O le aso 25 o Ianuari o le mafutaga mulimuli lea a le tina ia Faamasamasaletaioaana Asi Faasau ma lana fanau, a’o lei faamanavaina e le Atua ana galuega.
O le taimi foi lea na fai ane ai le tina i lana fanau e so so atu i ona autafa, ona faapea ane lea o ana toe upu, “I am sorry”. E faatolu lava ona ia fai lana tala i lana fanau ma nisi o le ekalesia Emanuelu sa iai, ma lana tala mulimuli, ‘o lea ua omai tagata Paia e ave a’u i le faaipoipoga’, ona to loa lea o lana mānava.
A’o lei tuua e le tina le mafutaga ma lana fanau faapea nisi o lona aiga ma tagata o lana ekalesia ae alu a’e i le lagi i lona malo tumau, na ia faalogoina ai le leo o lana tama ia Fritz o faapea ane, “Mom o lea ua ou faia le mea ua e manao iai, e ala lea i lo’u taliaina o Iesu Keriso e avea ma alii ma faaola i lo’u olaga.” Na uma loa upu ia a lona atalaii ona ia saunoa ane loa lea i ana upu mulimuli e pei ona ta’ua i luga, ma maliu ai lava.
O le auauna a le Atua na ia iloa lona taimi e ola ai ma le taimi e oti ai, auā ua uma ona polokalame e le Atua lona soifua galue i totonu o le lalolagi ae lei toe mafuta faatasi ma lona matai. Le auauna lelei e, ma le faamaoni, ua ulufale atu ma le fiafia i le manuia o lona Alii.
O ana galuega lelei ua mulimuli mai ina ua tupu ma ola le fatu sa ia totoina i loto ma agaga o tagata aua le malo o le Atua. O fua ia o ana galuega na toe molimau iai le toatele o nisi o tagata sa faafailele e lenei loomatua o latou olaga faaleagaga, i lona sauniga faaleaiga i le po o le Aso Lulu o le vaiaso ua mavae i le malumalu o le ekalesia Livingstone Evangelism Ministry i Magele.
E lei iai se molimau e lei ta’ua ai uiga alofa ma uiga ote o le tina i totonu o le galuega a le Atua. Ae o lea ote e tasi lava le auga o lona faamoemoe ia ola matata’u tagata uma i le Atua, ma ia aua ne’i faatagā faia se mea i le Atua ma lona finagalo. O ana upu e tuusa’o lava faamatalaga i le tagata, e lē afeifeia, auā o loo manao e momoli sa’o le alofa moni faale-Atua i tagata ina ia latou iloa le moni o le faaolataga a Iesu, ma ia aua foi ne’i faapa’ole le galue a se tagata i le Atua.
O le taeao o le Aso Tofi na faamavae atu ai loa le tele o tagata na latou iloa le faaolataga a Iesu i lenei tina, aemaise lava i le ekalesia Emanuelu, i lona sauniga mulimuli i le malumalu o le Church Unlimited i Te Atatu, ma o i foi na molimau ai loa le fanau a le loomatua le alii o Fritz ma lona uso laititi ia Otto Zoll i le latou mafutaga ma le tina.
Na faatasi ai ma molimau a le ekalesia Emanuelu lea na saunoa iai nisi o susuga i faafeagaiga sa avea ma faatonu tuai o le galuega i Ausetalia ma Niu Sila, le susuga i faafeagaiga ia Ps Mafualii Lima ma Ps Tanuvasa Toomata. O le molimau a le aiga o le tina na saunoa iai le susuga i le faafeagaiga penisiona o se tasi o lupe faalele a le aiga ua leva ona galue i totonu o le ekalesia EFKS ia Rev Gutu Faasau, ae o le peresetene aoao o le ekalesia Emanuelu i Niu Sila ma Ausetalia ia Rev Mika Lagavale na mānavaina le upu faauuina a le Atua, ma molimoli atu ai loa lona sa i lona oliolisaga tumau i Waikumete ma lagomau ai.
Soifuaga o le tina i totonu o le aiga
O le suafa o le tina o Faamasamasaletaioaana. E afua mai le suafa o le tina i le taimi tonu na fanau ai i le aso 23 o Aokuso i le tausaga e 1924, a’o sau le manogi o saualii le popoatai, ua faamasamasaletaioaana, ona iloa loa lea ua sau le vaaloa e ao atu agaga e ave i Pulotu i le mea o loo iai le fafā o saualii i Falealupo. A oo loa ina faalogoina le manogi lea i totonu o le nuu ona iloa loa lea ua sau le vaaloa.
