O le aso 23 o le masina nei Aukuso, lea ua tuu atu i ai le feiloaiga e tatau ona toe faia e le afioaga o Fausaga ma le Faamasinoga o Fanua ma Suafa e faamanino ai e le nuu le mafuaaga tonu ua faatea ai le Tuua o le afioaga mai i le fono a matai ma faipule mo le 50 o tausaga.
O le fetalaiga ia Toeoso Taulauniu lea na faatea i le lua vaiaso talu ai ona o le iai i le faapaiaina o le suafa SULA i le tamaitai o Ofeira Vaafusuaga Ati Gussaway o Fausaga ma Texas Amerika.
O se alo o le uso o le toeaina e suafa ia Toleafoa Tua‘ena o Fausaga ma o Toleafoa Tua‘ena na faaeeina le suafa ona o lana mau ua afu le tautua a lea alo o le aiga ma o Toleafoa ma le suafa Laumatia e aiā uma ma pulea le suafa SULA.
O le tetee na solitu ai e le nuu lenei saofai ona o le manatu e lē o se alo tonu faasino ia Toleafoa Tua‘ena lea tamaitai ma ua faaee le suafa ia SULA e aunoa ma le finagalo autasi o isi e ana le suafa e aofia ai le suafa Laumatia.
O le vaiaso la na tea nei na feiloai ai itu e lua, o Toeoso Taulauniu ma isi matai e toafā na auai uma i le faafotutupu lenei ma faapea ona faatea uma e le afioaga, o sui o le Fono a Alii ma Faipule o le afioaga o Fausaga i luma o le Faamasinoga o Fanua ma Suafa.
E lei iai se isi o itu e lua na tuualalo ina ia saili se tasi i luma o le Faamasinoga ae na talosaga le afioaga i ona matai ina ia toe tuu atu le mataupu e talanoaina i Fausaga Safata ma taatia ai loa le mataupu faapea.
O le mae‘a mai o lea feiloaiga na saunoa ai loa le fetalaiga ia Toeoso Taulauniu ma faalalolalo i le afioaga i le tulai mai ai o lenei feeseeseaiga.
Ae na tali le nuu e tuu lea mataupu e aua le talanoaina i Mulinuu seia mae‘a ona toe feiloai le nuu i se taimi lata mai a o lei oo atu i le aso 23 o le masina nei.
O le taimi muamua lenei ua faia ai se nofo faapea ina ia aloaia ai le suafa sa‘otamaitai o SULA.
Mai i le talaaga o lea suafa taupou, e tele lava ina faalagilagi ai tamaitai o aiga e lua o sa Toleafoa faapea sa Laumatia ma o le isi foi lea popolega na ta‘ua e sui o le suafa Laumatia ua tetee ai ona o le ma‘oti o le faaee atu o lenei suafa, o le a faapea ona faataatia ai loa ma le alafua o le a faatali ai lava seia tuu‘oti le suafa ona faato‘ā see loa lea i le isi itu, ma o le popolega o ia matai o le a tulai mai ai loa le mau finauga ma feeseeseaiga.
O le mau a le itu na faaeeina le suafa taupou ia Ofeira, o loo manino lava e mafai ona faaee le suafa taupou i alo tamaitai o aiga ua patino i ai le suafa. “Ana mananao foi i latou e fai se latou SULA, o ai o taofia,” o le mau lea a le aiga o Ofeira.
“A o lea ua faato‘ā agai le matou aiga e faaee le suafa i se tasi o le fanau ua manino le tele o lona sao ma o le a tele foi lana fesoasoani mo le nuu ma le itumalo i le lumanai, a o lea ua agai mai taofi”.
O lea la ua tuu atu i lenei vaiaso pe feiloai itu e lua e tau saili se tasi i lenei mataupu aemaise o le toe iloilo pe mafai ona toe a‘e atu Toeoso Taulauniu ma isi matai ua faatea e le afioaga i le afioaga i le taimi nei.
