Ua mae‘a le faiga palota sa fetogiai ai finagalo i finauga o polokiki tau upufai o le Malo sa taumafai ai e milimili loto o le au palota. Ua uma le faiga filifiliga ua toe tulai le faigamalo a le HRPP.
Peitai e lē o nofoai ai le alii Palemia i lona osofai o le Tautua Samoa e pei ona ia fautuaina le taitai o lea vaega faaupufai, e saili ane se tamalii o se matai ua matua ma sa i totonu o upufai o le Malo i le tofi faipule e avea ma o latou peresitene, lea o loo tauaveina i le taimi nei e se tasi o matai mai Lalomalava i Savaii le susuga Vaaelua Eti Alesana.
O se feiloaiga a tusitala ma le alii Palemia na ia folasia ai lea lagona, ma lana saunoaga e lē malamalama le Peresitene o le Tautua Samoa i le tele o mataupu ona e moto lona silafia. Na faaalia foi e le Palemia e fai si laitiitiiti o le peresitene e lei lava ma papa‘u lona silafia.
Na pau lea o le mafuaaga na faaalia e le Palemia e faavae ai sona lagona, ae iai le talitonuga o nisi faipule o le itu agai, atonu ua amata ona toe saili masei le taitai o le Malo i ni faatosina polokiki e osofai ai le Tautua Samoa ma faatūtū ai i le peresitene, ona afai e iai ni palota laiti e faatino i le taunuuga o faamasinoga o tagi o le palota, o le taimi lenei e amata tulei ai auā o le a lē nofoai foi le Tautua Samoa i le saili o ni o latou sui malolosi ma agavaa e fetaui ma ni sui tauva o le HRPP.
Na faaalia e le taitai o le Tautua Samoa, le afioga i le Aloalii Vaai Papu Vailupe i se feiloaiga ma tusitala i le Aso Lulu, aso 6 Aperila 2011, o Vaaelua Eti o se isi matai o le atunuu, ma ua ave i ai le faatuatuaga o le vaega faaupufai.
Na faaalia foi se finagalo faanoanoa o le taitai ona o lafoga a le taitai o le Malo e foliga ua na ta‘u faatauvaaina ai le filifiliga a lana vaega faaupufai i le tofi peresitene ua seei ai Vaaelua Eti, o se alo e faasino i le afioga Tofilau Eti Alesana, sa avea ma taitai o le HRPP, ma umia foi le tofi palemia mo le tele o tausaga a o lei tuumalo.
Na ootia le peresitene ina ua faaali sona finagalo e tusa o le lafoga a le Palemia ua satia ai o ia ma lona tofi. O lana melotagi na atagia ai lona lagona alofa i lona tuaa ma ia faaalia ai lona teena o se finagalo o loo folasia pea e le Palemia, Susuga Tuilaepa L Sailele Malielegaoi, na te ta‘ua ai pea o lona tofi taitai na filifilia e le Atua.
Na saunoa Vaaelua o lona tuaa na filifilia Tuilaepa e avea ma taitai, ma ana leai Tofilau e le pale i le tofi Palemia. E lei toe fia tali le taitai o le Malo ina ua toe fesiligia e tusitala mo sona finagalo i le mataupu.