O le tina na fanau i totonu o Matamatanonofo e afio ai le Tuimalealifano i Falelatai. O le tele o vaaloa e alu agai i le mea o loo iai le fafā o saualii i le mea o loo iai le perofeta fafine o Samoa ia Nafanua, lea sa ia valoiaina le Ao o le malo o Samoa. E faatusatusa faapena le galuega a lenei tina, o Nafanua na ia valoiaina le Ao o le malo o Samoa ae o le tina lenei o se tasi o uluai tina sa latou amataina galuega faamalolo gasegase ma galuega i le tutuliina o agaga leaga sa iai seia oo mai lava i le taimi nei.
Soifua A’oa’oina
O le aoga a le faifeau sa amata ai lona olaga a’oa’oina i le itu faaleagaga mai le Vasega 1 seia oo i le Vasega 6, i le a’oa’oina lea o le faitaupi, atoa ai ma le poto salalau seia oo lava ina iloa faitau tusi ma iloa tusitusi mai le tausaga e 1928 i le 1934.
1930 – 1938: Na aoga ai i le Apia Infant i Malifa faasolo atu ai i le Apia Primary ma faaiu atu ai loa i le Apia Intermediate i Malifa i le Form 1 ma le Form 2. Ina ua uma ana a’oa’oga sa maua ai loa ona avanoa e sikolasipi mai ai i Niu Sila.
1939 – 1941: Na a’oa’oina ai i le aoga faafaiaoga a le TTC seia oo lava ina avea ma faiaoga i le Primary.
1942 – 1957: Na galue ai loa faafaiaoga e tautua le atunuu i le a’oa’oina o fanau i le poto salalau.
O le tina na iloga lona tu malosi i le tausiaina o lona aiga, o mea e fai e lē faavaivai ai Faamasamasaletaioaana i lana tautua ona o lona naunau ia manuia lona aiga. O se tasi o sikolasipi a le aiga sa iai i le malaga mai i Niu Sila, ma o se avanoa na faaeaina ai lea aiga i lea vaitaimi.
1958: Na malaga mai loa i Niu Sila ma nofomau ai ma faigaluega i le aoga a fanau e logonoa. Alu ai alu ai lana tautua seia oo loa ina nofo ma lana galuega ae tuu atoa lona taimi i le galuega a le Atua e pei ona valaauina ai lona soifua galue. Sa ia fesoasoani i lona aiga i Samoa i le aumaia o tamaiti ma tagata o lona aiga e saili manuia i Niu Sila nei, lea ua toatele ai tagata o lona aiga ua manuia e lē gata i le ola i le tino ae o le itu faaleagaga.
E toalima tina o le auso foi lea sa latou faavaeina le Emanuelu i totonu o Samoa, o le tina ia Ao, Faamasamasaletaioaana, Sulu, Rosa ma le tina ia Maina.
Galuega i totonu o le Emanuelu
O le ola tautua o le tina i totonu o le Emanuelu e lē manao e fai mea faapa’ole i luma o le Atua. Pe a oo ina fai le fono tatalo e fai lava seia ao o fai le tatalo, a anapogi e anapogi lava i le fitu aso, ae a manao foi e tatala se mataupu e manao lava ia tatala le mataupu seia malamalama lelei tagata.
O le fatu o le loomatua, ia lelei mea uma mo le viiga o le Atua ma ia manumaloina ni agaga mo le Atua ma lona malo.
A oo ina fai ana viiga e fai ai lava fai ai lava ana viiga e lē iloa e le tagata le taimi e uma ai.
O le tina e tuusa’o ana faamatalaga i tagata, e puipui i le galuega a le Atua, a faaletonu lavalava, e fai sa’o lava Masa i le tagata.
O ia sa faavaeina le mafutaga tatalo, mafutaga a tina, faatu le Aoga Aso Sa, amataina ministry taitasi, a’o lei iai se lotu. O aso o le vaiaso e fai ai mafutaga a ministry taitasi nei ae tasi lava le Aso Sa e o mai uma ai mafutaga nei ma lolotu faatasi i Papatoetoe.
O le tumutumuga o le fatu o le tina i totonu o le galuega, o le galuega tala’i, ae o le atoatoaga foi o lana galuega o le manumaloina lea o se agaga mo le Atua. E tiga lava le mamao o le mea e nofo ai i New Lynn e lē mafai ona tuai le tina i mafutaga.
Ua tupu ma ola le galuega faatala’i ma ua fau mai foi galuega lelei sa luluina e le tina i totonu o agaga o tagata.
Lea ua uma mafutaga sa faafailele ma fofoa ai le galuega a le Atua i agaga o tagata ina ia mafai ona faasooina le feau o le talalelei a Iesu Keriso, ae o lea ua faalauteleina le faleie o le galuega a le Atua e ala lea i ekalesia eseese o le Emanuelu i totonu o Niu Sila ma Ausetalia e pei ona avea ai le susuga i le faafeagaiga ia Pastor Mika Lagavale ma le faletua ia Malia Lagavale ma peresetne aoao o le ekalesia.
Ua mulimuli mai galuega lelei a le tina i totonu o le Emanuelu.
