, ou te lē ita ai o faitioga lelei. O la e sau le isi faitioga e ma’umau le taimi e saga minisita ai e lē aogā, e sa’o ioe..tatau ona sui ae lē suia la na’o le minisita e sui uma tatou, e alu ai ma le VC e alu ai ma le CEO leaga o le galuega e alu atu a tau i lalo, e sa’o faitioga ona e tatau ona iai se outcome o tatou mea ia e fai”.
O le taunuuga o suega o lenei tausaga na faaalia e le tamaitai Pule Sili o le Matagaluega le afioga Afamasaga Dr Karoline Fuata’i ua siitia le tulaga o fanau ua pasi i mataupu e pei o le gagana peretania ma le numera peitai e lē o se siitia ua oso maualuga ae o loo faasolosolo i luga.
“O le itu lelei lena e alualu mālie e faapena foi i le tausaga ua mavae ae e iai lava le galuega e manaomia e saga faaleleia ai”.
E 1,752 fanau a le atunuu sa sue i le tausaga 13 o le tasi le afe ma le sefululima e ausia togi poo maka e ulufale ai i le vasega faavae o a’oa’oga faaiunivesite poo le Foundation, ae o le isi onoselau ma ona tupu e maua togi e ave ai mataupu i a’oa’oga o tomai faamatata eseese i totonu lava o le Iunivesite Aoao o Samoa.
O tusi taiala ma faiga faavae a le matagaluega o a’oga ua faalauiloa ua fautuaina e le Minisita le tatau ona savavali ma mulimuli ai mo le a’oa’oina o fanau, ae lē na’o le tumu ai kapoti ma fau i luga o laulau ae lē faaaogāina.
Na saunoa le minisita e tatau ona iai ni fua lelei o faiga faavae ma taiala ua faataoto e le matagaluega.
O le ki atoa o le fuafuaga a le Malo e pei ona faaalia e le Minisita o Aoga o le a’oa’o o fanau ia popoto ma atamamai o le lumanai o le Malo ma le atunuu i tausaga oi luma.
