“E lē o teena e le matou ekalesia le iuga a le faamasinoga ia fua le fanua”.
O le finagalo lea o le tofa Vaatiuola Lautolo Misi, o se matai o Mulifanua ma le ekalesia EFKS i Fuailolo‘o ina ua tāpā sona finagalo e tusa ai ma le tolopo o le galuega o le fuaina o le fanua o loo iai le ekalesia lea sa mafua ai se faamasinoga ma le afioga Taimalelagi T Tilialo, o se suli o le aiga o Tupuivao e faasino i ai le fanua.
O le faaiuga a le Faamasinoga Maualalo o Fanua ma Suafa na faamaonia ai o i latou e iai le pule o le eleele, e pei ona saga faamautuina i se faaiuga a le faamasinoga o talosaga apili na fofogaina i le masina na tea nei o Iuni.
O le amataga o le vaiaso na tea nei na oo atu ai loa Taimalelagi ma lona uso masaga o loo suafa i le Tupuivao e faatino le finagalo o le faamasinoga ia fua le eleele. Peitai sa lē taunuu lea ina ua tau aliali mai ni feteenaiga ma nisi o aiga o loo alaala ma nonofo tonu i o latou fanua e latalata i le eleele o loo fia fuaina.
“O le mafuaaga lena o le taofia o le galuega, ona e lē o mananao aiga na e soli o latou eleele i le fuaina o le fanua.
O le isi itu e lei feiloai matou ma le isi itu e soalaupule muamua le faamoemoe e tusa o ala o mea, aemaise o se vaega lena o le faaiuga a le faamasinoga”.
O le faamalamalamaina lea e Vaatiuola o le mafuaaga na lē taunuu ai le fuaina o le fanua. E ioe foi le fetalaiga Vaatiuola o le faaiuga ua aumai o le mataupu ua manino ai vaega sa nofo lē malamalama ai nisi o le ekalesia aemaise o totonu lava o le nuu.
“E lē o le fanua atoa e aafia i le fuataga ae ua na o se vaega pe tasi pe lē atoa foi se eka”. O le finagalo lea o le tofa i le Tuua ina ua fesiligia i se aofaiga o le eleele e lavea i le faaiuga a le faamasinoga.
Na ia faaalia foi o le iuga lea a le faamasinoga o loo faapea mai ua na o se vaega o le fanua ae lē o le eleele atoa o iai le lotu.
E lē o noatia foi le ekalesia mai le faia o soo se atinae i luga o le eleele sa finau ai, ona o loo faatumau e le faamasinoga le faavae na sau ai le faaaogāina o le fanua mo le lotu.
O le Aso Gafua o le vaiaso nei, 12 o Iulai 2010 o le a feiloai ai i Mulinuu le ekalesia ma Taimalelagi ma lona aiga Sa Tupuivao e faasino i ai le pule o le eleele mo le soalaupuleina o le galuega o le a fuaina ai le fanua e tusa ma le faaiuga a le Faamasinoga o Fanua ma Suafa ua mae‘a ona fofogaina.
“E malamalama lava le ekalesia i le faaiuga ma ua taliaina foi”, na toe saunoa mai ai Vaatiuola i le tusitala.
